الأيام الماضية المصريين واجهوا انقطاعات متكررة للكهرباء بشكل غير مبرر في كل المحافظات والمناطق تقريبًا، والتي وصلت لساعتين يوميا. فهل تعرفون ما هي أسباب إنقطاع التيار الكهربائي خلال الماضية، والدولة كيف تصرفت إزاي بعد شكوى المواطنين، هذا ما سنتعرف عليه من خلال التقرير التالي:
اللي حصل إن شركة الكهرباء أعلنت عن خطة هتعملها عشان تخفف الأحمال على مدار اليوم في كل المحافظات، وده هيكون من خلال فصل التيار الكهربائي لمدة ساعة واحدة كل يوم من الساعة 10 صباحًا ولحد الساعة 10 مساءًا.
طب وليه هيعملوا كده؟
مصادر قالت إن الوزارة أخدت القرار ده عشان يساهم في تقليل نسبة استهلاك الدولة من الغاز الطبيعي والمازوت وده لان سعره مرتفع بشكل كبير.
مش بس كده دي قالت كمان انهم عملوا كده عشان يقدروا يصدروا الغاز والمازوت للخارج وبكده مصر يدخلها عملة صعبه واللي هتساعد الدولة في توفير احتياجات المواطنين من السلع الأساسية.
هل ده هيأثر علينا كمواطنين؟
لأ اطمن الخطة دي مدروسة كويس وشغاله الوزارة عليها عشان توفر الطاقة الكهربائية وتحافظ على وجود فائض، كمان الدولة مش هتنفذ الخطة دي على المستشفيات ولا المناطق الاستراتيجية المهمة يعني مفيش أي خطر على المرضى.
طب ولحد امتى ده ممكن يحصل؟
بمجرد ما بدأت الناس تشتكي خلال الفترة اللي فاتت صدرت تعليمات لرؤساء شركات توزيع الكهرباء أنهم يلغوا العمل بتخفيف الأحمال ويرجعوا مرة تانية للوضع المعتاد وده عشان الوزارة تضمن عدم وجود تأثير على المواطنين نتيجة الانقطاعات المستمرة فى التيار الكهربائي على مدار اليوم
وخد بالك ترشيد الكهرباء بيقلل استهلاك الغاز الطبيعي بشكل كبير، وعشان كده لازم يكون عندنا كلنا ثقافة الترشيد بإقتناع وده عشان الظروف الاقتصادية الصعبة اللي بتمر بيها البلاد خلال الفترة دي واحتياجنا لـ العملة الصعبة لتعظيم الدخل القومى.
هل مصر بس اللى بتعمل ده؟
الحقيقة مش بس مصر، في دول كتير أعلنت الفترة الأخيرة عن إجراءات للحد من استهلاكها للطاقة وده بعد موجات الجفاف والحر والوباء والحرب اللي شوفناها السنة دي واللي اتسببت في خلق أزمة عالمية في الطاقة، وده لأن تكلفة الطاقة ارتفعت جدًا في كل الدول تقريبًا.
على سبيل المثال الاتحاد الأوروبي حط خطة لتقليل استهلاك الغاز بنسبة 15 في المئة لموسم الشتاء السنة دي، وألمانيا وفرنسا وإسبانيا كمان حطوا قواعد بتُلزم المباني العامة بأن تكون درجة التدفئة 19 درجة مئوية كحد أقصى في فصل الشتاء عشان ميستهلكوش كهرباء كتير، وفي ألمانيا كمان لا تُضاء المباني العامة والمعالم الأثرية أثناء الليل يعني بتكون الدنيا باليل ضلمة خالص، و في إسبانيا لازم الأنوار تطفي في المحلات بعد الساعه 10 بالليل.
بعد اللي سمعتوه ده لسه شايفين إننا عندنا أزمة في إنقطاع التيار الكهربائي ولا ده إجراء عادي؟
