وزارة المالية تحمي الدولة من اي شخص يتهرب من الدفع الضريبي، ولذلك طبقت منظومة الدفع الإلكتروني على اي شخص يقدم خدمة أو سلعة للجمهور، لكن الدكاترة والمحامين والمهندسين أعلنوا رفضهم للفاتورة الإلكترونية وقالوا نحن لسنا تجار ولسنا مسجلين، فكيف ستتعامل معه الوزارة ومصلحة الضرائب؟ هذا ما سنتعرف عليه من خلال التقرير التالي:
بعد ما مصلحة الضرائب المصرية اصدرت قرار الفاتورة الالكترونية، والزمت المنشآت الفردية سواء لو تجارية أو صناعية اومهنية أو حتى خدمية
زي مهنة الدكتور، والمهندس، والفنان، والمحاسب القانوني، والاستشاري، وحتى كل اصحاب المهن الحرة، انهم يسجلوا في المنظومة بحد أقصى يوم 15 ديسمبر
دلوقتي نقابة المحامين والاطباء والفنانين، وتقريبا كل المهن الحرة رافضين المنظومة دي، ومش عاوزين يسجلوا فيها..
يعني مثلا إبراهيم الزيات نقيب أطباء الدقهلية السابق،اعترض وقال مينفعش تعامل الدكتور اللي عنده عيادة خاصة زي التاجر، كمان إجراءات المنظومة صعبة، ولما تتفرض على مهنة حيوية زي الطب مش بعيد تعطل حركة الخدمات الطبية.
ضيف على كده كمان ان الدكاترة اوقات كتير بيشتروا معدات طبية من السوق السودة من غير فاتورة، وأحيان كتير تلاقي دكتور عمل عملية لحد من اسرته ومخدش فلوس منهم.
عشان كده شايف المنظومة مش كاملة، وكان الأولى بالحكومة تكمل تطبيق للتأمين الصحي في مصر، وبعدها يطبقوا الفاتورة الالكترونية
أما بالنسبة للمحامين فسبق واتكلموا اكتر من مرة عن صعوبة تحديد الاتعاب، او ان المحامي يطلع فاتورة او ايصال الكتروني للافراد اللي بيتعاملوا مع مكاتب المحاسبة، وصعب تتسعر الخدمة المُقدمة
ومع رفضهم للمنظمة قررت وزارة المالية ومصلحة الضرايب المصرية، انها هتعمل اجتماعات وهتسمع المشاكل اللي بيمر بيها المهن المفروض عليها الفاتورة الالكترونية، ويحاولوا يساعدوهم ويوصلوا لحل وسط بحيث يحمي الدولة، ويحافظ على حقوق المهن
وده لان المنظومة اصلا هدفها تخلي كل الفواتير اللي بتطلع من التعاملات بين الشركات وبعضها، والشركات والعملاء بشكل رقمي.
ودي خطوة هتساعد في التقليل من التهرب الضريبي وحجم الاقتصاد اللي مش رسمي، ومصر اول دولة في الشرق الاوسط طبقت المنظومة
وفي حالة ان المليون شركة اللي مفروض عليهم يسجلوا، مسجلوش قبل يوم 15 ديسمبر، هيقع عليهم غرامة مالية بتتراوح بين 20 ألف لـ 100 ألف جنيه.
واللي مش بيتعاملوا بالفاتورة الالكترونية هيتحط اساميهم في بلاك ليست، ومن أول ابريل 2023 مش هيبقى معترف بأي خصم أو رد الضريبة على القيمة المضافة غير من الفاتورة الالكترونية
واماكن التسجيل بالفاتورة الالكترونية موجودة في مركز كبار الممولين بالحي العاشر بمدينة نصر، أو قطاع الحصر والإقرارات بأغاخان، أو مأمورية الشركات المساهمة، أو مأمورية الاستثمار، والمقر الإداري لإدارة التعاملات الإلكترونية بصلاح سالم.
و التسجيل هيكون عن طريق الشخص نفسه، وهيقدم طلب لمصلحة الضرايب لمستندات المطلوبة، وبعدها هيستخرج ختم الكتروني، وهيسجل في خدمات إدارة التكامل مع المنظومة، وهيتعمل لفواتيره كود معين عشان يبقى في امان، وكل ده ف اقل ساعات، ومن بعدها أي فواتير هتتبعت لمصلحة الضرايب..
دلوقتي قولنا ايه رايك في منظومة الفاتورة الالكترونية وياترى هتحتج مع النقابة ولا هتسجل فيها قبل 15 ديسمبر ؟
