الساعات الأخيرة غرفة شركات السياحة أعلنت عن صرف تعويضات للحجاج المتضررين في مشاعر منى وعرفات، ليس هذا فقط، بل أنها وضحت كمان حجم التعويضات التي سيحصل عليها كل حاج.
فياترى التعويضات دي هتكون قد ايه؟ وهتتصرف امتى؟ وهل كل الحجاج هيصرفوا مبلغ موحد؟ وايه اللي حصل للحجاج السنة دي اصلا؟
ناس كتير سمعت عن أزمة الحجاج اللي حصلت السنة دي في مشاعر منى وعرفات، وطبعا الأزمة دي قلبت الدنيا في السعودية ومصر وخلت كتير من المسئولين في البلدين يطلعوا بيانات ويتكلموا عن الأزمة، ده غير أن ظهرت اخبار عن صرف تعويضات للحجاج المتضررين
وده خلى ناس كتير تسأل هل هيتم صرف تعويضات فعلا ولا لا؟
شوف ياسيدي، حسب تصريحات أحمد وحيد، عضو مجلس إدارة غرفة شركات السياحة بالدلتا التابعة للإتحاد المصري للغرف السياحية في جريدة الوطن، إن الغرفة خاطبت شركات السياحة المنظمة لرحلات الحج السنة دي، عشان تبعتلهم بيانات الحجاج المتضررين من قصور وسوء خدمات الحج بمشاعر منى وعرفات، وده تمهيد لصرف مبالغ التعويض ليهم
وقال أن البيانات اللي طلبتها الغرف من الحجاج المتضررين كانت عبارة عن أسمائهم وعناوينهم وفقا لبطاقة الرقم القومي بالإضافة لأرقام التليفونات، وتحديد نوع المشكلة اللي كانوا بيعانوا منها هناك
وقال كمان إن بعد الانتهاء من تحديد مبالغ التعويض المستحقة لكل حاج، هيتم إرسالها لبنك مصر عشان المتضرر ياخدها ببطاقة الرقم القومي، وعموما غرفة شركات السياحة شغالة دلوقتي على تحديد قيمة التعويض لكل حاج وفقا للخدمة اللي كان بيشتكي منها خلال تواجده بمخيمات منى وعرفات والمستوى الخاص بيه سواء اقتصادي أو 5 نجوم
عشان كده مبالغ التعويض هتختلف من حاج للتاني لأن كان في بعض الحجاج مكنوش لاقيين مخيمات ليهم في منطقة منى اصلا، وطبيعي تكون مبالغ التعويض بتاعتهم أكبر من الحجاج اللي اشتكوا من وجود نقص بالخدمات
بس هو إيه اللي حصل للحجاج السنة دي؟
انا أقولك، اللي حصل ياسيدي إن كان في 104 من الحجاج المصريين اشتكوا من عدم وجود مخيمات ليهم في مشعر منى، طبعا الأزمة دي ممررتش مرور الكرام وكل الجهات اتحركت لدرجة أن وزير السياحة طلع ووجه بفتح تحقيق عاجل بخصوص الأزمة دي عشان يعرف مين السبب فيها
مش بس كده دي سامية سامي رئيس الإدارة المركزية لشركات السياحة بالوزارة ورئيس مكتب شئون الحج السياحي المصري، أعلنت حالة الاستنفار بين لجان البعثة وطلبت بسرعة التوجه للحجاج المتضررين عشان يتم حل مشكلتهم في اسرع وقت ومتابعتهم لحد ما يأدوا المناسك
وفعلا البعثة في السعودية اتدخلت واتوصلت مع وزارة الحج السعودية اللي بعتت عدد من كبار المسئولين عشان يحلوا المشكلة، وألزموا مراكز خدمة الحجاج بتوفير مخيمات بديلة بكل الخدمات للحجاج المتضررين
وبالمناسبة غرفة شركات السياحة نجحت في المفاوضات مع شركة رواف المسئولة عن خدمات الحجاج في استعادة كل حقوق الحجاج وحولت مبلغ 8.2 مليون ريال سعودي للحجاج المتضررين كتعويض ليهم عن اللي حصلهم في موسم الحج
ودلوقتي قولنا رايك في تصرف الحكومة في أزمة الحجاج؟ وشايف إن 8.2 مليون ريال تعويض مناسب للحصل؟
