توجد العديد من السيارات التي تجاوز عمرها 30 عام، وتتسبب في تأثير سلبي على البيئة، بالإضافة إلى أنها تستهلك كمية كبيرة من البنزين والسولار، كيف ستتحول كل هذه السيارات القديمة للعمل بالغاز الطبيعي؟ ومن سيحول سيارته، وكيف يمكننا الاستفادة من المبادرة؟ كل هذه الاسئلة سنعرف إجابتها من خلال التالي:
ازاي كل العربيات القديمة هتبقى بالغاز الطبيعي، ومين هيحول عربيته وكمان ازاي يقدر يستفيد من المبادرة الخاصة بتغيير العربية بتاعته؟.. تعالوا نشوف ونعرف التفاصيل خليكوا معانا.
الدكتور محمد معيط وزير المالية قال إن الوزارة مستمرة في تنفيذ المبادرة الرئاسية لإحلال العربيات القديمة اللى عدى على تصنيعها أكتر من 30 سنة علشان تشتغل بالغاز الطبيعى، ضمن تكليفات الرئاسة بالتحول للاقتصاد الأخضر في الوقت اللي بتستضيف فيه مصر قمة المناخ بشرم الشيخ.
الوزير أعلن إنه تم ضم محافظات الإسماعيلية والشرقية والبحيرة وبني سويف وسوهاج للمبادرة الرئاسية لإحلال العربيات القديمة بعربيات «موديل السنة» موفرة اقتصاديًا وتكون صديقة للبيئة من خلال تسهيلات بنكية كبيرة لتطبيق التنمية المستدامة و«رؤية مصر ٢٠٣٠».
وقال كمان وزير المالية إن الدولة تحملت أكثر من 590 مليون جنيه قيمة «الحافز الأخضر»، اللي استفاد منها أكثر 24 ألف مواطن لحد دلوقتي لاشتراكهم بالمبادرة الرئاسية، واستلموا عربيات جديدة لمنع تلوث الهواء وتقليل المواد الضارة وتقليل ازدحام المرو بسبب أعطال عربياتهم القديمة، وكمان لتقليل استهلاك المحروقات باستبدالها بالغاز الطبيعي.
قال كمان الوزير إن القطاع الخاص بقى شريك أصيلً فى نجاح المبادرة الرئاسية لإحلال العربيات وتطبيق نتايجها لضمان تحريك عجلة الاقتصاد وكمان لتوفير فرص عمل اكتر.
أما أمجد منير مساعد أول وزير المالية فقال إن رئيس مجلس إدارة صندوق إحلال العربيات القديمة قام بالتنسيق مع المحافظات الجديدة بواسطة فريق عمل إدارة المبادرة بالتعاون مع المختصين بالمحافظات لمعاينة مكان تجميع العربيات القديمة المقترحة للتأكد من استكمال الشروط الفنية والبيئية المطلوب توافرها لتدريب العاملين بالمحافظات وادارة المرور وفروع البنوك بمشاركة 31 بنك و 500 فرع.
أضاف أنه تم تخريد 24 ألف عربية قديمة ما بين «ملاكى» و«تاكسى» و«ميكروباص»، ووصل عدد الطلبات ل 42 ألف طلب على الموقع الإلكترونى للمبادرة، وفي تنسيق مستمر مع ممثلين الشركات لتسهيل إجراءات تسليم العربيات الجديدة للمستفيدين بمبادرة إحلال العربيات القديمة.
وبخصوص شروط التقديم بالمبادرة فلابد يكون عدى على تصنيع العربية القديمة 30 سنة، وكمان يكون لها رخصة باسم صاحبها، ويكون عدى على الرخصة سنتين على الأقل.
كمان وضح أحمد حسين، المتحدث الرسمى باسم مبادرة تغيير العربيات بوزارة المالية، إن المبادرة شغالة باستمرار في متابعة الطلبات من خلال موقعها الإلكترونى بالوزارة وتسجيل البيانات.
واضاف بإن أهالي ال 5 محافظات الجديدة يقدر يشتركوا في المبادرة بالتنسيق مع مختلف الجهات المعنية، وسيتم إتاحتها للمواطنين للاشتراك مؤكدًا بأنه هيتم إطلاق المبادرة في المحافظات الخمسة الجديدة بنفس الشروط الخاصة بمحافظات القاهرة والجيزة والقليوبية والإسكندرية وبورسعيد والسويس والبحر الأحمر والأقصر وأسوان ومدينة شرم الشيخ.
اخيراً.. عاوزين تعليقاتكم على الفيديو خاصة ان دي فرصة تقول للبنزين باي باي.
