لا خلاف أن العمالة المصرية تأخذ مساحة كبيرة في الكويت، وكلهم بلا استثناء يعملوا بكل طاقتهم من أجل أن يكملوا في شغلهم، الغريب بقى أن فيه بعض الكويتيين على السوشيال ميديا واخدين الموضوع بسخرية من العمالة المصرية بسبب الشغل الجديد اللى فتح ليهم في قطاع البترول.
إيه اللى قاله الكويتيين على السوشيال ميديا؟ وإيه دخل الحكومة الكويتية في الموضوع؟ ورأى العمالة المصرية هناك؟.. كل ده وأكتر هنعرفه مع بعض في التقرير التالي:
لو فاكرين لما قولنالكم قبل كده، إن الكويت فتحت للمصريين الباب على التقديم في شركات البترول، وأنهم بيستعدوا خلال الفترة الجاية لاستقبال عدد كبير من المصريين من مهندسين وعمالة عشان يشتغلوا هناك ومرتباتهم هتعدى الألف دينار كويتي يعنى بالمصري مايقارب 100 ألف جنيه.
دلوقتى بقى ظهرت مجموعه كده من الكويتيين على السوشيال ميديا وواخدين الموضوع ضحك وسخرية على المصريين اللى هيقدموا في الوظائف دى، وماسكينهم وهاتك يا تريقة، كل ده بغرض الهزار والضحك، مش سخرية بجد يعنى وتعصب وكده، وبيقولوا حكومة الكويت بتحب المصريين.
طيب سؤال هي حكومة الكويت بتحب فعلا المصريين ولا إيه الحكاية؟
للأمانة أحنا مانقدرش نقول كده بصراحة يعنى، بس اللى نقدر نقوله وأحنا واثقين قوى أن العمالة المصرية شاطرة جدا، والعامل المصرى تشغله في أي حاجة يسد ويبقى مسيطر في مكانة، وعلشان كده الكويت والدول الخليجية بتستعين بالعمالة المصرية والمصريين عموما في معظم المجالات اللى فاتحه شغل.
وعلشان كده أتكلم علينا عدد كبير من المواطنين الكويتيين، وشافوا ان الحكومة الكويتية بتحب المصريين، ماهوا ياجماعة مافيش أشطر من المصرى، صدقونى، العامل المصرى إيده تتلف في حرير، والمهندس يقدر يظبطلك أحلى مشروع ويطلعه في وقت قياسى.
نيجى بقى للسؤال المهم، هل العمالة المصرية في الكويت زعلت من كلام وضحك الكويتيين على السوشيال ميديا؟
لا طبعا، إحنا مصريين ياجماعة وأكتر ناس بتحب الضحك والفرفشه أصلا، دول دخلوا على صفحاتهم على فيس بوك وقعدوا يضحكوا اللى يقولك ياريت كل يوم تنزل لينا فرص شغل جديدة ونقعد نضحك كلنا سوى ماعندناش مانع، وبعدين أصلا كلام السوشيال ميديا ده في إطار الهزار مش أكتر ماهو لو الكويتيين يعنى عايزين الوظائف والشغل ده، كانوا بكل بساطة قدموا عليه وأكيد كانت الحكومة الكويتية هاتستولاهم أكيد يعنى مفيهاش كلام.
وأظن دلوقتى حان الوقت أن نفكر كم بفرص الشغل اللى طلبتها الحكومة الكويتية في قطاع البترول، والفرص زى مابيقول موقع الأنباء الكويتى نقلا عن مصدر مسؤول، أنها عبارة عن مهندسين وعمال هيشتغلوا في شركات البترول الكويتية، وأن شركة النفط الكويتية ستطرح قريبا 7 عقود لجلب عمالة فنية ماهرة من عدة دول، هي : كندا والولايات المتحدة الأميركية ومصر وجنوب شرق آسيا ودول الخليج، للعمل في التخصصات الفنية مثل عمليات الحفر والصيانة والاستكشاف والإنتاج والتخصصات الطبية والصحة والسلامة والبيئة والهندسة.
يعنى كده العمالة المصرية اللى هتسافر الكويت خلال الفترة اللى جاية هتكون للعمل في الحفر والصيانة والاستكشاف والهندسة، وكل ماهوا متعلق بقطاع البترول، المهم تكون العمالة اللى رايحة شاطرة جدا وعندها القدرة أنها تتطلع الشغل في مواعيدة المطلوبة، ومافيش تكاسل خالص، علشان ماتبقاش سخرية بعض الكويتيين على السوشيال ميديا فعلا بجد.
لحد هنا ونكون وصلنا لنهاية الفيديو، وقبل مانقفل حابين نسألكم إيه رأيكم في سخرية بعض الكويتيين على العمالة المصرية على السوشيال ميديا، وإيه رأيكم في العامل المصري أصلا، يشرف المكان اللى يروحه ولا إيه الحكاية، اكتبوا في التعليقات.
