بكم تشتري رغيف الحواوشي؟ بالطبع قد جربت في يوما ما الممبار والفشة من أحد مسامط السيدة، استعد للصدمة التي أعلنها صاحب أشهر محلات السمين وفجر مفاجأة عن أسعار الكبدة والممبار والفشة وقال إن معظم المنتجات الموجودة فى المحلات في السوق يااما لحم حمير أو كلاب، وهذا لأن سعرهم أقل كثير؟
تفتكروا الكلام ده حقيقي وياترى فعلا احنا كلنا أكلنا من المنتجات دي وإزاي نفرق ما بينهم و ايه علاقة ده بالأسعار خليك معانا في التقرير ده واحنا نقولك الحقيقة:
«الناس بتاكل ممبار حمار، ومفيش محل يقدر يجيب ممبار العجول لأنه غالي»، جُملة نزلت زي الصاعقة على المصريين، وده بعد تداول فيديو لأحد أصحاب المطاعم الشهيرة، اللي كشف من خلاله غش بعض المطاعم في الممبار والكوارع وغيرها من «سقط العجول».
صاحب محلات “بحة للسمين” بالسيدة زينب، كشف مفاجأة عن وجهة نظره في المسامط اللي بـ تبيع الممبار والفشة للمواطنين، وأكد إن كل الحاجات اللي بتتباع دي مش بتكون من العجر زي ما الناس فاهمة لكن بتطلع من الحمير.
أيوة زي ما سمعتوا كدة بالظبط!
ولما سألوا طلعت صاحب محل بحة ياترى الحمار بيطلع منه السمين؟ ، رد وقال الحمار ممكن نستخدمه في كل حاجة زيه زي العجل بظبط، وممكن يتعمل منه ممبار وبيتسلق ويتاكل والمواطن مش بيعرف لأنه مستحيل يفرق ما بين الاتنين بعد ما يتطبخوا.
وقال في الفيديو اللي انتشر بسرعة البرق على مواقع التواصل الاجتماعي الفيسبوك والتيك توك، أن كيلو الممبار النهاردة بـ 80أو 90 جنيه، وكيلو الفشة بـ 100 جنيه.
وإن الكيلو بيجي قليل ولما بيتسلق بيكيش وميقضيش 7 سندوتشات، وعشان كدة أصحاب المحلات بيعتبروا إن شرا ممبار العجل خسارة كبيرة لصاحب المحل اللي بيدفع حق الماية والنور والعمالة والسلطات.
وقال إن مرتب العامل الواحد مش بيقل عن 200 جنيه عشان كدة صاحب المحل بيبص على المكسب وإن مفيش محل سمين هيقدر يجيب سمين العجل دلوقتي لأنه هيخسر.
قال كمان إحنا مش عاوزين نكدب على نفسنا.. رغيف الحواوشي من الأخر يا حمير يا كلاب، وده لأن لحم الحمار بيوصل الكيلو من من 15 لـ 20 جنيه، أما لحم الكلاب فيعتبر ببلاش خالص.
وقال ان الحمار بيتباع بسرعه واي حد عنده حمار بيفضل يبيعه عشان يكسب أكتر خاصة إنه بيأكل أما ا لكلاب فبيتم اصطيادها من الشارع.
مش بس كده ده كمان اتكلم وقال إن سندوتشات الكبدة اللي بيتراوح سعرها من 4 لـ 15 جنيه لحمة كلاب صرف وانه مسؤول عن كلامه لأن الكبدة عند الجزار بتتباع قبل ما الذبيحة تنزل عند الجزار تكون الكبدة متباعة.. طيب الناس اللي بتبيع الرغيف بـ 5 جنيه هتجيب كبدة منين إن شاء الله”.
وللأسف مصريين كتير لما بيسمعوا عن محلات أكل بتعمل خصومات وأسعار رخيصة بيروحوا ياكلوا فيها بدون ما يتأكدوا من مصدر الأكل ده
بس الحكومة مش بتسكت ووزارة التموين بالتعاون مع وزارة الصحة بتعمل حملات مكثفة على كافة محلات الأكل ولما بيكون في محل مش بيطبق المواصفات الصحية بيتم غلقه وتشميعه فورًا.
في النهاية يهمنا نعرف رأيك وهل انت شايف إن الراجل ده كلامه حقيقي، وبعد اللي سمعته ده ممكن تفكر تاكل من مسمط تاني ولا توبت إلى الله؟
