لو انت موظف في الحكومة فإن هذا الخبر من أجلك وهذا لأن الدكتور مصطفى مدبولي قرر يزود الحد الأدنى للأجور للعاملين في أجهزة الدولة والهيئات العامة الاقتصادية
النهاردة في مفاجأة لكل العاملين في الدولة والهيئات الاقتصادية وهي إن الدكتور مصطفى مدبولي قرر يرفع الحد الأدنى للأجور للفئات دي، ونشر القرار ده في الجريدة الرسمية للدولة.
والجميل إن القرار ده هيطبق من الشهر اللي احنا فيه ده أيوة إبريل وكل الموظفين في الدولة الهيئات الاقتصادية هيتعدل ليهم قيم الحد الأدنى لإجمالي الأجر اللي بيحصلوا عليه.
طيب كده كل موظف هيقبض كام؟
هقولك يا سيدي، بالقرار الجديد ده المفترض إنه ميقلش الحد الأدنى لأجور الموظفين والعاملين في أجهزة الدولة بالهيئات العامة الخدمية والاقتصادية
وبكده لو اللي بيشتغلوا في الدرجة الممتازة مش هيقل الحد الأدنى ليهم عن 10500 والعليا 8500 ومدير عام 7000 جنيه والأولى 6500 والتانية 5500 والتالتة 5000 والرابعة 4500 والخامسة 4000 والسادسة 3500.
مش بس كده ده القرار كمان كان بينص إنه يكون الحد الأدنى لإجمالي الأجر للموظف العامل من حاملي درجة الماجستير 7000 جنيه في الشهر
وكمان القرار كان بينص إنه الموظف العامل بيستحق حافزا تكمليا وده بيمثل الفرق بين إجمالي الأجر والحد الأدنى المنصوص عليه
ولو انت من القطاع الخاص وبتسأل عن أي زيادة هشتمل الفئة دي قريب، أحب أقولك إنه المجلس القومي للأجور قال إنه هيعمل اجتماع في آخر شهر أبريل اللي جاي عشان يبحث الموضوع ده.
والاجتماع اللي هيكون بعد شهر رمضان في الغالب هيناقش تفاصيل المساواة بين القطاعين الخاص والعام.. عشان يكون الحد الأدنى هنا وهنا 3000 جنيه.
والزيادة دي هتكون التانية للقطاع الخاص السنة دي.. عشان في شهر يناير اللي فات تم تطبيق زيادة 300 جنيه على القطاع الخاص عشان يوصل 2007 بدل ما كان 2400 جنيه.
وده اللي أكده إيهاب منصور، وكيل لجنة القوى العاملة في مجلس النواب،و قال إن زيادة الحد الأدنى للأجور في القطاع الخاص الهدف الأول منها أن الكل يتساوى سواء القطاع الخاص أو الحكومي.
وطبعا كل الزيادات اللي بسمع عنها من فترة لكل المواطنين دي عشان تدعم الحكومة الناس في مصر وتخليهم يقدروا يواجهوا ارتفاع الأسعار في الأسواق بعد موجة التضخم اللي حصلت في البلد.
والمفترض إن المالية بتجهز نفسها اليومين دول عشان تصرف مرتبات شهر إبريل لسنة 2023 للقطاع العام والعاملين بالجهاز الإداري للدولة قبل إجازة عيد الفطر واللي هيكون مضاف ليها زيادة المرتبات الجديدة.
وصرف المرتبات هيكون من أول يوم الخميس الموافق 13 في الشهر، والكلام ده هيتطبق على 33 وزارة وهيئة ومصلحة حكومية.. وطبعا مع مراعاة أيام الأجازات والعطلات الرسمية.
دلوقتي قولنا رأيك في زيادة الحد الأدني للأجور للقطاع العام والخاص وهل شايف إن ده كافي لدعم المواطنين؟
