أسعار الأرز في الخارج زادت لأعلى مستوى لها في 15 سنة! لكن ماذا سيحدث في مصر في مصر الفترة القادمة؟ وهل أسعار الرز سترتفع؟ وهل ممكن نرى أزمة جديدة كما حدث العام الماضي.
فجأة كده وبدون مقدمات أسعار الرز العالمية ارتفعت لأعلى مستوياتها من 15 سنة وده حسب وكالة رويترز بسبب إن الهند فرضت حظر على صادرتها لـ الرز، وده طبعا عطل حركة التجارة وجه في وقت صعب بتعاني في بعض الدول من نقص الكميات المتاحة من الرز خصوصًا إنه لسه حصاد المحاصيل الجديدة متمش.
وطبعا نتيجة لـ ده، ارتفع المؤشر العالمي لأسعار الأرز التابع لمنظمة الأمم المتحدة للأغذية بنسبة 10% تقريباً في أغسطس اللي فاتت، بس يا ترى إيه هيحصل في مصر :
حد يقولي هو احنا مالنا مثلا بالهند ؟ لا ياسيدي لو انت متعرفش فـ الهند بتعتر أكبر مصدر للأرز في العالم، وبـ تستحوذ على أكتر من 40٪ من الشحنات العالمية.
طيب هل ده معناه إننا هنتأثر بالقرار ده ؟
حسب تصريحات رجب شحاته، رئيس شعبة الأرز بغرفة صناعات الحبوب باتحاد الصناعات لـ جريدة المصري اليوم قال إن خطة الهند بحظر تصدير الرز عالميا مش هتأثر على السوق المحلية، وده لأن مصر مش بتستورد الرز بكميات كبيرة من الهند.
وحتى لو حصل واتحركت الأسعار العالمية فـ في أسواق بديلة ممكن نلجألها زي تايلاند وفيتنام، وده لأن مصر تعتمد على إنتاجها المحلي، واللي بيكفي حاجة المواطنين من الاستهلاك، ده كمان طمن المواطنين وقال إن في مخزون يكفي السوق لشهور جاية.
شحاته قال كمان إن موسم حصاد الرز قرب، وده اللي خلى في استقرار في اسعار السوق المحلية واللي متوقع يستمر معانا كذا شهر.
كمان قال إن سعر طن الأرز الشعير نزل إلى 13 ألف جنيه، وهيكون في إنخفاض جديد في أسعار الأرز العريض، ونتوقع أنه من الممكن أن ينخفض سعر الأرز رفيع الحبة لـ10 آلاف جنيه للطن.
كمان نادر نور الدين، أستاذ الموارد المائية وعلوم الأراضي بكلية الزراعة جامعة القاهرة، قال في تصريحات لـ جريدة المصري اليوم إن الهند ودول جنوب شرق آسيا بتعتمد على تصدير الأرز طويل الحبة، لكن الرز قصير الحبة اللي بتعتمد عليه مصر كغذاء أساسي بيشغل مساحات صغيرة من الدول دي
وطمن الناس وقال إن مصر عندها انتاج محلي من الرز قصير الحبة واللي بيكفى حاجة الاستهلاك، عشان كده قرار الهند مش هيأثر على السوق المحلي، خاصة وإن مساحة الرز المزروعة محليا خلال الموسم الحالي كويسة
ده كمان نادر نور الدين قال إن التجار بدأوا في الترويج لمحصول الرز الجديد، وإن في عادة بيلجأ ليها التجار كل سنة قبل الحصاد وهي تخفيض الأسعار في الأسواق وده اللي حصل فعلا داخل السوق ونزلت اسعار الرز خلال الفترة اللي فاتت بمعدلات كبيرة
وده لأن الهدف من الحركة دي هي وهم الفلاحين بأن السعر بينزل وده لحد ما يتم التوريد بسعر قليل وبعد كده يرجعوا التجار يرفعوا السعر من بداية شهر أكتوبر.
قولولنا في رأيكم هل ممكن تتأثر الأسعار المحلية باللي بيحصل في الهند؟
