هل هذه ثلاجة أم ماكينة atm؟ ماذا تفعل إن عرفت أن شراء ثلاجة أصبح يتطلب تحويشة العمر، ليس فقط تحويشة عمرك فقط بل يجب أن تتشارك أنت وأصدقائك، هل تتخيل أن سعر ثلاجة يصل 116 ألف جنيه هذا ما سنتعرف عليه من خلال التالي:
في الوقت اللي كتير من المصريين بيدوروا على سعر الدولار وعاوزين يطمنوا على رغيف العيش وهل الحكومه هترفع عنه الدعم ولا هيفضل بخمس قروش، أو حتى بيدوروا على سعر كيلو الفراخ وازازه الزيت.
في صور انتشرت على السوشيال ميديا خلت الناس تضرب كف على كف، الصوره ظاهر فيها تلاجه من ماركه مشهوره والسعر المكتوب كان المفاجأه:
116 الف جنيه، صحيح التلاجه باين عليها امكانياتها كبيرة: 4 باب وجهاز لتبريد الميه وتقدر تسوف اللي جواها من غير ماتفتحها وغيره وغيره.
لكن برده السعر خلي الناس تستغرب وتسأل: هل ممكن حد يشتري التلاجة دي في وقت أزمة زي اللي بنعيشه.
هنا الناس اختلفت: في اللب قالك ان كل حاجه وليها زبونها ودي تلاجه المشاهير والفنانين والممثلين، وتقريبا اغلب البلوجر واليوتيوبرز اشتروها وفيديوهاتهم من جوة البيت هي اللي بتقول.
وفي ناس تانيه رأيها إن مش التلاجه اللي سعرها بقى عالي، لأ ده الجنيه اللي قيمته نزلت خصوصا بعد الارتفاع الاخير للدولار عشان يكسر حاجز ال 29 جنيه ويقرب من ال 30 جنيه كمان.
ده غير المتابعين اللي سخروا من ضخامتها وقالوا عليها انها دفع رباعي.
والفكرة بقى إن التلاجه دي مش أول سلعه تخلي المصريين يستغربوا، فاكرين شاشه التلفزيون اللي كان سعرها مليون و400 ألف جنيه؟
لو مش عارفين ايه الحكايه. فمن كام اسبوع كده وعلى نهايه 2022 انتشر فيديو على فيسبوك لشاب من جوه احد المولات الشهيره في القاهرة، بيعرض شاشه بسعر خيالي مليون و400,000 جنيه وبيقول يعني دي لو باظت ادفع في تصليحها مليون جنيه ايه الاسعار دي!
وطبعا الشاشه كانت بمواصفات خياليه، مقاسها 136 بوصة، وفيها وحدة تحكم مدمجة، ومكبر صوت مدمج، و عشان تشغلها مش محتاج توصيلات كل اللي عليك تثبتها تشغلها بالريموت.
وحتى ياسيدي لو لغينا كل المميزات دي، تعرف ان كارفور لما نزل تخفيضات على قسم الاجهزه الكهربائيه وعمل عرض على شاشه مقاس 60 بوصه ب 10 آلاف جنيه، وساعتها شفنا منظر غريب.
السباق على الشاشات بين الزباين وصل لالفاظ خارجة وخناقة على مين يلحق قبل التاني، ولما الموظفين حاولوا يدخلوا عشان يهدوا الزباين خدوا نصيبهم من الخناقة.
فياترى ايه تفسيركم للظواهر دي: هل فعلا كل حاجه لها زبونها ولما السوق يشتغل كله هيستفيد؟ ولا احنا في وقت ازمه والمفروض الاستهلاك يبقى للسلع الاساسيه بس؟
طيب لو معاك مبلغ كبير شويه وفي سلعه معروضه قدامك وعليها خصم: هتشتريها عشان خايف الاسعار تزيد وتقول اهي حاجة للزمن؟ ولا هتخلي الفلوس معاك يمكن تحتاجها في اي وقت؟
