الآن يمكنك ان تسافر السعودية وتزور مكة والمدينة وتعمل عمرة، إن كان لك صديق أو قريب يقيم في السعودية، وذلك ن خلال تأشيرة الزيارة الشخصية، التي يمكنك التقديم عليها وأنت في بيتك وباقل سعر، للتعرف على التفاصيل الكاملة تابعنا في التقرير التالي:
أسعار العمرة غليت، وده صعّب على ناس كتير برا السعودية، انهم يسافروا يعملوا عمرة، لكن وزارة الخارجية بالمملكة السعودية، بتحاول تساعدهم في مصاريف وخطوات السفر، خصوصا في وقت الازمة الاقتصادية العالمية، وكمان السعودية بتحاول تزود أعداد الزيارات الخارجية لعندها، عشان تحقق أهداف رؤية المملكة 2030م.
عشان كدا وزارة الخارجية السعودية، وفرت خدمات كتير تحت تأشيرة زيارة شخصية، يعني بيها تقدر تدخل أراضي المملكة وتزور صحابك المقيمين هناك، ومش بس كدا كمان بتوفرلك تتنقل بين مدن المملكة، وتزور مكة والمدينة المنورة وتأدي مناسك العمرة، وكمان تزور المواقع الدينية والتاريخية، وتحضر الفعاليات الثقافية.
ومدتها بتفضل متاحة معاك لمدة 3 شهور، ومستمرة لغاية شهر رمضان، لكن مبتسمحش لأداء الحج.ومتشيلش هم التقديم على التأشيرة، لان الخطوات كلها الكترونية، وبتبقى البداية من عند الشخص المقيم في السعودية، بيقدم على طلب زيارة شخصية من منصة التأشيرات بوزارة الخارجية، وهيسجل من منصة النفاذ الوطني الموحد لانه من المقيمين.
وهيختار خدمة الافراد، وهيملي وبيانات الشخص اللي هيسافر، أهم حاجة إنه يتأكد ان البيانات صح، لانها بتبقى على مسؤوليته.
بعد كدا الطلب والبيانات بيتراجعوا، وبيصدر “مستند تأشيرة زيارة شخصية”، وانت تقدر تشوفه من خدمة الاستعلام عن طلب دعوة اللي موجودة في الموقع.
وكل المطلوب منك بقى، بعد ما تتأكد من التأشيرة، إنك هتدخل على بوابة العمرة الالكترونية، هتكتب بياناتك الشخصية، وهتختار شركة سياحة مرخصة من وزارة الحج والعمرة في السعودية، وتختار البرنامج المناسب للعمرة وتوافق على الشروط والاحكام.
وكدا يبقى انت ماشي صح، وتقدر تكمل وتدفع رسوم البرنامج اللي اختارته، والتأمين الطبي، وتقدم الطلب وجواز السفر للسفارة أو قنصلية المملكة، او للمكاتب والمراكز التابعة للسفارة، في البلد اللي انت مقيم فيها.
وخلاص مش مطلوب منك اي حاجة تاني، غير إنك تستلم تأشيرة الدخول، وجواز السفر، وتسافر للسعودية بالطريقة اللي تريحك جو بقى أو بر وبحر.
وبالنسبة لسعر التأشيرة ورسومها، بتتكلف 81 دولار، يعني حوالي 2.142 جنيه مصري، ولو انت سنك تحت الـ 50 سنة، بتدفع من 265 لـ 480 جنيه رسوم تأمين طبي، بس بيطلب منك رسوم كمان، زي رسوم الانجاز وتمنها 555 جنيه، و1200 جنيه رسوم حجز المعاد لتسهيل واستلام الورق.
وبعد كدا كل اللي عليك تحجز تذكرة الطيران ذهاب وعودة بسعر 8650 جنيه.ومتنساش أهم حاجة باركود العمرة عشان مترجعش تاني في المطار وتتمنع من السفر، وهتلاقي سعرها بيتراوح بين 3200 جنيه لـ 5000 جنيه.
يعني كدا اجمالي سعر العمرة من خلال تأشيرة الزيارة الشخصية هيتراوح بين 16 لـ 18 ألف جنيه ، الخدمة دي متاحة لكل الجنسيات، وهتتوفر لـ 27 مليون شخص، لكن النصيب الاكبر هيبقى للمصريين، وأي شخص يقدر يسافر، بس لازم تكون واخد لقاح فيروس كورونا، ومفيش أي شروط تاني .
تابعونا عشان نعرفك التطورات أول بأول .
