كل فترة و الثانية الحكومة تصدر بعض التحذيرات والقرارات بخصوص العاملين في الخارج، أخر التحذيرات هذه هو تحذير وزارة الهجرة بخصوص المصريين العاملين في السعودية والتي حذرتهم فيه من دفع غرامة وتعرضهم للسجن أيضا في هذه الحالة..
بس يا ترى وزارة الهجرة قالت إيه؟ وحذرت المصريين هناك من إيه؟ وعدد المصريين في السعودية وصل دلوقتي لكام؟ وإيه هو البرنامج اللي أطلقته السعودية لجذب عمالة ليها؟
خلال الساعات الأخيرة وزارة الهجرة المصرية طلعت بيان بخصوص المصريين في السعودية وحذرتهم فيه من دفع غرامة و السجن كمان
بس يا ترى هي وزارة الهجرة قالت إيه؟
شوف يا سيدي، حسب موقع روسيا اليوم، الوزارة حذرت في بيان ليها المصريين اللي شغالين في المملكة العربية السعودية في حالة عملهم لحسابهم الخاص أو مخالفتهم للأنظمة والقوانين، وقالت إنهم في الحالة دي هيدفعوا غرامة مالية بقيمة 50 ألف ريال سعودي وهيتعرضوا للسجن لمدة 6شهور
مش بس كده ده كمان المنشأت اللي بتشغلهم هما كمان هيتعرضوا لعقوبة، بس إزاي؟
أنا أقولك، في الحالة دي الوزارة قالت إن المنشأت اللي بتشغل الوافدين المخالفين للأنظمة، أو بتستخدم عمالة غيرها، فدول بقى هيدفعوا غرامة مالية 50 ألف ريال سعودي وكمان هيتحرموا من الاستقدام لمدة 5 سنين، ده كمان المدير المسئوول هيتعرض للسجن لمدة سنة وهيترحل لو كان وافد
نسيت أقولك أنه من فترة السفيرة سها الجندي وزيرة الدولة للهجرة اجتمعت مع فيصل العتيبي الملحق العمالي السعودي عشان يطلقوا حملة توعية بأسم “اعرف حقك واطمن”
ودي بقى حملة بتستهدف المصريين اللي شغالين في السعودية عشان يعرفوا حقوقهم وواجباتهم هناك ووفقا لقانون العمل بالمملكة، بس السؤال هنا: هو عدد المصريين اللي في السعودية قد إيه؟
حسب موقع أخبار اليوم، سها الجندي وزيرة الهجرة، قالت إن في 12 مليون مصري في الخارج، وإن أكبر جالية مصرية موجودة في السعودية بعدد 2.5 مليون مصري، شغالين في كتير من الوظائف والمناصب هناك.
وقالت إن سبب وجود العدد ده من المصريين هناك يرحع للعلاقات التاريخية بين مصر والسعودية، عشان كده بقت المقصد الأول ليهم في العيش والعمل خارج مصر.
ورغم إن عدد المصريين في السعودية تخطى حاجز المليون، إلا أن السعودية لسه بتسعى في جذب عمالة مصرية ليها، وده لأن من شهور وزارة القوى العاملة نسقت مع الجانب السعودي لتنظيم برنامج للفحص والاعتماد المهني لضخ عمالة مصرية مدربة في سوق العمل السعودي ودلوقتي بيتم إعداد مذكرة عشان يتم وضع البنود الخاصة بالبرنامج، وده حسب موقع صدى البلد.
البرنامج ده الهدف منه أنه يأهل ويدرب العامل المصري على المهارات اللازمة وده من خلال اختبارات عملية ونظرية في مجال تخصصه عن طريق مراكز متخصصة ومعتمدة.
وبحسب صدى البلد، البرنامج ده بيشتغل في مسارين: المسار الأول بيهدف لفحص العمالة في دولهم قبل وصولهم للسعودية، أما بقى المسار التاني فهو بيعتمد على فحص العمالة المهنية الموجودة في السعودية وده بالتعاون مع مراكز متخصصة
ودلوقتي قولنا رأيك في قرار وزارة الهجرة بخصوص المصريين المخالفين هناك؟
