عصر مخالفات البناء انتهى.. والجراجات المقفولة هناخدها! هل تتخيلو سبب حديث الرئيس السيسي عن الأمر ، وهل هذا معناة إن أزمة البناء العشوائي والمخالف في مصر هستنتهي؟
رسايل مهمة وجهها الرئيس عبد الفتاح السيسي للمصريين وحسم بيها ملف التعديات والبناء المخالف.خليكوا معانا في التقرير ده عشان تعرفوا كل التفاصيل:
الرئيس عبد الفتاح السيسي اتكلم خلال افتتاحه عددا من المشروعات القومية في يوليو 2020، عن قرار وقف تراخيص البناء وبيقول إن ده في مصلحة المواطن، ووجه رسايل مهمة جدا في الفيديو ده للمصريين.
وطبعا الرسايل دي هي اللي اتبنى عليها قانون التصالح على مخالفات البناء الجديد واللي بيتناقش الفترة دي في مجلس النواب.
وقال الرئيس بالنص:” الكلام ده أمن قومي، إيقاف الرخص الهدف منه ماكنش ضد مصلحة الناس، إحنا قاعدين ننتقد الزحمة، ولما نيجي ناخد إجراء، يقولك مصالح الناس، بقول للناس (ده حقك محدش يغتصب أرضك وأنت قاعد تتفرج)».
ولما اتكلم عن وقف تصاريح البناء قال «الأمر ده مش هيحصل، وحجم المخاطر بتاعة المخالف خطيرة على الدولة المصرية، واحنا بنتحرك بكل أجهزة الدولة.. المحافظات والوزارات وأجهزة الأمن، ومش هنتردد أبدا عن وقف هذه الظاهرة، الدولة تتعامل مع الأمور بشكل دولة منضبطة وملتزمة وفق إجراءات محددة».
وقال بالنص “أنا بقول الكلام ده للتأكيد على ما قاله رئيس الوزراء الدكتور مصطفى مدبولي، يوجد أماكن في القاهرة لن يصدر لها ترخيص تاني مرة أخرى، وحتى الأماكن التي سيصدر لها ترخيص؛ لو كانت الاشتراطات الخاصة بالمباني كانت بتقول 7 أدوار هتبقي دورين بس”.
قال كمان بالنص “إن القرار ده متأخر 20 سنة .. أنا بحلف بالله العظيم، ما كنش حد أبدا طلع ترخيص أكثر من 3 أو 4 أدوار طوال الـ 20 – 30 سنة الماضية ، والجراجات بندي أصحابها رخصة تطلع بجراج وبعد ما تطلع العمارة وتسكن الجراج مش مستخدم، الكلام ده مش هيحصل تاني”.
“ده كمان اتكلم بحسم عن موضوع الجراجات وقال :الجراج اللي مش هيشتغل هناخده وهنطلع قرارات نزع ملكية لكل الجراجات غير المستخدمة، ناخدها ونديها لناس تشغلها عشان تستوعب العربيات على الأقل في الوضع اللي احنا فيه”.
“قال كمان إحنا لما جينا نعمل مدن جديدة والناس كلها قولتلك أنت هتعمل مشروع يتكلف المليارات طب أنا بدفع 50 مليار جنيه عشان أحسن القاهرة كل سنة.
واختتم كلامه وقال:” الرسالة اللي ممكن نقولها، خلى بالك لازم الدولة تفكر وكمان شعبها يحترم فكرها ويدعمه، ميقولش حد انتوا بتعملوا الكلام ده ليه”
وقال إيقاف الرخص الهدف منها مكنش أبدا ضد الناس .. طيب محدش توقف وقال الزحمة دي هنعمل فيها ايه؟ ، ولا احنا قاعدين ننتقد الزحمة وننتقد أن الدولة مش عارفة تعمل حاجة، ولما نيجي ناخذ إجراء الناس تقولك أيه طيب مصالح الناس”.
ولو بتسأل عن موقف قانون التصالح على مخالفات البناء فبيتوقع أغلبية أعضاء مجلس النواب انتهاء المجلس برئاسة المستشار الدكتور حنفي جبالي، من القانون الجديد بشأن التصالح في مخالفات البناء خلال الفصل التشريعي الحالي.
وطبعا ومن المقرر بعد الموافقة النهائية على القانون إصدار اللائحة التنفيذية لـ قانون التصالح الجديد، ودخوله حيز التنفيذ علطول
ولو انت مستهون بكمية المخالفات اللي تمت ف احب أقولك ان وزير التنمية المحلية أعلن ان عدد الطلبات اللي اتقدمت لحد دلوقتي 2,8 مليون طلب منهم 1,6 مليون طلب فى الريف ؛ 1,2 مليون طلب فى الحضر، ووصلت المتحصلات حوالي 20 مليار جنيه .
دلوقتي قولنا رأيك في تصريحات الرئيس عبد الفتاح السيسي وهل شايف إن وقف رخص البناء قرار كان لازم الدولة تاخده فعلا من بدري؟
