الحقيقة السعودية شكلها بتحب المصريين جدا، قدمت تسهيلات جديدة لنا وللمسلمين عموما في كل مكان أنهم يعملوا عمرة شهر رمضان المبارك، التسهيلات دى هتوفر عليك مصاريف مكاتب شركة السياحة و الازى منه، اللى بتاخد فلوس من الناس في كلام فاضى، دلوقتى السعودية سهلت الدنيا على الأخر للمصريين اللى عايزين يعملوا عمرة.
إيه الإجراء العاجل اللى اخدته السعودية عشان تساعد المصريين يعملوا عمرة؟ وازاى ده هيوفر مصاريف كتير على المصريين؟ .. كل ده وأكتر هنعرفه مع بعض في الفيديو ده.
مين فينا مش حابب يعمل عمره، وخصوصا في شهر رمضان المبارك، تخيل وانت صايم تكون واقف قدام الكعبة وبتصلى في الحرم المكي، وكمان بتفطر على مايه زمزم، يعنى حلاوة ما بعدها حلاوه، ترجع من هناك نضيف، خالي من الذنوب، باذن الله.
علشان وعشان السعودية عارفه أن العمرة حلم كل المسلمين المصريين، فا هي عملت من شويه إجراءات الغرض منها أنها تسهل الدنيا شويه على المصريين عشان يعملوا العمرة، بكل الطرق شايفة ان من حق الشعب المصرى كله أنه يعمل عمرة، لأنه شعب طيب وبيحب السعودية، وبالتأكيد لازم السعودية تقف مع الشعب ده وتقدم ليه لو جزء صغير تعبر عن اعتزازها بالشعب المصرى.
المهم الإجراءات العاجلة اللى أعلنتها السعودية للشعب المصري بخصوص السعودية، أعلنت عنها بالتحديد وزارة الحج والعمرة السعودية، لأنها هي المسؤولة عن الكلام ده هناك، وهى اللى قالت أن إتاحة تصاريح عمرة شهر رمضان المبارك اللى جاى عام 1444 هجريا، ده ممكن المصريين يقدموا فيها عن طريقين، وكل واحد وراحته بقى، الاسهل ليه يعمله.
أول يمكن للمصريين الموجودين في السعودية أو اللى في مصر لسه وعايزين يروحوا يعملوا عمرة، أنهم يقدموا من خلال تطبيق “نسك”، وده عشان يعرفوا مواعيد العمرة المتاحة في رمضان، وده على حسب الطاقة الاستيعابية هناك، وعشان تقدم فا أنت محتاج أنك تنزل على موبايلك أو موبايل حد من أهلك تطبيق “نُسُك” ويمكن تحميله بسهولة من خلال متجر جوجل بلاى اللى هوا موجود على موبايل، وبعدها بقى يختار كل واحد اللى يناسبه من مواعيد، وبعد ماتختار الميعاد، تضغط على استخراج التصريح.
وبكده تبقى السعودية سهلت على المصريين عمل عمرة رمضان على الاخر، يعنى بدل ما كنت تروح لمكتب سياحة وياخد من وراك سمسرة شيء وشويات، دلوقتى لو انت عملت الاجراءات اللى قالتها السعودية دى، فا انت تقدر بسهوله خالص تطلع عمرة رمضان وتوفر على نفسك المصاريف، بس فيه شرط وحيد أكدت عليه السعودية في الموضوع ده أن التصريح للقادمين من الخارج السعودية لازمة وجود تأشيرة فعالة وقت إنشاء الحجز.
الطريقة التانية اللى أعلنت عنها السعودية، هي عن طريق تطبيق تانى بردوا اسمه “توكلنا” وده بيتم التأكيد عليك فيه ان الصحه عال العال وقت التقديم، وأنك مش عندك كورونا ولا أي حاجه من الحاجات دى، ما هما مش عايزين حد يتعدى هناك ولا يحصل مشاكل.
وفى النهاية طلبت وزارة الحج والعمرة السعودية من الراغبين في تأدية العمرة في رمضان على المبادرة باستخراج التصاريح والالتزام بالموعد المحدد فيه؛ عشان يكون فيه نظام أكتر وتكون الطاقة الاستيعابية مظبوطه، وعشان يقللوا الزحام هناك على قد ما يقدروا خلال شهر رمضان المبارك.
لحد هنا نكون وصلنا لنهاية الفيديو، ونكون شرحنا بالظبط الخطوات اللى أعلنت عنها وزارة الحج والعمرة للمصريين اللى عايزين يعملوا عمرة شهر رمضان المبارك، ولو عايزين نعمل فيديو تانى نوضح فيه أكتر الخطوات، ونعملها بالصوت والصوره قدامكم، اكتبوا لينا في التعليقات.
