بعد تحرير سعر الصرف وارتفاع سعر الدولار لارقام قياسية لم يصل إليها من قبل، فإنه يلجأ البعض إلى استثمار أمواله في الشهادات بالبنوك للحصول على سعر فائدة مرتفع، لذلك فإننا سوف نوضح أفضل البنوك التي تمنح شهادات ذات فائدة مرتفعه من خلال التقرير التالي:
بعد اعتماد البنك المركزي لسعر صرف مرن للجنيه ورفع الفايده بنسبه 2%، البنوك الحكوميه وفي رد فعل سريع طلعت 3 شهادات بأعلى سعر فائدة في مصر: 17.25% وخلينا كده واحدة واحدة وبالتفصيل نعرف مع بعض ايه حكاية الشهادات الجديدة.
ونبدأ بالبنك الاهلي اكبر بنك حكومي في مصر، واللي زود سعر الفايدة على الشهادة البلاتينية لمدة 3 ونزلها ب4 اختيارات.
- الاول شهاده بلاتينيه بسعر فايدة 17.25%، بشرط صرف العائد سنويا.
- والاختيار التاني، سعر فايدة 16.5% سنويا مع عائد نصف سنوي.
- والاختيار التالت: سعر فايدة 16.25% سنويا مع عائد ربع سنوي
- والاختيار الرابع : سعر فايدة 26% سنويا مع عائد شهري.
أما بقى بنك مصر، فنفس الشهادة موجودة فيه بنفس المواصفات تقريبا تحت اسم شهاده القمة،
يعني العائد عليها 17.25% لو هتصرفه كل سنة، أو 16.25% لو هتصرفه كل 3 شهور، واخيرا 16% لو هتصرفه كل شهر.
وتقدر تشتري الشهادة من أي فرع من فروع البنك بعدد 800 فرع منتشرة في كل أنحاء الجمهورية، أو من خلال تطبيق الموبايل البنكي BM Online، و400 ماكينة صراف الآلي.
واخيرا بقى الدور على بنك القاهرة ، واللي طرح شهادة البريمو جولد بالجنيه، وبرضه لو العائد شهري الفايدة هتبقى :16 %، أو ربع سنوي بفايدة 16.25%
أو سنوي:17.25%.
ومن البيانات الرسميه للبنوك التلاتة، الشهاده تقدر تشتريها بدايه من 1,000 جنيه ومضاعفاتها، والعائد عليها ثابت طول فتره سريانها.
كمان تقدر تقترض بضمانها، بس خلي بالك زيها زي أي شهاده ادخار تانية، ما تقدرش تكسرها قبل مرور ست شهور على تاريخ الشراء، ولو كسرتها قبل 3 سنوات هتدفع حاجة اسمها عموله كسر، قيمتها بتتخصم من أرباحك.
و بيزيد البنك الاهلي عن بنك مصر وبنك القاهرة في طرح الشهادة بعائد نصف سنوي 16.5%.
وفي النهايه عاوزين نعرف رايكم هل بتفكروا في شراء الشهاده الجديدة؟ ولو معكم مبلغ اصلا بالدولار تفضلوا تشتروا به شهادات دولارية، ولا تحولوه للجنيه وتشتروا الشهادة بفائده 17.25% ؟
طيب فكرتوا تبعدوا عن الشهادات خالص وتشتروا دهب؟ شاركونا برايكم في التعليقات وقولوا لنا توقعاتكم الفتره الجايه لسعر الدولار.
