إذا كنت تفكر في السفر إلى السعودية وتشعر بالقلق بشأن الإجراءات اللازمة، فإن السفر أصبح غاية في السهولة حيث أنه بإمكانك الآن الحصول على تأشيرة الدخول إلى السعودية بكل سهولة.
وده بعد ما أعلنت وزارة الخارجية السعودية عن التأشيرة الالكترونية الجديدة واللي سهلت دخول المملكة بشكل كبير، وده معناه إنك هتقدر تاخد التأشيرة بتاعت الزيارة أو العمل أو الإقامة بشكل الكتروني وفـ 3 أيام بس!
طيب ياترى تكلفة التأشيرة الإلكترونية دي كام وإزاي ممكن تقدم بنفسك عليها وهل ليها شروط معينه؟ فـ خليك معانا في الفيديو ده واحنا نقولك كل التفاصيل:
السعودية فاجأت الكل وأعلنت عن خدمة التأشيرة الإلكترونية واللي هتكون كمرحلة أولى لـ 7 دول من بيهم مصر،وحسب كلام الخارجية السعودية فـ الخدمة الجديدة دي هتلغي لاصق التأشيرة اللي كان موجود على جواز السفر وده لأنها هتتحول لتأشيرة إلكترونية واللي بيتم قراءة بياناتها من خلال رمز الإستجابة السريع الـ QR.
وبكده لو انت حبيت تزور المملكة العربية السعودية سواء بقا بغرض السياحة أو الزيارة العائلية أو حتى كنت من ضمن العمالة الوافدة هتقدر تدخل بكل سهولة.
وبتعتبر التأشيرة الإلكترونية دي جزء من مبادرة الحكومة السعودية واللي بتستهدف بيها تطوير القطاع السياحي وتسهيل اجراءات الدخول للملكة لكل اللي حابين يزوروها.
مش بس كده ده انت لو حصلت على التأشيرة دي هتقدر تكون في المملكة بشكل قانوني ولمدة 90 يوم، دي كمان صالحة للاستخدام لمدة سنة من تاريخ إصدارها .
إجراءات الحصول على التأشيرة
بص ياسيدي أولا لازم تعرف إنك تقدر بنفسك تقدم على التأشيرة دي وده عن طريق موقع وزارة الخارجية السعودية هتدخل على “منصة التأشيرات” وبعدها هتختار خانة تأشيرة الالكترونية.
وطبعا هتكتب بياناتك الشخصية الخاصة بيك وهتكتب كل البيانات والمعلومات التانيه المطلوبة منك، مش بس كده انت كمان لازم تقدم كل المستندات المطلوبة على موقع الوزارة زي جواز السفر والصورة الشخصية، وبعد الخطوة دي هتستنى لمدة ما بين يوم لـ 3 ايام عشان تاخد التأشيرة الالكترونية.
وطبعا الوقت ده الوزارة بتاخده عشان تعمل إجراءاتها وتحرياتها وتتأكد من صحة المستندات اللي مقدمها الشخص اللي طالب الحصول على التأشيرة،والجميل إن الموقع بيسهل عليك دفع رسوم التأشيرة الإلكترونية.
سعر التأشيرة الإلكترونية
أما بقا سعر التأشيرة الإلكترونية فـ في وسائل إعلام سعودية أكدت إنها بـ 535 ريال سعودي وإنها هتكون متاحة لكل المسافرين من قائمة مجهزها المملكة العربية السعودية لـ 49 دولة تقدر تدخل السعودية عن طريق التأشيرة الإلكترونية.
ولو بتسأل عن الـ 7 دول اللي مفترض هيكونوا مرحلة أولى لتفعيل التأشيرة الإلكترونية فهما مصر والإمارات والهند وجمهورية بنجلاديش الشعبية والهند وإندونيسيا والفلبين.
شروط التأشيرة الإلكترونية
فلازم أولا ميقلش عمرك عن 18 سنة، وفي حالة الأطفال اللي أقل من 18 سنة فلازم مرافقة شخص بالغ معاهم كولي أمر، ولازم كمان متقلش مدة صلاحية الجواز عن 5 شهور من وقت دخول السعودية، وميكونش الشخص محتاج يرجع لـ كفيل عشان يقدم على التأشيرة دي
دلوقتي قولنا رأيك في التأشيرة الجديدة اللي أطلقتها المملكة العربية السعودية ؟
