تفاصيل حبس مرتضى منصور من جديد

مرتضى منصور يعيش أحداث ساخنة، كل يوم والثاني تطلع عليه قضيه جديده، قبل ذلك أخذ  في قضية شهر حبس، واليوم تم الإعلان عن 6 قضايا مرة ضد المستشار.

إيه اللى هيحصل مع المستشار.. هل هيتحبس ولا لأ؟.. طيب ليه هيسيب نادي الزمالك؟ .. كل ده وأكتر هنعرفه مع بعض في التقرير التالي:

مشاكل من العيار التقيل واقع فيها المستشار مرتضى منصور ليها علاقة بشخصه ونادي الزمالك، الأمر وصل فيها لحد القضاء، الساعات اللي فاتت بس تم الإعلان أن المستشار مرتضى منصور مرفوع عليه 6 قضايا وهوا حاول يطعن عليهم ويفلت منهم، وياعالم هيفلت منهم ولا لأ.

لأن زي ما عرفنا من المواقع الإخبارية المختلفة فا جلسة الطعن على القضايا دي هتكون يوم 26 يونيو المقبل، وقتها هنعرف أن كان هيتحبس ولا لأ، وفيه احتمال أنها ترسى على غرامة في الآخر بدل الحبس، على العموم كلها أيام ونعرف أن كان هيتحبس ولا إيه.

الفكره أن الموضوع مش واقف مع المستشار مرتضى منصور على كده وبس، ده فيه مشاكل تانية ليه مع وزيرالرياضة أشرف صبحى اللى طلع قرار من الوزاره ان بعزل المستشار مرتضى منصور من منصبه كرئيس لنادي الزمالك، وزيد على كده أنه عايز أعضاء مجلس إدارة نادى الزمالك يعملوا انتخابات جديدة للنادي ويتم في الانتخابات دي اختيار رئيس جديد للنادي.

يعني ببساطه خالص مشى مرتضى من النادى وهجيب أى حد مكانه، مين بقي اللى هيجي ؟ ، ده مافيش عنه معلومة أكيدة لسه بس فيه تلميحات هتفهموها من تصريحات المستشار مرتضى اللى هنقولها دى.

المستشار مرتضى منصور طلع من يومين وعمل مؤتمر صحفي قلب فيه الدنيا، لمح مين هيجي مكانه رئيس لنادي الزمالك، وقال بكل وضوح أن بعد الترتيبات اللى بتحصل ضده دي فهو هيمشى من نفسه من نادي الزمالك ومش هو لوحده، ده هيمشى معاه أمير مرتضى معتذرا عن الإشراف على فريق الكرة، ومعاهم أحمد مرتضى معتذرا عن الإشراف على ألعاب الصالات، لخص كلامه كله في جملة لما قال: “سنترك النادي ونرحل”.

دلوقتي يجي الدور أن نشوف مين اللى المستشار مرتضى منصور لمح أنه يجي مكانه في رئاسة نادي الزمالك، المستشار مرتضى منصور قال وسط المؤتمر ووجه كلامه يعني لوزير الشباب والرياضة، قاله: يا سيادة الوزير انا هسيب النادي، بس اعرف ان سليمان وهدان عضويته سقطت من نادى الزمالك لأنه غاب ثلاث جلسات وراء بعض.

وأكد المستشار على الجمله دي أكتر من مرة، وده اللى فهمه الجمهور أنه بيلمح أن سليمان وهدان هوا اللى الوزارة عايزاه يكون رئيس لنادى الزمالك بعد ما المستشار مرتضى منصور ما يمشى من رئاسة نادي الزمالك هو وأولاده أحمد وأمير.

لحد هنا ونكون وصلنا لنهايه حكايه المستشار مرتضى منصور وأولاده في نادي الزمالك، وكمان قصه أنه ممكن يتحبس خلال الفترة القادمة بسبب الـ 6 قضايا اللى عليه .. تفتكروا المستشار هيتحبس فعلا ولا لأ ؟ .. اكتبوا رأيكم في التعليقات.