نشرت صحيفة القبس الكويتية على لسان مسئولين في الحكومة بأنه تم إصدار قرار بمنع دخول العمالة المصرية إلى الكويت. ذلك القرار الذي تسبب في صدمة لمصريين كثيرين كانوا يحلموا بالسفر هناك أو مصريين عايشين هناك ولا يعرفون كيف سيكون الأمر بعد ذلك.
لكن علاء سليم رئيس الجالية المصرية بالكويت وأمين عام اتحاد المصريين في الكويت كشف عن مفاجأة صادمة حول قرار المنع؟ ما الذي حدث؟ وما أحوال المصريين هناك؟ وهل انتهى سفر المصريين للكويت؟تفاصيل كثيرة نكشفها في التقرير التالي.
من وقت ما أعلنت صحيفة القبس الكويتية عن لسان مصادر في الحكومة الكويتية عن أنه تم إصدار قرار بمنع دخول العمالة المصرية للكويت بعد وقف اتفاقية التعاون بين وزارة القوى العاملة في مصر وبين هيئة القوى العاملة في الكويت.. مش بس كده لكن كمان تم إصدار بإيقاف جميع إصدار أذونات العمل للعمالة اللي جاية من مصر، والخبر عمل حالة كبيرة من الجدل بين المصريين اللي كانوا هيسافروا هناك.
صحيفة القبس الكويتية اللي قالت أن القرار جاء بتوجيهات من النائب الأول لرئيس مجلس الوزراء ووزير الداخلية الكويتي الشيخ طلال الخالد وهو اللي قرر وقف اتفاقية التعاون بين القوى العاملة في مصر والكويت بسبب أن الحكومة هناك عايزة تحط آلية جديدة لضبط الاستقدام من مصر، وشايفة أن السفارة المصرية بتخالف القوانين الكويتية المنظمة لسوق العمل في البلد، لكن في نفس الوقت في أخبار تانية طالعة من بعض المسئولين في مصر بتقول غير كده وأن مفيش قرار زي كده وسفر المصريين شغال عادي.
كل الجدل ده خلى علاء سليم رئيس الجالية المصرية بالكويت وأمين عام اتحاد المصريين في الكويت يخرج ويعلق على قرار منع العمالة المصرية من الدخول إلى الكويت وهل ده حقيقي ولا لاء وإيه الأوضاع هناك.
رئيس الجالية المصرية بالكويت كشف عن مفاجاة صادمة أن القرار تم تطبيقه بالفعل ومش من دلوقتي لكن من فترة طويلة وبالتحديد من 17 سبتمبر الماضي والمسئولين في الكويت وقفوا إصدار تصاريح العمل لكتير من الوظائف للعمالة المصرية عشان كده في وظائف كتير تم منعها او مفيش سفر فيها للمصريين.. مش بس كده لكن كمان في تكويت لوظائف كتير وبالتالي مش هيكون للمصريين أي مجال في العمل فيها لا دلوقتي ولا في المستقبل.
علاء سليم قال في تصريحاته، أن التصريحات اللي نقلتها صحيفة القبس حقيقة ولكن لغاية دلوقتي مفيش توضيح كامل للأمور وهل كل العمالة المصرية ممنوعة من دخول الكويت ولا هيكون في وظائف متاحة ووظائف ممنوعة.. لكنه كمل وقال إن لغاية دلوقتي السفارة الكويتية في مصر مش أصدرت أي بيانات ولا صرحت بشئ عشان كده مفيش توضيح للقرار عشان نعرف هيتفعل مع مين ولا مين لاء.
مش بس كده لكن رئيس الجالية المصرية بالكويت قالت برضو إنه على الرغم من أن الرؤية مش واضحة في الوقت الحالي إلا أن أغلب المصريين اللي عايشين في الكويت عارفين أن القرارات دي حقيقية.. لكن السفارة المصرية هناك لم تتطرق للموضوع ولا تتكلم عنه.. وان حتى الأماكن الحكومية في الكويت بتشتغل بشكل طبيعي وحال المصريين هناك مش هيتأثر لأن القرار خاص بإصدار تصاريح للعمالة القادمة مش المقيمين.
في نفس الوقت مصدر مسئول بوزارة القوى العاملة قال إن الوزارة مش استلمت لغاية دلوقتي أي مستند أو إخطار رسمي من أي جهة في الكويت بمنع العمالة المصرية من الدخول إليها وأن وزارة الخارجية المصرية بتجري اتصالاتها في الوقت الحالي مع الجهات في الكويت لمعرفة حقيقة القرار من عدمه.
