هل تعرفوا المثل الذي يقول ضربني و بكى.. و سبقني و اشتكى، هذا هو أقرب وصف على ما يحدث بين مي العيدان و الفنان أحمد بدير.
وكل شوية تطلع حاجة جديدة بينهم .. و مي العيدان تفضل تكتب كلام على السوشيال ميديا .. و أحمد بدير مطنشها .. وهي سايقة فيها على الأخر .. بس كل ده ليه و السبب ايه تعالوا نتكلم مع بعض فيها شوية المشكلة الغريبة ديه .
الفنان أحمد بدير .. طبعا هو غني عن التعريف .. لكن لو اتكلمنا عن تاريخه .. فهنحتاج سلسلة فيديوهات .. اشتغل مع كل الفنانين سواء الصف الأول ” النجوم يعني ” .. ولا حتى الأدوار التانية .. و مع الشباب و نجح معاهم كلهم ..
سواء سينما ولا دراما و لا مسرح .. عرف يحفر اسمه بين النجوم .. يعني بالرغم من انه مقدمش بطولة مطلقة .. بس كل عمل هو قدمه يعتبر هو البطل فيه .. و نجح انه يخرج نفسه من قالب الفنان الكوميدي.. و قدم تراجيدي .. وبردو نجح فيه
وعلى مدار مشواره الفني الكبير ده .. محصلش منه مشكلة .. أو مسمعناش ان في خناقة بينه و بين فنان تاني .. ولا فنانة .. ولكن بقالنا أكتر من سنتين بنسمع و بنشوف القضية اللي شغالة بين الفنان أحمد بدير و الإعلامية مي العيدان .. طيب السبب ايه و ليه هحكي ليكوا
مي العيدان هي حاولت تكون ممثلة .. بس معرفتش و مكملتش فيه .. و قالت إن والدها اللي طلب منها الاعتزال .. مع انها مكانتش عملت حاجات كتير .. المهم قالت تشوف دنيتها في حتة تانية .. و درست صحافة في كلية الإعلام في الكويت .. و أخدت ورش كتابة سيناريو .
لكن المعروف عنها انها دائما بتهاجم الفنانين .. سواء بقى مصريين أو عرب .. يعني من فترة هاجمت الهام شاهين .. و قالتلها انها تحترم سنها وتحتشم.. وكان رد الهام شاهين وقتها ان مين ديه أنا معرفهاش .. و مالهاش تقولي أعمل ايه و معملش ايه … و مش هي و بس ده كمان أصالة و اللي اتمنت ليها الموت .. وده كان وقت حفلة أصالة هنا في مصر …
فالواضح كده انها بتحب تُنكش الناس علشان تثير الجدل .. و اللي هو أنا موجودة أهو يا جماعة .. لكن خلافها مع الفنان أحمد بدير كانت بدايته من عندها .. أما علقت على صورته مع بنته وقالت ” والله طلعت مُزة .. بنت الأقرع ” .. طبعا التعليق ده هاجمها ناس كتير بسببه .. ومش بس كده ..
بنت الفنان أحمد بدير كتبت بوست عندها على الفيسبوك وقالت ” أنا أبويا نجم كبير من نجوم الوطن العربي …ومحدش هيسمح لك تتكلمي عليه نص كلمة أبويا اللي حضرتك بتغلطي فيه ده … علمني أرفض السخرية بجميع أشكالها … أنا أبويا زى القمر…ورأيك بعد إذنك احتفظي بيه لنفسك بعد كده”.
و بعدها رفع بدير قضية سب وقذف ضد مي العيدان .. في الأول اتحكم ليها بالبراءة .. لكن حصل نقض و اتلغت البراءة .. واتحكم عليها بغرامة ٥٠٠ دينار .. و من بعد الحكم ده كتبت انها بتحترم القضاء بس مش هتدفع ليه اي حاجة ..
و كملت كلامها و قالت ان القانون ليحاسب على السب و القذف .. و نسب شئ مش موجود فيك .. بس إنا فعلا أقرع .. و كتير كنت بتضحك الناس عليها ..
وفي شهر رمضان اللي فات .. الفنان أحمد بدير كان في برنامج العرافة .. و قال أنا مش عاوز منها حاجة .. بس هي تسكت شوية .. والموضوع منتهي .. و ردت العيدان على جزء الفيديو ده ” أنا كمان مسمحاك و رمضان كريم “..
لكن فوجئنا من يومين إن مي العيدان بتهاجم أحمد بدير .. و كتبت بوست عندها و قالت ” اتفضلوا أهو هو ده أحمد بدير اللي قال انه سامحني في رمضان .. رافع قضية عاوز التعويض … و اتهمته انه عاوز يطلع بمصلحة انه ياخد فلوس .. و كمان يكون موجود في السوشيال ميديا .. ولسه القضية شغالة و لسه هنشوف هيحصل ايه.
