خناقة كبيرة حدثت بين واحد سعودي وواحد باكستاني على أرض المملكه العربيه السعوديه، لو كانت استمرت دقيقة واحدة بس كان أكيد واحد هيفقد حياته فيها، لكن ستر ربنا كان موجود مصريين فضوها.
إيه سبب الخناقه بين السعودي والباكستاني ؟ وايه اللى عملته الشرطه مع المصريين اللى فضوا الخناقه ؟ .. كل ده وأكتر هنعرفه مع بعض في التقرير التالي.
خلال الكام ساعه اللى فاتوا كان فيه خناقه كبيرة قوي في المملكه العربيه السعوديه وبالتحديد في مدينة الرياض بين واحد سعودي وواحد باكستاني معاه مجموعه من أصحابه بتوع كمال الاجسام.
زي ما شفتم في أول الفيديو كده، الباكستاني اتحرك من مكانه وراح على السعودي وقام مناولة بالبوكس وعلى طول السعودي طب واقع في مكانه، وكان رايح يكمل عليه الباكستاني بس لحقه مجموعة من الشباب المصريين تصادف حظهم أنهم كانوا موجودين هناك فى المنطقة نازلين السوبر ماركت يجيبوا طلبات الأسبوع، ده على حسب ما بيتقال على السوشيال ميديا.
المهم الشباب المصري ده وعلى حسب الكلام المتداول أول ماشافوا الخناقه طلعوا عليهم جرى، يفضوا الخناقه بدرى بدرى، بس للأسف على ماراحوا كان السعودي كان اخد بالبوكس، ووقع فى الأرض، بس بردوا انقذوه ماهوا كان رايح عليه الباكستاني يكمل خناقته وعايز يخلص عليه، وكان هيساعده في كده مجموعه من أصحابه بتوع كمال الاجسام، كانوا عايزين يتكاتروا على السعودي، بس لحقه المصريين.
أول ما الشباب المصري راح عند الخناقه، الكل جاب ورا، الجماعة الباكستانيين رجعوا مكانهم وحاولوا يهربوا بعض بالبوكس اللى اخده السعودي، بس طبعا وزى ما انتم عارفين علاقة الحب والاخوه ما بين المصريين والسعوديين خلتهم يمسكوهم قبل ما يهربوا ولحد ماجات الشرطه اخدت الكل وحققت معاهم.
ياترى ايه سبب الخناقة ؟
اتضح بعد تحقيقات الشرطة السعودية أن سبب الخناقة اصلا تافه جدا ومكنش يستاهل كل اللى حصل ده، طلع أن السبب في الأصل على خلاف بين أفضلية السير، مين يمشى قبل مين، شفتم التفاهة وصلت لحد فين.
المهم الشرطة حالياً أحالت الاتنين على النيابة هى اللى هتحدد مصيرهم إيه، مين فيهم اللى غلطان فى الأول عشان ياخد عقابه، بس ده طبعاً بعد ماتطمن على حال المواطن السعودي اللي كان واخد بالبوكس في وشه، وتشوف هو أموره مستقرة دلوقتي ولا لا.
وفى نفس الوقت وعلى حسب ما بيتقال، أوصت الشرطة السعودية بتكريم الشباب المصري الجدع اللى لولا هما فى الآخر كان ممكن تحصل كارثه والسعودي ده يروح فيها، بس موضحتش التكريم ده هيكون فلوس ولا فرصه شغل ولا حتى مجرد درع كدا ولا ايه بالظبط.
وعشان كده طلع عدد كبير من السعوديين على السوشيال ميديا يطالبوا أن تكريم الشباب المصري يكون كبير وقد المقام، عربية بمليون جنيه مثلا لكل واحد منهم، أو حتى شيك بنكى يصرفوه وقت ما يحبوا، وفيه كمان اللى طلع وطالب أهل الشاب نفسه اللى انقذوه، وقالوا انه بنفسه لازم يعمل تكريم للشباب المصرى، ما لولا هما ماكنش فضل عايش لحد دلوقتى.
الغريب واللافت بقى أن الشباب المصري رفض أصلاً كل الهدايا والكلام عن الهدايا اللى كانت بتتقال، وقالوا إنهم عملوا كده عشان الأصل الطيب والجدعنه اللى فيهم مش عشان خاطر فلوس ولا حاجه.
انتم بقى شايفين إيه ؟ هما عملوا كده عشان اصلهم الطيب بس ولا طمع فى فلوس ولا حاجه ؟ .
