الدنيا مقلوبة على صفحات الزملكاوية على فيس بوك، بعد ما فعله لاعب النادى إسلام جابر، والحكم الذى صدر من المحكمة ضده الزملكاوية لانهم يروا أن اللاعب وضع صورة النادى في الحضيض بعد قضية زواجه العرفى، وهروبه من نسب أبنه.
تقريبا كده والله أعلم كل من هو قريب من نادى الزمالك بيلازمه سوء حظ فظيع، الله يسترها على جماهيره، المرة دى سوء الحظ كان من نصيب لاعب نادى الزمالك السابق، إسلام جابر، واللى حكمت عليه المحكمة سنة مع الشغل والنفاذ وإلزامه بمصاريف القضية اللى كانت مرفوعة ضده من واحدة بتقول أنها حبيبته واتجوزوا من فتره بعقد عرفى، بس هو دلوقتى بينكر علاقته بيها وبأبنها اللى في بطنها.
ليه إسلام جابر بينكر زواجه منها، وضح محامي السيدة أن نفى اللاعب زواجه العرفي من السيدة وأنه لما قال قبل كده انه زواجها من إشاعة عشان من ناس عشان يضروا أسم نادى الزمالك وقت ما كان بيحصل على بطولات، الكلام ده مش صح، إسلام اتجوزها وأنكر جوازها لما قالتله إنها حامل بعد شهرين من علاقتهم.
نيجى للسؤال المهم، مين الست دى ؟، لحد دلوقتى مافيش تقرير صحفى واحد جاب أسم الست، كل اللى نعرفه عنها لحد دلوقتى عن طريق المحامى بتاعها، واللى قال أنها الزوجة الثانية للاعب بعقد عرفى، وهي مطلقه قبل كده، وما عندهاش أي أطفال.
واتعرفت على إسلام جابر عن طريق أحد اصدقائهم وحبها من أول نظرة، ولما حصل كده طلب منها الزواج بعقد عرفي أول السنه اللى فاتت، وأجر ليها شقة في منطقة الهرم، وكل شويه كان بيروح ليها، وغابوا فترة الدنيا تمام لحد ما قلتله إنها حامل، وقتها فص ملح وداب، سرق عقد الجواز العرفي، ونكر علاقته بيها وقتى.
طيب ليه اللاعب سرق عقد الزواج ؟
محامى الست قال أن الأمر مايشغلهمش، هوا بس كان بيحاول يهرب من علاقته بيها، بس هما معاهم إثباتات تانية على إسلام جابر منها صور من كاميرات المراقبة في الأماكن اللي كان بيروح معاها فيها، وكمان تسجيلات لمكالمات بينهم، وفيها تفاصيل كثيرة، وحكاوي تخص الاتنين بس، بس لو لزم الأمر هيتم نشرها على العلن.
وكمان معاهم دليل مهم قوى وهوا مربط الفرس في القصة، وهو الطفل أو الجنين اللى في بطنها، واكيد لما يعملوا تحليل D.N.A التحليل هيثبت فيه أن اللى في بطنها أبنه وهو أبوه.
ولما الناس سألت المحامى، ليه ياعم المحامى معملتوش التحليل ده لحد دلوقتى، قالك عشان خايفين على الجنين اللى في بطن السيدة، لأن لو اتعمل التحليل دلوقتى وقت فترة الحمل ده هيأثر عليها وعلى الجنين، هما مأجلين الموضوع ده لحد بعد الولادة.
