الأيام الماضية السوشيال ميديا كلها كانت تتحدث عن زيادة جديدة في المعاشات، وأنه صسيتم صرف هذه الزيادة لملايين المصريين.
تفتكروا الكلام ده حقيقي ولا لاء؟ وأيه قيمة الزيادة الجديدة ومين الفئات اللي تستحقها؟ وامتى الحكومة هتطبقا؟ كل ده وأكتر هتعرف إجابته معنا في التقرير التالي:
معاشات شهر مارس
بعد كام يوم وتحديدا أول شهر مارس.. الهيئة القومية للمعاشات هتبتدي تصرف معاش شهر مارس لسنة 2023 لكل المستحقين على مستوى الجمهورية واللي بيوصل عددهم لحوالي 10 مليون و700 ألف شخص في مصر.
والمعاش بيتم صرفه في نفس أماكن الصرف المعتادة والمعلن عنها من الهيئة من غير أي تغيير.
زيادة المعاشات
والأيام اللي فاتت مواقع التواصل الاجتماعي ومواقع أخبار كتير.. نشروا معلومات وأخبار عن أن الحكومة هتصرف زيادة جديدة في المعاشات الشهر الجاي.
وطبعا أصحاب المعاشات مهتمين جدا يعرفوا حقيقة الموضوع وميعاد الصرف لأن زي ما أنتوا عارفين الزيادة بتفرق جدا في تحسين الدخل وبتساعد في مواجهة غلاء الأسعار اللي شايفينه.
حقيقة صادمة
في الحقيقة مفيش أي قرار صادر عن الحكومة بخصوص زيادة المعاشات في شهر مارس.. ولما بحثنا في الموضوع لقينا إن آخر زيادة مُعلنة كان أعلنها مجلس النواب بناء على توجيهات الرئيس السيسي.. وكانت حوالي 300 جنيه واتصرفت لجميع المستفيدين من المعاشات.
والزيادة دي كانت في شهر نوفمبر اللي فات.. بعد منحة صرفتها الدولة لأصحاب المعاشات اللي بياخدوا معاش أقل من 2500 جنيه.. وتم صرفها على بطاقات التموين.. والمنحة كانت ما بين 100 جنيه لحد 300 جنيه.
صرف مبكر للعلاوة
السنة اللي فاتت الحكومة قررت تصرف العلاوة الدورية للمعاشات قبل ميعادها بـ3 شهر.. وتم الصرف في شهر أبريل بدل ميعادها السنوي اللي بيكون في شهر يوليو.
والصرف المبكر وقتها كان بتوجيهات القيادة السياسية في البلد.. عشان الناس تقدر تواجه ارتفاع الأسعار اللي حصل بسبب اللي بيحصل ما بين روسيا وأوكرانيا.. ومن قبلها التضخم اللي حصل في العالم بسبب جائحة كورونا.
الموعد الحقيقي للزيادة
طبعا كلنا كان نفسنا يكون في زيادة الشهر ده.. بس الحقيقة مفيش أي زيادة استثنائية لحد دلوقتي.. وكل اللي منتشر ده إشاعات.. ومتصدقش أي حاجة تشوفها إلا لما تتأكد من المصادر الحكومية الرسمية.
وبالنسبة لزيادة المعاشات.. فوفقًا لقانون التأمينات الاجتماعية والمعاشات.. الزيادة هتكون بعد حوالي 4 شهور.. لأن القانون ينص على أن أصحاب المعاشات يتصرف لهم علاوة دورية كل سنة في أول شهر يوليو.. والقانون بيقول إن العلاوة الدورية دي متزيدش عن 15% من قيمة المعاش.
والحكومة هتصدر قانون بيحدد نسبة زيادة المعاشات لسنة 2023 وبعد كدا تحوله لمجلس النواب عشان يناقشه ويطلع قانون وقرار بخصوص النسبة وميعاد الصرف.
وآخر زيادة دورية في المعاشات كانت حوالي 13%.. وتم صرفها زي ما قولنالكم في شهر أبريل مش يوليو.. و دي كانت حاجة استثنائية لكن ميعادها الرسمي في يوليو.
