مفاجات جديدة تكشف عنها الحكومة بخصوص شروط الجواز الجديدة.سيكون فيه كشف عقلي شديد، المأذون لا يمكنه كتب الكتب من دونه، ولكن ماذا سيحدث إن كان أحد الطرفين لديه مشكلة؟ تابعونا من خلال التقرير التالي لمعرفةكافة التفاصيل ما يقدرش يكتب الكتاب غير بيه، طيب هيحصل ايه لو أحد في الطرفين طلع عنده مشكله.
يوم بعد يوم بيتم الكشف عن القانون الجديد اللى شغالة عليه الحكومة والبرلمان بخصوص قانون الأسرة، المرة دى طلعت مفاجأة جديدة، عايزين يكشفوا على اللى هيتجوز عقليا، مايعرفوش أن أصلا اللى بيتجوزا في الأغلب مش عاقلين، إحنا بنهزر طبعا ربنا ييسر للجميع.
المهم، الصحف النهاردة قالت إن اللى عايز يتجوز الحكومة بتفكر أنها تعمله كشف عقلى ونفسى، يعني يشوفوا أن هيتجوزوا دول مؤهلين نفسيا للجواز والعيشة يعنى، الراجل يقدر يتحمل مسؤلية البيت والست تقدر تحتوى بيتها وعيالها لما تخلف، ولا الأتنين هيمسكوا في بعض في الاخر.
القانون كمان بيوضح أن اللى عندة مشاكل بسيطة الحكومة هتحاول تعالجه وتديله دورات نفسية وإجتماعية، لحد مايكون تمام خالص والدنيا معاه فل، وبعد كده توافق ليه الجوازة.
طيب لو طلع حد من اللى عايزين يتجوزوا عنده مشاكل عقلية صعبة، والحكومة غلبت معاه دورات ومانفعش، كشوفات طبية ومانفعتش، علاج ومانفعتش، إيه هيكون العمل، اتضح أن الحكومة عاملة حسابها على دى كمان، هي هتقوم مبلغه الطرف الثاني في العلاقة بين الزوجين، وتقوله أن فيه مشاكل كذا وكذا عن الشريك، وانت بقى ليك حرية الاختيار يا أما تكمل معاه يا أما تفركش، كل واحد وراحته.
كل اللى على الحكومة في النقطة دى أنها توعيهم بس اللى ممكن يحصل، يعنى تلاقى الدكتور جى يقعد معاك ويحكيلك إيه اللى يتوقعه من الطرف التانى اللى عنده مشكلة ده، وممكن ولادكم لو خلفتوا ولا حاجه يكونوا مصابين بردوا ولا إيه.
هتقولى طيب إيه لازمتها بقى الكشف الطبي ده؟ ، طالما كل واحد حر في رأيه في الأخر، هقولك لا يامعلم، الحكومة عامله حسابها أن كل اللى هيتجوز هيعدى على الكشوفات دى، وها يخضع لدورات والعلاجات النفسية دى، وكل واحد مش هيتجوز غير لما ياخد الشهادة بتاعت الكشف الطبي، واللى منها كشف عقلى ونفسى، والمأذون مايقدرش يعمل عقد الزواج من غير شهادة الكشف الطبي دى، ولو عملها منه لحالة كده، المأذون ده هياخد عقوبة توصل للحبس سنة كاملة وغرامة مالية، وما نعتقدش ان فيه مأذون هيعمل كده.
طيب إيه الرسوم اللى هيدفعها اللى عايزين يتجوزوا؟
القانون بيقول أن كل واحد عايز يتجوز هيدفع رسم لا تجاوز قيمته الـ 500 جنيه، لا ممكن يقل كمان، مع العلم أن نتيجة التحاليل مش هياخدها اللى دافع الفلوس بس، لا ده هياخد نسخها منها الطرف التانى كمان، ماهو حقه بقى.
في النهاية حابين نعرف رأيكم إيه في القانون الجديد، والشغل الجديد اللى حابين يعملوه، تتوقعوا الناس هاتلتزم بيه ولا لا، وهل فعلا هيكون ليه أثر على الناس وأن اللى تتجوز تكون فعلا مطمنه على نفسها مع شريك حياتها، كل واحد يكتب رأيه في التعليقات، ونتفاعل مع بعض مع الرأي الصح.
