إلحق العرض واعمل عمرة ب4000 جنيه فقط..هذا ما قاله واحد من الدعاة على السوشيال ميديا لكي يروج لواحد من البرامج التي تتيح عمل عمرة بديلة مقابل مبلغ مالي، لكن طبعا الدنيا انقلبت على السوشيال ميديا بسبب ما حدث لدرحة انهم وجهوا اتهامات للداعية بالنصب.
لكن هو مين الداعية ده؟ وايه حكاية العمرة البديلة؟ وياترى هو رد على الهجوم ده بايه؟ واهل الدين قالوا ايه عن اللي بيحصل؟
الساعات الأخيرة الدنيا اتقلبت على مواقع التواصل الاجتماعي في لحظة، وده لأن داعية اسلامي معروف عمل حاجة غريبة جدا خلت الناس كلها تهاجمه وتتهمه بالتجارة في الدين
بس ياترى هو ايه اللي حصل؟
شوف يا سيدي، الداعية أمير منير، عمل جدل كبير خلال الساعات الاخيرة على مواقع التواصل الاجتماعي، وده لأنه نشر مقطع فيديو بيتكلم فيه عن تطبيق جديد اسمه عمرة البدل بيتيح أداء العمرة لأي فرد من أفراد اسرتك مقابل مبلغ 4000 جنيه
مش بس كده ده كمان شرح خطوات استخدام التطبيق ده اللي أولها انك تنزل التطبيق، وبعد كده بتسجل الاسم اللي انت عايز يتعمله عمرة، وبعدين بترسل رسالة صوتية بالاسم
ده كمان التطبيق بيخيرك بين العمرة عادية، أو عمرة في رمضان، أو عمرة سريعة في نفس اليوم، منير كمان وضح خلال الفيديو اللي نشره ازاي بيتم عمل عمرة لاخوك المتوفي، وقال أنه بالتطبيق ده ممكن تعمل عمرة عن حد عنده مشاكل صحية صعبة، أو حد عاجز مش قادر يروح يعمل عمرة حد متوفى
وفي الاخر قال أنه ثبت عن الرسول «صلى الله عليه وسلم» جواز الوكالة بالعمرة، وأنه مش لازم اللي بيعمل العمرة يكون قريب من المتوفى أو العاجز.
وكمل كلامه وقال ” انا قدرت أجيبلكم خصم AM35، وده تقدر تاخد خصم منه بنسبة 35% لأول 500 هيطلبوا عُمرة بتطبيق عمرة البدل.
طبعا الفيديو ده بالكلام اللي قاله ممررش مرور الكرام ده قلب الدنيا وكتير من رواد مواقع التواصل هجموا منير، لدرجة أن واحد من المتابعين قاله مش ده تجارة في شعائر دينية؟»، وواحد تاني كان سخر من كلامه وقال يا تري هينزلوا انهم يصوموا عن الناس بالمرة؟
مش بس كده دول اتهموا بالتجارة بالدين، ومحاولة النصب على الناس، ولان جزء منهم كان شايف انه ممكن القيام بعمرة البدل خالصة لوجه الله، ومش بهدف التربح.
وطبعا امير منير مسكتش وطلع بعد ساعات من فيديو عمرو البدل عشان يرد على كل الاتهامات اللي اتوجهتله، وقال ان عمرة البدل مش حاجة مستحدثة دي حاجة شرعية.
وكمل وقال أن الجهة صاحبة الابلكيشن دي انا زورت مقرهم بنفسي واطمنت وربنا يجزيهم خير على كل اللي بيعملوه، وللناس اللي فاكرة أنه هيدخلي مبلغ من الابلكيشن ده انا مش هيدخلي ولا مليم، انا بس حبيت اساعد الناس اللي مش قادرة تعمل عمرة.
كل ده خلى الشيوخ تطلع وتتكلم عن موضوع عمرة البدل واللي كان بينهم الدكتور أحمد كريمة أستاذ الفقه المقارن والشريعة الإسلامية،اللي قال لموقع مصراوي، أن من الأفضل للإنسان أنه يروح هو بنفسه لأداء العمرة والحجز من غير ما شخص تاني يؤدي العمرة عنه.
وقال كمان كل الناس بقت مفتين على السوشيال ميديا، ومعظم فتواهم بتكون غلط، عشان كده على المسلمين أنهم يرجعوا لدار الإفتاء و أهل التخصص في الفقه الإسلامي والشريعة الإسلامية.
مش بس كده ده قال أن الأخوان المسلمين والسلفيين كانوا بيعتمدوا على التبرعات اللي كانت في المساجد بس تم منعها، عشان كده بقوا دلوقتي بيدوروا على طرق جديدة لجمع الأموال من الناس.
وحسب الدكتور عبد الغني هندي،عضو المجلس الأعلى للشؤون الإسلامية، أن اللي حصل ده بيفتح مجال للتجارة في الدين، وبعدين مينفعش نلحا لتطبيقات مجهولة ومحدش يعرف عنها حاجة.
وكمل كلامه وقال إن اللي بيحصل ده كلام فاضي ويعتبر محاولة للنصب على الناس.
ودلوقتي قولنا رايك في عمرة البدل؟
