بعد رحلة طويلة من التعب، رحلت عن عالمنا الفنانة شيرين الطحان.. وفي هذا التقرير سنكشف لكم أسرار كثيرة عن ما واجهته الفنانة خلال 7 سنين من مواجهة الكانسر بكل عزيمة لحد ما الأمر خرج عن السيطرة.
وعكة صحية كبيرة
بعد 30 يوم في المستشفى بسبب تعرضها لوعكة صحية كبيرة.. انتقلت الفنانة شيرين الطحان إلى جوار ربها.شيرين ودعتنا بعد رحلة كبيرة مع الكانسر.. رحلة استمرت من سنة 2016 لحد انهارده. وطول السنين دي شيرين أخفت عن الجميع إصابتها ومحاربتها للكانسر بكل قوة وعزم.
ورغم أنها كانت صامدة وقوية في مواجهة المرض.. لكن الفترة الأخيرة الأمور بقت أصعب واتنقلت لمستشفى متخصص في علاج الأورام.
إشاعات التبرعات
وطول الفترة اللي كانت محجوزة خلالها في المستشفى طلع إشاعات كتير إن أسرة شيرين الطحان خلصت كل فلوسهم ومحتاجين دعم عشان شيرين تكمل رحلة العلاج.
لكن أسرة الفنانة خرجت وقالت الكلام ده غير صحيح بالمرة.. وكل اللي بيلم تبرعات باسم شيرين الطحان هو عبارة عن نصاب وبيستغل حالتها الصحية.
المتحدة تتكفل بالعلاج
وعشان موضوع التبرعات يتقفل تماما.. نقابة المهن التمثيلية قالت إن الشركة المتحدة للخدمات الإعلامية وافقت على طلب النقابة وهتتكفل بكل تكاليف رحلة العلاج.
أما والدة الفنانة شيرين الطحان فقالت إن بنتها بتعاني من الكانسر من فترة كبيرة.. وكانت قدرت تتغلب عليه في فترة من الفترات.. لكن المعاناة رجعت من جديد في الأيام الأخيرة ورجعت أقوى من الأول بكتير.
وأكدت مرة تانية أن الأسرة مش محتاجة أي تبرعات لشيرين الطحان أو علاجها.. وأن رحلة العلاج بكل تكاليفها من 2016 لحد دلوقتي هما اللي كانوا بيدفعوها.
65 ألف شهريا
وقالت إنهم كانوا مخبيين موضوع مرضها عن الإعلام من سنة 2016 ومحدش يعرف غير القريبين من العيلة.. والموضوع اتعرف للجميع لما واحدة من أصدقائها قالت يا ريت ندعي لشيرين.
وقالت إن خلال الشهور اللي فاتت العيلة مأخدتش أي فلوس رغم أن مصاريف العلاج كانت بتوصل لحوالي 65 ألف جنيه في الشهر الواحد.
ولما دخلت المستشفى في الأيام اللي فاتت دفعوا 150 ألف جنيه.. يعني خلال السنين اللي فاتت إجمالي المصاريف كان أرقام خرافية.
مكالمة أشرف زكي
ده اللي أكدته والدة شيرين الطحان لما قالت إنهم دفعوا فلوس كتير في علاج بنتهم.. واتفاجئت بمكالمة الدكتور أشرف زكي لما قال لها إن الشركة المتحدة للإعلام هتتكفل بكل تكاليف رحلة العلاج.. وبالفعل وصل مندوب من الشركة ودفع كل تكاليف العلاج.
وخلال السنين اللي فاتت شيرين الطحان عملت اسم كبير في عالم الفن قبل ما ترحل عن دنيتنا.. واشتركت في أكتر من مسلسل أبرزهم “رمضان كريم” اللي كان بيتعرض في 2017، ده غير مشاركتها في مسلسلات “الوصايا السبع، ورقم مجهول، واسم مؤقت”.
