فى حياته كان من الممكن أن تتعاطف معه أو تكون ضده وتنسى كل الإسهامات التى قدمها على مدار مشواره كرجل أعمال، ولكن الكثير منا يعرف القضية التي إتهم فيها رجل الأعمال محمد الأمين الذى رحل عن عالمنا الساعات الماضية ، ولكن لا يعرفون من هو محمد الأمين؟ وكيف أصبح من أغنى رجال الأعمال فى مصر ،وكيف كانت قضيته الأخيرة السبب فى إنهيار مشواره ده،تفاصيل كثيرة عن أهم المحطات فى حياة محمد الأمين سنعرفها من خلال التقرير التالي:
الساعات اللى فاتت تصدر التريند رجل الأعمال محمد الأمين ،لكن تصدره للتريند مش علشان إنجاز له ولا قضية إتهم فيها ،لكن إتصدر التريند بسبب رحيله فى المستشفى ده ممكن نلاحظه عادى رحل فى مستشفى لكن الغريب إنه أيامه الأخيرة قبل المستشفى كان بيقضى عقوبته قى مركز وادى النطرون للإصلاح والتأهيل،ومن كام شهر إتنقل لمستشفى السلام وهنا كانت أخر لحظات حياته.
وده اللى أعلن عنه الإعلامى مصطفى بكرى على تويتر فى الساعات اللى فاتت.هتسألونى أيوة مين محمد الأمين ؟أنا هنا مخصوص علشان أجاوبك على السؤال ده.
إسمه محمد الأمين رجب أحمد رجل أعمال مصرى ومن أشهر رجال الأعمال على مستوى الوطن العربي،من مواليد الستينات،إتولد فى قرية الشيخ فى محافظة بنى سويف،إتخرج من كليه الهندسة جامعة الإسكندرية.
الأمين كان من متفوقين دفعته،وإتخرج بإمتياز مع مرتبة الشرف, هل ده مؤشر إنه يكون رجل أعمال ناجح؟ هنعرف دلوقتى.
الأكيد إن مفيش رجل أعمال بيبدأ رجل أعمال ،لكن بيمر بمراحل فى حياته علشان يوصل ويبقى محمد الأمين . بدايات محمد الأمين كانت فى شركة مقاولات متخصصة فى قواعد الحمامات وغيرها من المرافق،وعلى 2002 كده وبعد فترة شغل كبيرة قرر الأمين إنه يشتغل فى مصر وده كان من خلال شركة إستصلاح زراعى،حصل علي موافقتها من يوسف والى وزير الزراعة الأسبق.
ولإن رجل الأعمال بيستثمر فى مجالات كتير فكان من ضمن إستثماراته فى الإعلام ومن سنة 2011 بدأ الأمين رحلة إمتلاك القنوات الفضائية حوالى 14 قناة منها سي بي سي ،وبعد كد ه إمتلك قناة النهار،وإستحوذ على 85% من مجموعة قنوات مودرن.
بجانب الإعلام المرئى كان للأمين نصيف من الإعلام الورقى ،الأمين امتلك 3 صحف زى الوطن والفجر واليوم السابع،ولكن على سنة 2013 إنتشرت الأخبار عن بيع نصيبه من جريدة اليوم السابع،ومحاولته فى شراء بعض وسائل الإعلام زى قنوات بانوراما وموجه كوميدى.
الغريب إن كل النجاحات دى كانت نهايتها غير موفقة بالمرة،وشهد الرأى العام إنهيار مش للمؤسسات كمؤسسات لا إحنا شايفين المؤسسات موجودة ومنتجة ،لكن الإنهيار حصل لسمعة محمد الأمين ومشواره ولشخصه.
وده طبعا بعد إتهامه فى القضية الشهيرة،لما تلقت النيابة العامة فى ديسمبر 2021 بلاغ من المركز القومى للأمومة بعد ما إنتشر على صفحات السوشيال ميديا إن الأمين قام بالتعدى على فتيات مقيمات فى دار الأيتام بتاعته فى بنى سويف.
وبالتحقيقات تم إثبات حقيقة الإتهامات الموجهة للأمين،وإنه إستغل ضعف البنات وحاجتهم وسلطته عليهم لإرضاء شهواته،وهددهم كمان بطردهم من الدار لو بلغ عنهم.
أثناء التحريات والتحقيقات حاولت كتير من وسائل الإعلام تتواصل مع زوجته،ولكن وزيرة التضامن الإجتماعى نيفين القباح تواصلت معاها بعد إلقاء القبض على الأمين.
وصرحت الوزيرة فى مداخلة هاتفية إنها لما سألت زوجته عن الدارقالت إنهم بيرحوا يباتوا مع البنات كأسرة.
أما بالنسبة لثروة رجل الأعمال محمد الأمين حوالى 3 مليارات دولار بفعل حجم إستثمارات فى الإقتصاد والأعلام.
اللهم لا شماته طبعا ،سواء كنت معاه أو ضده ،مقتنع بحبسه أو لا ،فإنت مش فى إيديك حاجة إلا الدعاء له بالرحمة. رحم الله رجل الأعمال محمد الأمين.
