تأثرت سعر رحلات العمرة بارتفاع سعر الدولار، لذلك فإن شركات السياحة طلعت قرار جديد، والسؤال الآن هل فعلا وقفوا حجز العمرة؟ وهل الأسعار على النظام القديم أم ستزيد؟
تقريبا دلوقتي لو سألت على اي حاجة هيقولك معلش اصل الدولار زاد، عشان كده شركات السياحة الدينية دلوقتي خدت قرار جديد. ودلوقتي وبعد انخفاض قيمة الجنيه خلال يومين من 25 جنيه إلى 27 جنيه تقريبا، الشركات وقفت الحجز لعمرة شعبان رمضان.
وحسب أشرف شيحة، الخبير السياحي، مصر كلها دلوقتي بتحاول تتعامل مع الارتفاع المستمر في سعر الدولار، وخصوصا بقى شركات السياحة بما إن تعاملها كله بالعملة الصعبة. و ببساطة كده انت لو حجزت العمرة ب30 ألف مثلا، الشركة مش ضامنة سعر الدولار هيبقى كام لما تيجي تسافر.
عشان كده شركات السياحة بتفتح باب الحجز على الرحلات اول بأول يعني في أول الشهر أو اسبوع اسبوع وهكذا، كمان الشركة بتعاملك على اساس سعر الصرف وقت السداد مش وقت الحجز.
وحسب شيحة، العملاء متفهمين التغييرات في الأسعار مع تذبذب سعر الصرف في الشهور الأخيرة، لأن كل حاجة تكلفتها بتزيد: أسعار الطيران والإقامة في الفنادق وخدمة التنقلات وحتى تمن التأشيرة نفسه بيتغير.
وحتى الآن احنا مش عارفين هل الدولار هيثبت عنده سعره الحالي 27 جنيه وشوية ولا مع عودة البنوك للعمل يوم الاتنين الجاي هيكمل رحلة صعوده أمام الجنيه من تاني؟
وفي نفس الوقت، شركات سياحة شغالة في موسم العمرة السنة دي توقع ارتفاع أسعار برامج العمرة بحوالي 5 آلاف جنيه بسبب ارتفاع أسعار العملات الأجنبية مقابل الجنيه.
وخد بالك ان الريال السعودي دلوقتي في البنك معدي 7 جنيه، وعشلن كده ابراهيم هلال عضو الاتحاد المصري لغرف السياحة، اتكلم عن زيادة أسعار البرامج الاقتصادية للعمرة بين 3 و3.5 ألف جنيه لبرنامج الـ15 يوم.
أما برنامج ال4 نجوم فالزيادة هتكون بين 3.5 و4.5 ألف جنيه لبرنامج الـ10 أيام،وبرنامج 5 نجوم ما بين 4.5 و5.5 ألف جنيه لبرنامج 10 أيام.
بس برضه هلال لفت نظرنا لحاجة مهمة وهي ارتباط الأسعار بالعرض والطلب، يعني لو الطلب زاد السعر بيزيد ولو الطلب قل السعر كمان لازم يقل عشان مفيش زبون.
وحسب تحليله للسوق ممكن نشوف إحجام المواطنين عن السفر للعمرة؛ بسبب ارتفاع سعر البرامج، والشركات في الحالة دي هتضطر تقلل هامش الربح بتاعها وتكتفي بعائد قليل عشان تعرف تبيع الرحلات.
كمان ياسر سلطان، عضو اللجنة العليا للحج والعمرة الأسبق، وصاحب شركة سياحة أكد انه طالما مفيش سعر ثابت للريال مش هيبقى فيه سعر ثابت للبرامج، وبعد زيادة العملة وتذاكر الطيران، أسعار العمرة مش هتزيد بنسبة 25% يعني الربع على الاقل.
وحسب آخر التحديثات، سعر البرنامج الاقتصادي دلوقتي 35 ألف جنيه، والخمس نجوم بـ 50 ألف جنيه. وكانت رحلات موسم العمرة لعام 1444هـ انطلقت خلال الأسبوع الأول لشهر أكتوبر 2022، وسط مشاركة وتنسيق مستمر بين وزارة السياحة والآثار وغرفة شركات السياحة واللجنة العليا للحج والعمرة.
وفي النهاية بقى يهمنا نعرف رأيكم لو انت أو حد من قرايبكم حجزتوا لرحلة عمرة بالفعل أو لسة ناويين: هل شركات السياحة بلغتكم بأسعار جديدة بعل ارتفاع الدولار؟
