في وسط زحمة المسلسلات وسيطرة جعفر العمدة على التريندات.. في مسلسل استمر 3 سنين وحقق نجاح كبير جدا.. ورغم صعوبة مشاهده والقصة التي يناقشها إلا إنه ثابت في أعلى قوائم المشاهدات، والجمهور بيحبه جدا، لكن لكل نجاح ضريبة.. وضريبة المداح هي العكوسات.. تعالوا أرعبكوا بما يحدث في الكواليس.
مسلسل المداح اللي بيقدم عظمة للسنة التالتة على التوالي في رمضان.. عمل قاعدة جماهيرية كبيرة جدا.. صحيح إن حمادة هلال من الناس اللي مسلسلاتها في رمضان بتتشاف جدا وبتنجح على مدار السنين اللي فاتت.. لكن المداح حالة تانية خالص
ناس كتير بتخاف تتفرج على المسلسل.. وناس تانية بتحب النوع ده من الأعمال.. والحقيقة المداح بيقدم رعب ودراما متقنة.. مش مجرد فوتوشوب ولا شوية مؤثرات صوتية وبصرية مضحكة
المداح وأحداثه حقيقيين لدرجة إن الأبطال دايما بيحصل معاهم مواقف وحاجات غريبة.. بنسميها احنا العكوسات.. وأكتر واحدة اتأذت في الموضوع ده هي الفنانة لوسي.. اللي خدت توكيل الرعب السنة دي .. وطالعة من رمضان ملازماها ملكة الجان
لوسب قالت إن هند بنت الأحمر اللي بتقدم شخصيتها في مسلسل المداح الجزء التالت.. ملازماها طول الوقت.. وبعد تصوير المسلسل مش بتسيبها برضه.. طب وهي عرفت منين؟.. هقولكم
لما كانت بتصور مشاهد هند بنت الأحمر لوسي واجهت مواقف غريبة.. زي إنها أول ما وصلت الفندق اللي بيصوروا فيه المسلسل في الفيوم .. أوضتها كانت بتحصل فيها مواقف مش مفهومة.. يعني مثلا التلفزيون يقع فجأة يتكسر.. الجو يبقى حر.. يقلب برد وهوا ورياح وأعاصير .. كل ده عشان يقولولها إنهم موجودين.. يا لطيف يا لطيف
مش لوسي لوحدها المسلسل كله متلبش.. وخايفين يحكوا بيحصل معاهم إيه.. وكلهم كانوا بيقولوا يارب نخلص يومين التصوير دول ونرجع بيوتنا بالسلامة بقى.. بس حمادة هلال عنده قصة تانية خالص
حماده هلال اللي بيقدم المداح للسنة التالتة على التوالي.. ومستعد يقدم جزء رابع ويعمله فيلم كمان طالما في سيناريو مكتوب وينفع يتقدم بنفس الجودة.. مش فارقله العكوسات وكل اللي بيحصل
لإنه إلى جانب إنه شخصية متدينة فعلا.. وزي ما مراته بتقول إنه شبه شخصية المداح في البيت.. ومش بيحسوا بفرق أبدا.. إلا إنه بيعرف يفصل بطريقة سحرية
أول ما يخلص حمادة هلال التصوير ويرجع البيت.. بيستعين بكرتونة المفضل.. “سبونج بوب”.. اللي عمله أغنية قبل كده وحققت نجاح كبير جدا.. تخيلوا هي دي الطريقة السهلة والبسيطة.. بنقرأ قرآن ونستغفر ربنا.. ونفتح سبونج بوب.. وكده خلاص الدنيا أمان
حمادة هلال شايف إن لوسي وأي حد من النجوم اللي بيتكلموا عن العكوسات أوفر شوية.. وإن الموضوع مش للدرجة دي يعني.. اه كل اللي بيتكلموا عنه في المداح موجود حوالينا.. بس ربنا بيحفظ وده في الأول والآخر تمثيل يعني
