ارتفعت اسعار اللحوم والدواجن بصورة كبيرة خلال الايام الماضية ،ولذلك انتشرت العديد من الحملات لمقاطعة السلع التي يرتفع سعرها،ولكن المفاجأة ان البعض بدأ يلجأ لشراء رجول الدجاج كمصدر للبروتين واصبحت تباع علني في كارفور فما حقيقة الامر وهل فعلا انه يوجد زحام لشراءها هذا ما سنتعرف عليه من خلال التقرير التالي:
إيه حقيقة الكلام ده؟ مش هتصدق سعرها وصل لكام؟والغريب إقبال كبير على شرائها ياترى إيه السر وراء حب الناس لرجول الفراخ فجأة كده؟
الحقيقة بعد ما كانت رجول الفراخ بتترمى أو بتشتريها بس مش ليك طبعا فاهمنى أكيد، وكان ممكن تاخدهم ببلاش من الفرارجى مش محتاجها.. لكن الرجول بقيت ثروة،ومش ممكن يفرطوا بها بالساهل إنت عارف الكيلو وصل لكام؟
كيلو رجول الفراخ وصل لـ 20 جنيه،وبعد ما كنت بتسأل من كام شهر هو رجول الفراخ بيودها فين ؟ بقى السؤال هى الفراخ بيودوها فين؟ خاصة إن علشان تطلع كيلو رجول فراخ هتحتاج قول 15 ولا 20 فرخة ولا إيه؟
الحقيقة إن رجول الفراخ كانت بتتصدر للصين وده اللى قاله عبدالمنعم خليل رئيس قطاع التجارة الداخلية بوزارة التموين، وقال بالنص: عندنا أكثر من 8 شركات بتصدرها للصين، أنا دخلت المصانع دي في العاشر من رمضان والعبور وبولاق بينضفوها ويغلفوها وتتصدر للصين.
وإن الصينيين اللى كانوا متواجدين في مصر في فترة من الفترات، كانوا بيشتروا الرجول بس، وده بسبب فوايدها الكتير اللى كلنا عرفناها الفترة اللى فاتت.
خليل قال إن الناس ممكن تاخد الكلام من معنى تاني والترويج لها بسبب الغلاء، لكن الحقيقة أنها تحتوي على فوائد مهمة جدًا، وعليها إقبال كبير جدًا، ولو سألت الفرارجية هيقولوا لك إن الصينيين بيروحوا يسألوا عن رجول الفراخ.
فى الساعات اللى فاتت إنتشرت صور لرجول الفراخ والأخبار على السوشيال ميديا إن رجول الفراخ بقيت موجودة والغريب متوافرة بطريقة كبيرة فى كارفور، اللى أغلب السلع الأساسية مش موجودة فيها وبيقولولك أزازة زيت واحدة لكل مواطن.
والناس بتسأل إشمعنا رجول الفراخ؟ هو أنت متعرفش؟ ماهى رجول الفراخ كمان أقصى كمية تاخدها هيكون طبقين بس، يعنى اللى هتشتريه هتاكله مش هينفع تخزن منه.
ده اللى نشرته بنت على تويتر إسمها ميما وقالت شركة دجاج سعودية منزلة رجول فراخ في فروع كارفور مصر بسعر رخيص. إحنا في مهزلة التاريخ والله كارفور عامل عرض على رجول الفراخ أرخص من بره.
وكانت تعليقات الجمهور مابين مفيش الكلام ده، وانهى فرع في كارفور اللى تحت بيتكم؟ الصورة من السعوديه يا أستاذه، السعر بالريال أصلا ٦.٩٥ ريال وانتي ماسحة الريال.
الغريب إن على النحاس صاحب أحد محلات الدواجن بمنطقة إمبابة بالجيزة، قال فعلا الإقبال على شراء أرجل الدجاج كبير والناس بتطلبها أكتر من البانية، أن سعر كيلو الفراخ وصل لـ50 جنيه، وسجل سعر البانيه 110 جنيه للكيلو.
وقال بالنص: الناس كمان بتشتري رجول الفراخ أكتر من الفراخ نفسها، زمان كنّا بنشحّت رجول الفراخ دلوقتي هنبيع الكيلو بـ 10 جنيه ويمكن أكتر كمان.
مش بس كده الإقبال على الهياكل بقى تاريخى كمان ووصل سعر ل20 جنيه ،ومبقاش عارف يلبى إحتياجات الناس أجيب لهم رجول وهياكل منين.
طيب أمال إيه حكاية الشيبسى اللى بطعم رجول الفراخ ؟طبعا الصور اللى أكتسحت السوشيال ميديا كانت مفبركة ولا أساس لها من الصحة، وإن الشركة مأعلنتش خالص عن إصدار أطعمة جديدة برجول الفراخده كان مجرد سخرية من رواد السوشيال ميديا على الأخبار المنتشرة بفوائد رجول الفراخ.
إنت بقى مع ولا ضد إنك تاكل رجول فراخ؟هل شايف إنها بروتين للغلابة؟وأكلات الأزمات؟ولا دى مجرد أخبار شائعة وتريندات مش أكتر؟ وهل جربت تاكلها قبل كده ولا إيه كان طعهما؟ وبتتباع فى منطقتك بكام؟
