كان حلم حياتهم يعملوا عمره، يروا الكعبة ويتملوا بجمالها، يشربوا ماء زمزم ويدعوا لهم وأولادهم، هذا كان حلم 180 مواطن مصرى دفعوا من أجله 50 ألف جنيه، وللأسف الحلم تبخر وأصبح مكانهم على الأرض فى مطار القاهرة الدولى، بعد ما منعوا يركبوا الطيارة ويسافروا على السعودية.
ياترى أيه السبب وراء منعهم من أداء العمرة ؟ .. وليه فشروا الأرض فى مطار القاهرة وقعدوا فيها ؟ .. كل ده وأكتر هنعرفه مع بعض فى الفيديو ده
النص: فى البدايه كده حابين نؤكد عليكم أن لازم تسمعوا الفيديو ده كويس، عشان ماتقعوش فى المحظور ويحصل معاكم زى اللى حصل مع 180 مواطن مصرى كان خلاص هيسافروا يعملوا عمرة وللأسف اتمنعوا عن ده فى الطريق، وبقي مكانهم الأرض فى مطار القاهرة الدولى.
امبارح الصبح نشرت المواقع الصحفية الصور اللي انتم شايفينها دى لمواطنين مصريين، فلاحين وصعايده، رجالة وستات، قاعدين على الأرض فى مطار القاهرة الدولى بعد ما سلطات المطار منعتهم من ركوب الطائرة والسفر للسعودية لأداء فريضة العمرة، وده لأسباب زى مابتقول السلطات أسباب السبب فيها المواطنين دول والشركات والناس اللى اتفقت معاهم على رحلة العمرة دى.
يعنى تخيل وحط نفسك مكان الناس دى دلوقتى، دافعين كل واحد 50 ألف جنيه عشان يطلع عمرة وفى الأخر يتقاله لا مش طالع والسبب أنك غلطان، هاتعمل إيه؟.
الحقيقة أن اتضح فعلا أن المواطنين دول اتنصب عليهم فى رحلة العمرة دى، وعلشان كده أحنا عملنا الفيديو ده، عشان نعرفكم إيه اللى حصل معاهم ولو حد فيكم عايز يطلع عمره مايوقعش فى الغلط اللى وقعوا فيه.
الأخبار بتقول ان المواطنين دول للأسف كانوا طالعين بورق ناقص، الشركة أو الناس اللى اتفقوا معاهم كانوا نصابين، وعملوا كل الورق من غير حاجة أسمها باركود العمرة، وده لازم دلوقتى منه علشان تطلع وتسافر السعودية تعمل عمره.
باركود العمرة ده وزى مابيقول ناصر ترك عضو اللجنة العليا للحج والعمرة، ان ده شرط أساسى للمعتمرين والحجاج قبل مغادرة البلاد متوجهين للملكة العربية السعودية.
وأكد أنه يلزم على المعتمرين باركود للخروج من المنافذ والدخول على بوابة العمرة من خلال هذا الباركود قبل السفر والتأكد من بياناتهم، وأن الوسيط اللى المواطنين دول اتفقوا معاه تحايل على القانون من أجل التوفير لنفسه، ولم يذهب لشركات السياحة وبالتالي لم يحصل على باركود.
ولو فاكرين الباركود ده حاجة ببلاش كده وسهل، لا طلع وعلى حسب كلام ترك بـ 3200 جنيه وهي المصاريف الرسمية الموثقة، وقد تصل إلى 4 آلاف جنيه فى الأخر خالص حسب الضرائب.
وعشان كده أحنا بوضح ليكم دلوقتى ولأى حد عايز يسافر ويطلع يعمل عمره أنه يتأكد من الورق بتاعه كويس ومن شركة السياحة أو الوسيط اللى طالع معاه، ويشوف لو معاه باركود العمرة ولا لا، ولو مش معاه يقوله عليه ويحذر منه لأنه ممكن يكون نصاب.
بس السؤال هنا دلوقتى، مش اللى حصل مع المواطنين دول حاجه تحزن وكان المفترض اى حد يدخل ويطلعهم العمرة، اكتبوا رأيكم فى التعليقات .
