نعم نشهد تقدم كبير وتطورات هائلة، ولكن وصل التطور إلى أن المنازل الطبيعية تصبح موضة قديمة، وأن المستقبل في المدن العائمة، فالسعودية أعلنت أنها تجهز لأكبر مدينة عائمة وسيكون بها بيوت ومحلات وتمشي في البحر، لمعرفة المزيد من التفاصيل تابعنا في التقرير التالي:
أعلنت السعودية عن أكبر مدينة عائمة .. عائمة ازاي يعني؟ايوا مدينة على متن يخت “تيرايخت”، على شكل سلحفاة ضخمة، وهتوصل تكلفتها لحوالي 5 مليارات دولار.
والمدينة هيبقى اسمها Pangeos، اقترح تصميها استوديو تصميمات ايطالي، وهي ضمن الخطة انها اول ما هتكتمل هتبقى اكبر مبنى عائم، وسموها الاسم ده على إسم قارة عملاقة كانت موجودة من حوالي 200 مليون لـ 335 مليون سنة.
طب ليه بنقول انها اكبر مبنى، لان طولها لوحده 550 متر، وعرضها 610 متر، غير اجنحتها اللي هتضم حوالي 19 فيلا، و64 شقة، وتقدر تسيع حوالي 60 الف شخص، غير المحلات التجارية، ونادي على البحر.
مش بس كدا، هي كمان فيها مكان علوي مخصوص، يسمح للطيارات انها تهبط فيه بأمان، وهتتقسم لـ 9 اقواس، هتبدأ من مدخل المينا للمنطقة الرئيسية، لغاية المساحات اللي موجود فيها البيوت والمباني.
وعائمة برضو لانها تقدر تبحر العالم كله من غير ما تقف، لانها معتمدة على الطاقة الخضرا اللي ملهاش نهاية، وسطحها متغطي بألواح الطاقة الشمسية بتولدلها طاقة، وكمان هتعتمد على الطاقة اللي بتتولد من امواج المحيط.
وبتنطلق بسرعة بتعادل حوالي 5,7 ميل في الساعة، وبتشتغل المدينة العائمة كمان بـ 9 محركات كهربائية، كل واحد فيهم بيستهلك 16 الف حصان
وعشان يحموها من الغرق، هيكلها متقسم لحوالي 30 الف خلية، وبتتكون من حجرات على شكل العنقود ومتصلة ببعض بممرات، وده بيوفر مساحة انها تبقى عايمة، والجزء السفلي ميتصابش
ودي مش اول مرة نسمع عن المدن العائمة في البحر، لان قبل كدا برضو كوريا، اعلنت انها بتجهز اول مدينة عائمة على سطح البحر، وده لانها خايفة من التقلبات والكوارث اللي ممكن تحصل في المستقبل، وتخلي حياة الانسان على الارض صعبة، يعني هنسيب الارض وهنروح نعيش في البحر؟
المهم ان المدينة دي بيقولوا انهم هيبدأوا في إنشاءها من اول السنة الجديدة، وهتتبني على مساحة 6.3 فدان، وبتتجهز إنها تستقبل 12 الف نسمة، وهيبقى عندهم استعداد يوسعوها وتستقبل 100 الف نسمة
وحسب التصميمات الاولية اللي رسموها، انها هتتكون من احياء عايمة على سطح البحر، بس متصلة ببعض مع وسط المدينة، عن طريق جسور قادرة انها تتكيف مع ارتفاع منسوب مياه المحيطات، ويقدر السكان يعيشوا فيها لعقود طويلة
شكل بقى الدول كلها اكيد هتبقى عايزة تعلي على بعض وهنسمع كتير عن المدن العائمة الايام الجاية.. بس ياترى لو جاتلك الفرصة تعيش فيها هتعمل كدا؟
