هل ممكن أن تأخذ قرض عندما تقدم على شهادة الادخار الجديدة من البنك الأهلي وبنك مصر تسدد به ديونك القديمة، هذا بالإضافة إلى المكسب الأساسي الذي هستحققه من أرباح الشهادة؟ من خلال التقرير التالي سنوضح لك كيف يمكنك القيام بذلك بدون اي مخاطرة وايضا سنوضح الأوراق والإجراءات المطلوبة،فتابعونا..
لو بتدور على أفضل شهادات للادخار في الوقت الحالي يبقى لازم تعرف أكتر عن الشهادة الجديدة من البنك الأهلي وبنك مصر بعائد 25% يتصرف سنويًا ، وعائد 22.5% شهريًا واللي تعتبر بتقدم للمصريين أعلى عائد في القطاع المصرفي كله.
ودلوقتي لو قدمت على شهادة الإدخار الجديدة هتقدر تاخد قرض بضمانها من تاني يوم هتشتريها بس بشرط واحد إنك متقدرش تكسر الشهادة دي إلا لما تسدد آخر قسط من القرض للبنك .
طيب إيه الأوراق المطلوبة للحصول على القرض؟
طبعًا مش هتصدق بس الجميل بقى إنك لو حبيت تاخد القرض ده فعلا مش هتحتاج ساعتها تقدم أي أوراق وهيكتفي موظف البنك إنه يعملك إجراء بسيط وهو الحظر على الشهادة بما يعادل قيمة القرض وده طبعًا بعد الحصول على موافقة منك شخصية.
بس خلي بالك لو فكرت تعمل كده لازم تحسبها صح وتخلي القرار ده للضرورة فقط، وده لأن البنك الأهلي ومصر قرروا يرفعوا سعر الفائدة على الاقتراض بضمان الشهادات والودائع لـ 24% كحد أدنى وده عشان يقللوا أي محاولات من العملاء لـ إعادة فلوس الشهادة مرة تانيه عن طريق الحصول على القرض.
طب ليه عملوا كده ؟
هقولك يا سيدي وفي العادة كانت البنوك بتعمل حركة ذكية وهي إنها تحافظ على عملائها من أنهم يسحبوا ودائعهم نهائيًا لصالح الشهادات مرتفعة العائد في بنكي الأهلي ومصر وده بأنهم يوفروا ليهم إمكانية صرف قروض بضمان الشهادات بزيادة 2% أو 3% بس فوق سعر عائدها الأصلي.
و بالطريقة دي يقدروا العملاء حققوا أرباح من سعر العائد على الشهادات من غير ما يحتاجوا يكسروا الشهادات القديمة ولا يسحبوا الودائع، وكمان يقدروا ياخدوا قروض ومش هيكونوا خسرانين كتير من نسبة الفايدة اللي مش كبيرة.
لكن الفايدة اللي أقروها البنوك دلوقتي كبيرة جدًا، وده لأنه بحسبة بسيطة وعشان تعرف الفرق أحب أقولك إن سعر الفائدة على الاقتراض لدى البنك المركزي حاليا 17.25%، لكن بعد قرار البنوك بزيادة الفايدة على أي قرض هيتاخد بضمان الشهادات هيزود الفائدة المقررة 7% على عملاء الإقراض بضمان الشهادات وبكده تكون تكلفة الفايدة كلها على الاقتراض بضمان الشهادة 24.25%.
وعلى فكرة القرار ده كان بتوجيهات من البنك المركزي لكل البنوك عشان يرفعوا أسعار الفائدة على إقراض العملاء بضمان شهادات الادخار، وده عشان يمنعوا التربح من الشهادات الجديدة خاصة اللي بعائد 25% واللي تم طرحها مؤخرًا.
طيب إيه آخر معاد للتقديم على الشهادة؟
خلي بالك لحسن الوقت يسرقك، لأنه حسب كلام محمد الأتربي رئيس بنك مصر، فـ استمرار بيع الشهادات الجديدة هيكون لوقت قصير لمدة أسابيع ومش هتوصل لشهور، عشان كده لازم تقدم بسرعة لأن الشهادات دي تعتبر فرصة رائعة للمصريين لادخار فلوسهم خاصة إنه مفيش أي بنك غير الأهلي ومصر يقدر يطرح شهادة الـ 25% كعائد سنوي ، و22.5% عائد شهري وده بسبب تكلفتها المرتفعة
قولنا رأيك في شهادات الادخار الجديدة وهل قدمت عليها ولا لسه؟
