شهر فبراير رغم أنه 28 يوم فقط لكن دائما نحس أنه طويل ولن ينتهي.. وهذه المرة الكل ينتظر انتهاء الشهر من أجل زيادة المرتبات.
خليك معانا وهنقولك مرتبك هيكون كام بعد الزيادة على حسب درجتك الوظيفية.. ولو أنت في القطاع الخاص هنقولك ميعاد الزيادة اللي هتتساوى فيها بالحكومة.
مرتبات شهر فبراير
وزارة المالية بتجهز نفسها اليومين دول عشان تصرف مرتبات شهر فبراير لسنة 2023 للقطاع العام والعاملين بالجهاز الإداري.وصرف المرتبات هيكون من أول يوم الخميس اللي جاي الموافق 23 في الشهر.. وصرف المرتبات هيستمر لحد يوم 28 فبراير، والكلام ده هيتطبق على 33 وزارة وهيئة ومصلحة حكومية.. وطبعا مع مراعاة أيام الأجازات والعطلات الرسمية.
ازاي تحسب مرتبك؟
بعد ما الحكومة أعلنت عن زيادة الحد الأدنى للأجور.. لو أنت من الموظفين في الدرجة الممتازة يعني مرتبك هيكون حوالي 9000 جنيه في الشهر.. ولو كنت من موظفين الدرجة العالية يعني مرتبك هيكون حوالي 6000 جنيه.
أما الموظفين اللي في درجة المدير العام مرتبهم هيوصل لحوالي 5400 جنيه.. وموظفين الدرجة الأولى مرتبهم هيكون 4800 جنيه تقريبا.
وموظفين الدرجة الثانية فمرتبهم هيوصل لـ 4200 جنيه.. والموظفين في الدرجة الثالثة مرتبهم هيكون حوالي 3720 جنيه.. والموظفين اللي في الدرجة الرابعة هيكون مرتبهم حوالي 3480 جنيه.
أما بقى الموظفين في الدرجة الخامسة فمرتبهم هيوصل لحوالي 3240 جنيه.. أما بقى الموظفين في الدرجة السادسة مرتبهم هيكون الحد الأدنى بالظبط اللي هو 3000 جنيه في الشهر.
الحد الأدنى للقطاع الخاص
بالنسبة للقطاع الخاص.. فالمجلس القومي للأجور برئاسة الدكتورة هالة السعيد وزيرة التخطيط، كان أعلن عن زيادة الحد الأدنى للأجور للقطاع الخاص عشان توصل 2700 جنيه.
بحيث أن قيمة العلاوة السنوية للقطاع الخاص متقلش عن 3% من قيمة الاشتراك التأميني.. والعلاوة دي تتصرف على حسب السنة المالية وفقا لقانون التأمينات الاجتماعية والمعاشات.
زيادة القطاع الخاص
بالنسبة لزيادة المرتبات في شريحة الموظفين اللي شغالين في القطاع الخاص.. فالمجلس القومي للأجور قال إنه هيعمل اجتماع في آخر شهر أبريل اللي جاي عشان يبحث الموضوع ده.
والاجتماع اللي هيكون بعد شهر رمضان في الغالب هيناقش تفاصيل المساواة بين القطاعين الخاص والعام.. عشان يكون الحد الأدنى هنا وهنا 3000 جنيه.
الزيادة الثانية
والزيادة دي هتكون التانية للقطاع الخاص السنة دي.. عشان في شهر يناير اللي فات تم تطبيق زيادة 300 جنيه على القطاع الخاص عشان يوصل 2007 بدل ما كان 2400 جنيه.
تطبيق الحد الأدنى للأجور بالقطاع الخاص
والنائب إيهاب منصور، وكيل لجنة القوى العاملة في مجلس النواب، قال إن زيادة الحد الأدنى للأجور في القطاع الخاص.. الهدف الأول منها أن الكل يتساوى سواء القطاع الخاص أو الحكومي.
والكلام ده بتوجيهات صدرت من الرئاسة في شهر نوفمبر اللي فات.. عشان المواطنين يقدروا يواجهوا ارتفاع الأسعار في الأسواق بعد موجة التضخم اللي حصلت في البلد.
