علاوة وتخفيض ساعات العمل، هذا ما نص عليه قانون العمل الجديد بعد ما مجلس الشيوخ اخيرا وافق عليه، ليس هذا فقط ده القانون في مميزات تانيه ناس كتير كانت مستنياها وبطالب بيها عشان متكنش تحت رحمة صاحب العمل
فياترى إيه تفاصيل القانون الجديد؟ وايه مميزاته اللي كان بيطالب بيها كتير من الموظفين؟ وايه حقيقة تخفيض ساعات العمل؟ وايه الهدف من اصدار القانون ده اصلا؟
دايما قانون العمل بيكون محل اهتمام ناس كتير من الموظفين وأصحاب العمل وده لأنه بينظم العلاقة اللي بينهم عشان ميحصلش اي مشاكل بين الطرفين
عشان كده الحكومة دائما بتلقي الضوء عليه من وقت للتاني، وبتصدر بعض التعديلات فيه عشان يكون في تيسيرات اكتر للعمال، وده اللي حصل فعلا لما الحكومة قدمت مشروع قانون عمل جديد ووافق عليه مجلس الشيوخ، لكن يا ترى إيه حكاية قانون العمل الجديد؟
شوف ياسيدي، حسب اليوم السابع، فقانون العمل اللي وافق عليه مجلس الشيوخ في كتير من المميزات اللي أولها صرف علاوة سنوية دورية متقلش عن 3% من أجر الاشتراك التأميني
من ضمن المميزات دي كمان هي إلغاء استمارة 6 اللي كانت بتستخدم في التهديد بالفصل
القانون الجديد بينص كمان على تعويض للعامل يساوي أجر شهرين عن كل سنة من سنوات الخدمة، حال الفصل التعسفي
مش بس كده ده كمان بيحظر فصل العامل من جانب إدارة العمل من غير معرفة المحكمة العمالية، وبيحظر حظر فصل الموظفة أثناء الوضع، ومنحها إجازة 3 شهور مدفوعة الأجر
من مميزات القانون كمان أنه بينص على تحويل العقد المؤقت إلى دائم بعد 4 سنين تلقائيًا، وكمان بيحظر تشغيل اي شخص قبل بلوغه 15 سنة
وبالنسبة بقى لبند الإجازات فالقانون ده بيمنح العامل إجازة بتوصل لـ21 يوم في السنة قابلة للزيادة، وبيمنحه كمان إجازة أبوة لمدة يوم واحد للعامل لما ربنا يرزقه بمولود جديد
ده كمان منسيش العمالة الغير منتظمة وعمل ليهم صندوق لحمايتهم و تشغيلهم
وحسب المصري اليوم، قانون العمل الجديد من المتوقع أنه يتم مناقشته في مجلس النواب في دور الانعقاد الرابع في شهر أكتوبر اللي جاي
وعلى فكرة من ضمن أهداف قانون العمل الجديد هو خلق مناخ جاذب للاستثمار، وده بقى من خلال توازن العلاقة بين العامل وصاحب العمل لأنهم اساس العملية الإنتاجية، وكمان عشان الدولة بتتبني سياسة اقتصادية جديدة في مجال التشغيل، ولسرعة الفصل في النزاعات العمالية
مش بس كده ده الهدف منه كمان هو مواكبة التطور في ميدان العمل لمواكبة المتغيرات الاجتماعية والاقتصادية اللي مرت بيها مصر في الفترة الأخيرة، وكمان بيهدف للالتزام بمعايير العمل الدولية والاتفاقيات التي صدّقت مصر عليها
وبالمناسبة الحكومة كانت أعلنت من فترة عن دراسة قرار تخفيض ساعات العمل لـ بعض الفئات بالقطاعين الخاص والحكومي، وفقًا لقانون العمل الجديد، بعد مناقشته بـ مجلس النواب
وحسب قانون الخدمة المدنية، تخفض عدد ساعات العمل اليومية بمقدار ساعة واحدة للموظف ذوي الاحتياجات الخاثك، وللموظفة اللي عندها عيال اقل من عامين، وبرضو لبعض الحالات التانية اللي بتوضحها اللائحة التنفيذية.
ودلوقتي قولنا رايك في قانون العمل الجديد ؟
