حالة من الهجوم الشديد، شنها الإعلامي عمرو أديب، على أحمد حسام ميدو، الساعات الماضية، خلال برنامجه “الحكاية” المذاع على قناة “إم بي سي مصر”.
وقال عمرو أديب: “ميدو اللي طالع من كام يوم يقولك أصل انت عندك مشكلة مع مرتضى منصور، أنا مشكلتي يا ميدو مع مرتضى ابتدت بسببك فاكر، واللي أفكرك لما قالك أنا هعلقك من رجليك في الاستوديو لو طلعت مع عمرو أديب، ويومها أنا أخدت المسئولية وقلت لأ ميدو هيطلع ويتكلم”.
عمرو أديب يفتح النار على ميدو..
وتابع: “فاكر يا ميدو مرتضى منصور يوم ما طلعت معايا قال عليك إيه؟ بيتعمل فيك إيه؟ فاكر اليوم ده ولا لأ؟”.
وأكمل: “فاكر يا ميدو لما كلمتني وقلت لي يا عمرو أنا هتصالح مع مرتضى منصور علشان مش كل شوية يشتمني وأنا داخل وخارج من البلد مش عايز حد يضايقني ولا يشتمني، وقتها قلت لك خلاص يا ميدو ربنا معاك”.
وأضاف: “هددني وقتها إنه هيقفل المحطة لو طلعت ميدو طبعا لا هو ولا اللي يتشددله كان يقدر يقفل المحطة، وقال لي أنا جاي أعلق ميدو من رجله وشتمه”.
واختتم: “انت بقى جاي دلوقتي يا ميدو بتسأل وتقول إيه مشكلتك مع مرتضى، ده ربك دلوقتي يمهل ولا يهمل وكل يوم ربنا بيوري لمرتضى آية من آياته وكل يوم قضية شكل وبلاغ شكل وحاجة شكل، هو قصته كلها الحديدة شكله كان نفسه يبقى مذيع”.
