إن كنت تعاني من ارتفاع الدولار وتحمل الهم، فحضر نفسك لكي تصبح مليونير ، فقط عليك الدخول إلى مطبخك والبحث عن الملعقة السنبلة، قبل أن تصيبك الدهشة، سوف نكشف من خلال هذا التقرير كيف تكسب 200 ألف جنيه بسبب هذه الملعقة فتابعونا.
معلقة ممكن تبانلك عادية وغالبا هتلاقيها في بيتكم أو بيت جدتك بس وراها حكاية كنز كبير. هي دي قصة معلقة السنبلة اللي دوخت المصريين معاها، فمن فترة الناس تداولوا بوست على الفيسبوك صاحبه بيقول فيه: ملعقة واحدة هتغير حياتك 360 درجة.. ملاعق وشوك السنابل يصل سعرها إلى 150 ألف جنيه.. دور عليها في المطبخ.
لكن دلوقتي مع جنون الدولار وارتفاع الأسعار، معلقة السنبلة هي كمان سعرها ضرب في السما وتقدر تبيعها ب 200 ألف زي ما الناس بتقول، يعني 5 معالق تخليك مليونير، وحتى لو معلقة واحدة رضا اوي.
والسر في ارتفاع سعر معلقة السنبلة هو ندرتها، لأن المعلقة دي بدأ دخولها في الوطن العربي من سنة 1970 لغاية 1983.
وساعتها كانت موجودة في أغلب البيوت المصرية، لأن التجار استوردوا منها حوالي 30 مليون ملعقة، بس طبعا مع مرور الزمن المعلقة اختفت من السوق وبقت شبه العملة النادرة، وانت عارف كل حاجة وليه زبونها.
وهنا بيظهر المتخصصين في جمع الانتيكات والتحف واي حاجة تفكرهم بالزمن القديم، الناس دي منهم التاجر ومنهم الهواة أصحاب المزاج اللي عندهم استعداد يدفعوا في معلقة السنبلة مبالغ طائلة عشان تبقى ضمن مقتنياتهم.
والاغرب بقى لما تعرف السر في صناعة المعلقة الشهيرة، البعض قال إن جودتها عالية جدا لأن داخل فيها نسبة فضة عالية عشان تبقى مضادة للصدأ.
وطبعا ده هيخليها تعيش وقت أطول مع الغسيل كل شوية، مش دايما يقولك ان حاجة زمان مفيش زيها! اهو الفكرة دي زودت الطلب على المعلقة لأنها لما تتباع هيتم تسييح الفضة عشان تتباع مادة خام.
بس خلي بالك الموضوع فيه شبهة نصب، لأن أشرف هلال، رئيس شعبة الأجهزة المنزلية، بغرفة القاهرة التجارية سبق ونفى كل الكلام ده وقال إنه شائعات، لأنها مش أثرية عشان تتباع بالسعر ده.
كمان قال إن ملعقة السنبلة كانت منتشرة في بيوتنا بشكل كبير خلال فترة السبيعينات والتمانينيات بس الحقيقية انها مصنوعة من الاستانليس أو الصاج المطلي كروم.
وحتى لو فيها فضة، ده مش هيزود قيمتها أبدا للسعر ده ولا حتى ربعه، فياريت بلاش حد يضحك علينا، دي ناس عاوزة تركب التريند، والمعلقة في سوق الجمعة بتتباع من 2 ل5 جنيه.
فهل سبق وجربتوا تعرضوا معلقة السنبلة على جروبات الانتيكات؟ طيب امتى اخر مرة شفتوا المعلقة دي وهل لسة موجودة في بيتكم؟
