2.5 مليون مصري في السعوديه لابد أن يعيدوا حساباتهم خصوصا بعد قرارات سعودة الوظائف في كثير من المجالات.
ودلوقتي حكومة المملكة بتجهز لتنفيذ القرار في مهن جديدة خلال 180 يوم، فياتري إيه المقصود بالمهن الحرجة جوة السعودية؟ وليه المملكه عاوزة تقلل من سيطرة العمالة الوافدة عليها؟
مع بداية 2023 قررت السعودية توطين عدد من الأنشطة والمهن بنسب مختلفة في منطقة المدينة المنورة.ووزارة الموارد البشرية والتنمية الاجتماعية طلعت قايمة بالمهن والأنشطة المقصودة زي المطاعم سواء بقى في المباني المستقلة أو المختلطة والمجمعات والمراكز التجارية المغلقة بنسبة 40%.
ونفس الكلام في القهاوي بس بنسبة توطين 50%؛ ومعاهم كمان منافذ البيع بالجملة للأغذية والمشروبات.
ويستثنى من قرار التوطين في المهن دي اللي شغالين عمال نظافة وعمال شحن والتفريغ، بشرط نسبتهم متزدش عن 20% من عدد العاملين في المكان مع الالتزام بالزي الموحد.
وطبعا القايمة لسة مخلصتش، مطلوب كمان توطين مهن “اختصاصي تسويق”، و”مندوب مبيعات”، و”موظف صندوق محاسبة” بنسبة 40%, وهيبدأ تطبيق القرار بعد 180 يوم من تاريخ صدوره.
وعشان المملكة تشجع السعودية على الالتزام، الحكومة هتقدم مجموعة من الحوافز والدعم لمساعدة المؤسسات المختلفة في توظيف السعوديين.
َوطبعا النوعية دي من القرارات مش جديدة، لأن المملكة بقالها فترة بتنفذ خطة لسعودة الوظائف وتقليل الاعتماد على العمالة الوافدة ضمن رؤية المملكة 2030.
يعني سبق وصدر قرار توطين المهن الصحية زي (المختبرات الطبية – الأشعة – العلاج الطبيعي – التغذية العلاجية) بنسبة 60% من إجمالي عدد العاملين بالمهن الصحية في كل منشآت القطاع الخاص .
وسبق واتكلمت الحكومة هناك عن خطة توطين الوظائف، خصوصا في المهن الحرجة، ودي المقصود بيها المهن المرتبطة بالاقتصاد وحياة الناس مباشرة، ولو حصل وانسحبت منها العمالة الوافدة فجأة ومن غير تخطيط، المملكة هتلاقي نفسها في مشاكل ملهاش اول من آخر.
وحسب الأرقام المعلنة في حوالي 455 مهنة من ضمن 730 تقريبا، سبق وتم تصنيفهم كوظائف مسيطر عليها من الوافدين زي الطب والتمريض وشبكات الضغط العلي للكهرباء وصيانة الطائرات والصحة والنقل والتصنيع والسياحة والتشييد والبناء والزراعة وتجارة الجملة..
وعموما نسبة السيطرة ممكن تصل إلى 80%، ومش بعيد تلاقي جنسية واحدة تسيطر على مهنة معينة.
عشان كده مشروع التوطين من مهماته توفير البرامج التعليمية والتدريبية اللي تخرج سعوديين يقدروا يغطوا الوظايف اللي محتاجاها السعودية.
وعموما في حوالي 12 مليون مصري في الخارج، وأكبر جالية مصرية موجودة بالمملكة العربية السعودية بحوالي 2.5 مليون مصري، وده غير 600 ألف مصري في كل من الإمارات والكويت، حسب بيانات وزارة الهجرة في مصر.
والسؤال ليكم دلوقتي لو شغالين في السعودية: هل لاحظتوا ان في مصريين شغلهم اتأثر فعلا بسبب خطة التوطين؟ وإيه اكتر مهن استغنت عن المصريين الفترة اللي فاتت؟ وهل فرصة الحصول على عقد في المملكة لسة متاحة ولا الموضوع بقى أصعب؟
