هل تعلم أن مكافأة نهاية الخدمة التي ينتظرها كل موظف ممكن أن لا تحصل عليها حسب القانون، نعم كما قرات فحتى لو عملت لسنوات طويلة قد تكون ضمن أحد الفئات التي حددها القانون والتي تحرم من تلك المكافأة.
بس ياترى ايه هي الحالات دي؟ وهل ممكن تحل الموضوع ودي مع صاحب العمل؟ وازاي تاخد حقك من صاحب العمل؟
دايما قانون العمل بيكون محل اهتمام بين ناس كتير سواء كان صاحب العمل أو الموظفين، وده لأن القانون ده بيضمن حقوق الطرفين وبينظم العلاقة بينهم من خلال توضيح حقوق وواجبات كل طرف
بس انت عارف أن القانون ده بينص على بعض المواد اللي ممكن تقلق الموظف زي انك مثلا ممكن تترفد من شغلك ومتاخدش مكافأة نهاية الخدمة اللي كل موظف بيستناها، بس ده في بعض الحالات، لكن يا ترى إيه هي الحالات دي؟
شوف ياسيدي، حسب موقع صدى البلد، قانون العمل حدد بعض الحالات اللي ممكن تتفصل فيها من شغلك ومش هتقدر تاخد فيها مكافأة نهاية الخدمة أولهم ثبوت انتحال الموظف لشخصية غير صحيحة أو قدم مستندات مزورة
من ضمن الحالات دي كمان هو ارتكاب العامل خطأ اترتب عليه أضرار خطيرة لصاحب العمل، بس بشرط أن صاحب العمل يبلغ الجهات المختصة بالخطأ ده خلال 24 ساعة من وقت علمه
وكمان لو الموظف منفذش التعليمات اللازم اتباعها لسلامة العمال والمنشأة وكرر ده اكتر من مرة بشرط: إن التعليمات دي تكون مكتوبة ومعلنة فى مكان ظاهر وساعتها ممكن تتفصل وبتتحرم من المكافأة
ده بالإضافة لو الموظف غاب من شغله بدون مبرر أكتر من عشرين يوم متقطع خلال السنة الواحدة أو أكتر من عشرة أيام متتالية.
ساعتها برضه بيتفصل من شغله بس لازم يكون سبق الفصل إنذار كتابى بخطاب موصى عليه بعلم الوصول من صاحب العمل للموظف بعد غيابه عشرة أيام فى الحالة الأولى، وبعد غيابه خمسة أيام فى الحالة التانية
ومن ضمن الحالات دي كمان لو ثبت أن الموظف أفشى أسرار المنشأة اللي شغال فيها وده أدى لحدوث أضرار كبيرة فيها، وبرضو لو العامل اشتغل في نفس المجال ونافس صاحب العمل فى نشاطه برضو بيتفصل
ولو العامل ولا الموظف مكنش في وعيه أثناء ساعات العمل بيتفصل، وكمان لو تجاوز بدنيا في حق صاحب العمل أو المدير العام أو رؤسائه أثناء العمل
بس القانون مكنش متشدد اوي كده وده لأنه اجاز للعامل وصاحب العمل أنهم يطلبوا من الجهة الإدارية المختصة خلال 7 أيام تسوية النزاع بشكل ودي
ولو ده محصلش فى موعد أقصاه عشرة أيام من تاريخ تقديم الطلب في الحالة دي بقى ممكن يلجأوا للجنة قضائية خلال 45 يوم من تاريخ النزاع وإلا سقط حقه
انت بقى هل تعرف حد حصل معاه تعنت في صرف مكافأة نهاية الخدمة خصوصا لو شغال في القطاع الخاص؟ وهل شايف إن الموظفين في مصر عارفين حقوقهم ولا سهل يضحك عليهم؟
متنياش تشاركنا برأيك ولو عندك اي سوال أو استفسار بخصوص قانون العمل اكتبلنا في التعليقات
