بمبدأ مصر هى أمى ومصر أم الدنيا مطالبات بتحصيل رسوم من المصريين فى الكويت والسعودية والمصريين بالخارج عامة، فما القصة، تابعونا من خلال التقرير التالي لمعرفة التفاصيل:
ياترى إيه حكاية المطالبات دى من مجلس الشيوخ ،وهل فعلا ممكن تتطبق؟ ولو إطبقت مصير المصرييين فى الخارج هيكون إيه ؟ تفاصيل كتير عن القرار ده ومصيره هنعرفها فى الفيديو ده تابعونا..
المصريين فى الخارج هيلاقوها منين ولا منين ..أحوالهم فى الكويت والسعودية على كف عفريت ،والكل حاطط إيده على قلبه من التكويت والسعودة اللى بتحصل الفترة الاخيرة فى وظايف كتير ،والإسنغناء عن العمالة المصرية اللى بيحصل لمصريين كتير ،واللى جاى ياريته على قد اللى رايح كمان ..وفوق ده كله يدفعوا رسوم وتمن غربتهم؟
تمن الغربة هم دافعينه تالت ومتلت ،وقيسوا على كده حاجات كتير جدا ..فياترى إيه الحكاية ؟
الساعات اللى فاتت نشر موقع المصرى اليوم أخبار بتقول إن النائب بهاء الدين أبوشقة، وكيل مجلس الشيوخ، خلال الجلسة العامة النهاردة ،طالب بضرورة توافر منظومة قانونية بنصوص قانونية محددة وحاكمة من الدولة بالنسبة للمقيمين بالخارج، وأن يكون للدولة نسبة مئوية منهم كحق للدولة على اللى ربته وعلمته.
وإن زى ما مصر وقفت جنبك فى تعليمك لحد ما سافرت ..هترد ده فى صورة رسوم هتدفعها وإنت فى غربتك لمصر ..
أبو شقة قال كمان إن الثروة البشرية من أهم الثروات اللى كا الدول بتهتم ،علشان كده لازم يكون فى منظومة قانونية تنظم الحقوق والواجبات وكل واحد يعرف اللى له واللى عليه ..
وتسائل فى الجلسة وقال هل نحن أمام منظومة قانونية تنظم قاعدة بيانات لكافة العاملين أو المقيمين بالخارج وما هي الإجراءات التي تنظم ذلك؟
وورد وقال إن المسالة عشوائية مفيش رقابة منظمة تحت مظلة قانونية حاكمة للموضوع ده ، لازم يكون فى شكل تنظيمي لكل اللى بيشتغل بالخارج بأن يعمل عن طريق الدولة، رايح فين ويشتغل إيه والأهم بياخد مرتب كام بدل من أن يهيموا في الشوارع زى ما بنشوف .
أبو شقة أكد إن المسألة مش مسألة إعفاءات جمركية من عدمه، المسألة كام عدد العاملين بالخارج؟،وزى ما فى قوانين بتنظم العمل فى الداخل للمصريين فى مصر لازم يكون فى قوانين تنظم العمل فى الخارج للمصريين ،وميكونش العمل بالخارج إعتباطى .
أكد كمان رئيس مجلس الشيوخ، المستشار عبد الوهاب عبد الرازق، أن المصريين بالخارج خلال الفترة الماضية بيلاقوا احتضان كبير من الدولة المصرية، كان مفتقد لسنوات طويلة..
النائبة فيبي فوزي، وكيل مجلس الشيوخ قالت إن المصريين بالخارج هم جزء لا يتجزأ من النسيج الوطني المصري، والاهتمام بهم ورعاية مصالحهم ده متماشى مع أهداف القيادة السياسية اللى بتراعي لمّ شمل المصريين من مختلف الفئات وفي كل ربوع الوطن أو خارجه على هدف واحد هو إعلاء مصلحة مصر وتحقيق تنميتها، وإن تحويلات المصريين بالخارج مصدر مهم من مصادر الدخل القومى زيه زى قناة السويس.
الغريب إن لما يحطوا قوانين للمصريين فى الخارج ..تكون فى مصلحة المصرى المغترب ؟ مش ضده تكون بتحافظ على وضعه وتزود دخله وتساعده يعيش مواطنين البلد مش أقل منهم فى حاجة ،ولما يتعرض لأى مشكلة أو موقف يلاقى إن بلده معاه وفى ضهره ..لكن يدفع رسوم لمصر؟ إنتوا رأيكوا إيه فى التصريحات دى مع ولا ضد وضع قوانين زى ده للمصريين فى الخارج؟ شاركوتنا فى التعليقات .
