البرلمان يحاول خلال هذه الفترة أن يصدر تشريع جديد يقلل من أسعار الموبايلات في السوق المصري.يا ترى ما موضوع إلغاء الضريبة عن الموبايلات ؟ وكم ستنخفض الأسعار؟ ومتى تقدر تشتري بالأسعار الجديدة؟ كل هذا سنعرفه من خلال التقرير التالي:
الحكومة المصرية قدمت حل جديد ينهي مسألة التراجع في حركة بيع الموبايلات بسبب غلاء الأسعار.. وينعش السوق المصري بعد فترة من الركود.
رسوم تنمية الدولة
والبرلمان المصري خلال الفترة الجاية هيطلع قرار تشريع جديد.. والقرار الجديد هيكون سبب في انخفاض أسعار كل أنواع الموبايلات في السوق.. لأن هيتم إعفاء كل الموبايلات من رسوم تنمية موارد الدولة.
والرسوم دي كان بيدفعها المصنعين المحليين.. وعشان الدولة المصرية بتدعم عملية توطين الصناعة.. قدمت تسهيلات جديدة وإعفاءات ومنها إلغاء رسوم التنمية عشان تشجع المصنعين.
واللي اتقدم بمشروع القانون ده لمجلس النواب هو الحكومة المصرية بنفسها.. عشان تعدل رسوم التنمية.
الموبايلات والإكسسوارات
والتعديل بأن يكون في إعفاء من رسوم تنمية موارد الدولة المالية للأجزاء والمكونات اللازمة لصناعة الموبايلات وإكسسواراتها اللي بتستوردها المصانع والشركات عشان تصنع الموبايلات في مصر.
وقانون تنمية موارد الدولة كان محدد فرض رسوم على أجهزة الموبايلات وجميع الإكسسوارات بحوالي 5% من قيمة الموبايل.. وبيتضاف عليها ضريبة القيمة المضافة وباقي الرسوم.
وغير إن مشروع القانون بينص على إعفاء الأجزاء والأكسسوارات المستوردة لإنتاج وصناعة الموبايلات.. كمان بينص على إعفاء المنتج النهائي المصنع في مصر من رسوم تنمية موارد الدولة.
تشجيع صناعة الموبايلات
مسألة إعفاء الأجزاء والمكونات اللازمة لإنتاج الموبايلات من الضريبة والرسوم.. بيأكد أن الحكومة المصرية بتستهدف تخفيف الأعباء الضريبية عن النوع ده من الصناعة لأنه مهم جدا.. وكمان دلوقتي محدش يقدر يستغنى عن الموبايل.
والمذكرة اللي قدمتها وزارة المالية بتقول كمان إن الإعفاء اللي اتكلمنا عنه هيشمل كل أجزاء الموبايل، واللي هيكون عليه رسوم هي الأجهزة المستوردة بالكامل بغرض الإتجار في الأسواق المحلية.
انخفاض الأسعار
محمد طلعت رئيس شعبة المحمول في الغرقة التجارية، قال إن الإعفاء على مستلزمات المحمول هيكون بنسبة 5% ومجلس النواب وافق على القرار بشكل نهائي وكل مستلزمات المحمول بقت معفاة تماما.
وقال كمان إن القرار ده هيكون سبب في انخفاض سعر الموبايلات.. يعني الموبايل اللي سعره كان 3000 جنيه هيقل 150 جنيه بعد تخفيض الـ 5%.
وعن ميعاد التطبيق الفعلي للقرار.. قال إن التطبيق من وقت صدور القرار يعني لو حبيت تشتري موبايل دلوقتي هتلاقي سعره أقل 5% عن السعر اللي كان قبل كدا.
وقال كمان إن في بعض الصعوبات في استيراد قطع الغيار من الخارج.. لأن الاستيراد متوقف في الفترة الحالية.. لكن قطع الغيار المحلية موجودة ومتوفرة بشكل كبير.
