من الأسرار عن الفنان الراحل نور الشريف إنه تربى في بيت عمه على المبادئ، وفي صباه كانت كرة القدم هوايته، لكن موهبته في الفن كانت اكبر واكتشفها فجأة، حب نور الشريف للفن بدأ في يوم لما كان واقف في شباك بيتهم في حي السيدة زينب.
فلقى في وشه سينما “إيزيس” وفجاة قرر يقطع تذكرة علشان يعرف ايه اللي بتعرضه، ولما دخل السينما اتفرج “نور” على 3 أفلام منهم واحد لأسطورة الكوميديا في العالم شارلي شابلن.
والتاني كان “إسماعيل ياسين في البحرية” لنجم الكوميديا اسماعيل ياسين وعبد المنعم ابراهيم واحمد رمزي، وبعد خروج الجمهور من سينما ايزيس، نور الشريف كان مبهور بالسينما اللي كان أول مرة يدخلها لدرجة إنه وهو خارج كان ماشي بيقلد طريقة مشي “شارلي شابلن”.
الموضوع ده فضل معلق مع نور الشريف شوية كتار لدرجة إن أطلق عليه الناس في الشارع بتاعه وقتها “شابلن الصغير” وبدأ نور الشريف يرتبط بالفن اكتر ويتابع حركات الفنانين ونظرات عنيهم.
نور الشريف كان مشتت اوي بعدها، كان شايف ان موهبته الكبيرة في لعب الكورة لكن الفن بقى حلم حياته، قدم في كلية التجارة وفشل فيها علشان يكون ده اخفاقه التاني بعد هواية الكورة وقدم في معهد الفنون المسرحية.
لما خد ورقه من كلية التجارة قدمه في معهد الفنون المسرحية كان ده بدون علم اهله وبدا نور يشق طريق التمثيل، اتقبل في المعهد من خلال مشهد من مسرحية “هاملت” اللي دربه عليه ابن منطقته الفنان محي اسماعيل.
في الوقت ده عرفت اسرته انه عاوز يمثل فقطعت عنه المصروف،أداله صديقه “محمود الجوهري” 3 جنيه من جيبه كمصروف كل شهر لحد ما انطلق في عالم التمثيل.
نور من قلة المصروف كان بيمشي كل يوم من المعهد لبيته، ومن كتر المشي الجزمة بتاعته دابت، واضطر يشتغل كومبارس بـ 50 قرش في اليوم في عدد من الاعمال المسرحية والسينمائية زي فيلم النظارة السوداء ومسرحية الزلزال، ودي كانت مخاطرة في الوقت ده لأن كل الل بيظهر ككومبارس مش سهل إنه يطلع في أدوار صف أول.
بعدها التلفزيون اعلن عن مسابقة للوجوه الجديدة وكان رئيس اللجنة الفنان نور الدمرداش، قدم فيها نور وسالته اللجنة هتقدم إيه فقالهم هيقدم مشهد من مسرحية هاملت وكان وقتها عمره 17 سنة.
وقبل ما ينطق نور الشريف بكلمة نور الدمرداش سأله قاله انت متأكد إنك في معهد الفنون المسرحية فقالهم آه، فقالوا له روح وهنبعت لك واتفاجئ بعدها نور الشريف انه سقط في الاختبار فعاش ازمة نفسية تالتة.
بعدها اصر انه يكمل حلمه، ووقتها كان مخرج مسرحي اسمه كمال عيد كان راجع من المجر وبدا يعلن عن تحارب فنبة، فعمل كمال عيد مسرحية روميو وجولييت واختار نور الشريف كبطل للمسرحية.
واختاره هو وثناء ماهر ومضى معاه عقد قيمته 150 جنيه كاجر، واشترى بها ملابس جديدة شوية بدل على كرافتات، واختار قبل تمثيل دوره في روميو وجولييت مع اخته عواطف اسم نور الشريف على اسم نجمها المفضل في الوقت ده عمر الشريف.
بدا يعمل بروفات ويشارك في اعمال فنية كتيرة لدرجة انه عمل 3 افلام ورا بعض بعد ما الصحف كتبت عنه، وبدا الجمهور يعرفه اكتر من خلال موهبته، ومن اوجاعه لما كان بيصور فيلم الكرنك جاله خبر رحيل والدته.
اللي تصالح معها بعد سنوات طويلة، وكمان اتعرف على الفنانة بوسي اللي كان عمرها في الوقت ده 14 سنة وعاش معاها قصة حب استمرت سنوات طويلة اوي.
