هل ممكن أن يكون عندك كنز في بيتك ولا تعرفه ؟ .. حاجات كثيرة تكون موجودة في بيوتنا من زمان وننساها على الرف،دون ان نعرف قيمتها، وهل يتخيل أحد إن مصروف زمان الشلن والبريزة والربع والنص جنيه يصبح قيمتهم آلاف الآن، ويباعوا بالدولار!
طب ياترى لو معاك الفلوس دي في بيتك تعمل إيه وتستفاد بيهم إزاي، وسعرهم كام دلوقتي؟ ، كل الأسئلة دي هنجاوبكم عليها في حلقتنا النهاردة خليكم معانا:
جملة «بيع العملات القديمة» انتشرت أوي على محركات البحث بمواقع التواصل الاجتماعي وده لأن في كتير من المصريين عندهم هوس جمع العملات القديمة وبيعها.
ودايما بيدوروا على أعلى سعر للعملات اللي معاهم في سوق العملات القديمة، وده اللي أكده محمد الحربي، تاجر عملات قديمة، وقال في تصريحات ليه إن كل العملات اللي صدرت في عهد الملك فاروق مطلوبة دلوقتي وبيتحدد سعرها حسب حالتها، وعشان من المعروف أن العملات الورقية بتبوظ بسرعة فبتكون العملات دي نادرة خاصة لو حالتها كويسه وبيوصل سعرها لـ100 ألف جنيه حسب الفئة وتاريخ الإصدار وتوقيع محافظ البنك المركزي.
أما بقى لو معاك شلن ورق في درج قديم في البيت، ومكتوب عليه «الدولة المصرية»، وده اللي صدر في أواخر عصر الملك فاروق، أحب أقولك إن سعره دوقتي بـ آلاف وده طبعًا حسب حالته، أما الشلن (5 قروش) اللي المكتوب عليه «جمهورية مصر العربية»، واللي صدر في عهد الرئيسين الراحلين جمال عبدالناصر والسادات، للأسف ملوش حاليا قيمة وممكن يتباع بجنيه واحد بس، لكن سيبه شوية واصبر عليه، مين عارف بكرة يجيب تمنه!
وحسب كلام «الحربي» ف الطلب زايد اوى على البريزة الورقية الـ10 قروش وبيوصل سعرها لـ 60 ألف جنيه، وبيكون مكتوب عليها «الدولة المصرية»، أنا بقى القرش المرسوم عليه صقر واللي صدر سنة 1973 بيوصل سعره لـ 30 ألف جنيه
بس خلي بالك: «اللي مطلوب في سوق العملة القرش الألمونيوم مش النحاس»، وكل ما العملة بيكون مكتوب عليها كلمة غلط أو فيها عيب بتكون نادرة وبالتالي سعرها بيرتفع.
ولو معاك نص جنيه فـ يبختك وده لأنها على الرغم إنها موجودة في السوق لكن في فئات منها مطلوبة جدا عند تجار العملة، وسعرها بيوصل لـ100 ألف جنيه
و الفئات المطلوبة بيكون إصدارها قديم وبيظهر عليها صورة أبو الهول في النص، وكمان اللي فيها صورة أبو الهول على الشمال مطلوبة جدا، وده يعتبروا الأغلى في أسواق العملات القديمة في الفترة دي.
لكن خلي بالكم الناس بتخلط بين عملات «جمهورية مصر العربية» و«الدولة المصرية».
ولو الشروط دي متوفرة في العملات اللي معاك ، فـ أحب أقولك إنك هتلاقي تجار عملة كتير يشتروها وهيبدأ السعر من 10 آلاف ولحد 100 آلف وحسب حالتها بيتحدد السعر ، وتقدر تبيعها في منطقة وسط البلد واللي بتعتبر من أشهر الأماكن اللي بيتباع فيها العملات القديمة، وده بيكون عن طريق مزادات بيتعلن عنها في عدد من المحلات، غير كمان منطقة خان الخليلي وشارع عماد الدين، والألفي واللي تقدر تبيع فيهم برده.
قولنا لو اكتشفت إن معاك عملات قديمة في بيتك هتعمل بيها إيه؟
