الإعلامى تامر أمين عمل مبادرة منذ أيام،و كان هو القائد لها ودعى كل المصريين لأكل لحوم الحمير ..مالها لحوم الحمير؟
كان لما تحب تتريق على حد وتعزمه على العشا ..هتوديه على اى عربية فى الشارع أو أى مطعم والسلام ..لكن دلوقتى العشوة دى هتكون للغالى عندك وبس ..
السؤال هنا هل لحوم الأحصنة والحمير أمنة؟ تامر أمين رد وقال عشان الناس اللي بتبقي خايفة ويقولك أنا أكلت امبارح سندوتشات سجق وكبدة وبيتهيقلي أنها لحم حمير ممكن أموت أو اتسمم فأنا بطمنه وأقوله متقلقش أوى ..
يعنى لو حصلت أى أعراض مشكوك فيها قبل كده ..أكيد مش من لحمة الحمير ..لحمة الحمير أمنة تماما لحم حمير ايه بس يا أستاذ تامر! مع كامل احترامي لحضرتك يا ريت نتوخي الدقة والحذر لما تتناول المعلوماتً دى، ده كان رد علاء مبارك على تصريحات الإعلامى تامر أمين اللى قلبت الناس عليه ..
ده غير كمان إن دار الإفتاء أكدت إن أكل الحمير حرام شرعا .بس تامر أمير بيأكد إن الدول المتقدمة بياكلوها عادى ..فليه منكلهاش إحنا كمان؟ده غير إنها من أغلى الأطباق فى باريس ..ومن ناحية اللذاذه مفيش بعد كده بتدوب دوبان فى بقك ..
ده طبعا طعم اللحمة هنا بيكون غير أى مكان تانى قبل ما تعرف إن اللى بتاكله لحم …ولا بلاش !ولو فى ساعة صفا كده وطلبت من مطعم مشهور كيلو مشكل بسلطاته ببابا غنوجه أبقى خلى الدليفرى ياكل معاك ..وأهو ينوبك ثواب .
الغريب بقى رغم كل الهوجة والضجة والخناقات على السوشيال ميديا الحمير تصلح للاكل لو متصلحش !..الكل بقى منتظر المسؤولين وخبراء التغذية يقولوا إنها مضره ومينفعش ..لكن العكس هو اللى حصل؟
وبقيت الناس مش عارفة تصدق مين وتكدب منى ..يعنى ناكلها وإحنا عاملين نفسنا مش عارفين ؟ لا
الحقيقة إن الدكتور مجدى نزيه إستشارى التثقيف والإعلام الغذائى بالمعهد القومى للتغذية قال بردوا إن لحم الخيول والحمير أمن تماما
في مداخلة هاتفية ببرنامج “آخر النهار”، مع الإعلامي تامر أمين، قال بيسمح في بعض الدول تناول اللحوم دى لأنها تخضع للرقابة، وبالنسبة للدول اللى مش بتسمح باستهلاك اللحوم دى ، مش بتخضع لأي رقابة، فسعر لحوم الخيول مرتفع جدًا بالمقارنة بأسعار اللحوم العادية.
تصريحات زى دى خلت الجمهور يسترجع ذكريات كل مرة فكر فيها ياكلوا لحوم بشكل عام .كمان مفيش أى مانع من تناول لحوم الحمير والخيول، ولكن الموضوع يحتاج إلى موافقة مجتمعية قبل التشريع القانوني، مجتمعات كتير بتاكل الحشرات وأخرى مش بتقبل ده ، فالأمر خاضع لأذواق الشعب..
الدكتورة مروة شعير رفضت الكلام ده كله وقالك إن مش معنى إن بعض الشعوب بتاكل الحشرات ولحم الحمير نبقى ناكلها إحنا كمان.
طيب نفترض إنك إشتريت اللحمة وهتسويها فى البيت تعرف إزاى إنها لحم بقرى ولا حمير؟عارفة لما تطبخى اللحمة وتقولى والنبى الشوربة زى العسل ..دى تبقى لحوم خيول وبيكون لونها غامق مايل للأزرق او الأسود .ورحتها بتقلب بعد السوى مفس ريحة الإسطبل كده ..ده غير طبقات الزيت اللى على الوش ..
و لو لاحظتى يا ست الكل العلامات دى قبل كده ..فالحل بيكون تعملى البدع فيه،وتدخلى بشو عجيب علشان تحلى فى الشكل واللون والطعم ..معندناش حاجة تترمى وبألف هنا وشفا.
