مع ارتفاع اسعار اللحوم في الاسواق، وأيضصا ارتفاع سعر الدواجن، فقد قرر المعهد القومي للتغذية أن يوجه نصيحة للمصريين ليحصلو على الفائدة الغذائية وبأرخص ثمن، ولكن بمجرد انتشار تلك النصيحة على السوشيال ميديا أحدثت ضجة كبيرة، فما القصة؟
المعهد القومي للتغذية والتابع للهيئة العامة للمعاهد والمستشفيات التعليمية وجه رسالة للمصريين وقالهم ياريت تعيدوا نظر في اكل رجول الفراخ أو “أقدام الدجاج:
سعرها رخيص جدا في السوق وتمن الكيلو فيها بيبدأ من 5 جنيه لغاية 10 جنيه، وكمان مصدر غني للبروتين.
وبدأت الحكاية لما المعهد كتب على صفحته عالفيسبوك يسأل: بتدور على بدائل غذائية تكون غنية بالبروتين و في نفس الوقت توفر ميزانيتك؟
الإجابة كانت أرجل الدجاج، واحد من المصادر الغير مكلفة وتعتبر كمان غنية بالبروتين غير انها بتحتوي على سعرات حرارية ولكن بصورة معتدلة، وبتوفر رجل الدجاجة 106 سعرات حراري في حين أن الفخذ بدون جلد يحتوي على 176 سعر حراري!
كمان بتحتوي أرجل الدجاج على البروتين والفيتامينات و المعادن اللازمة لإصلاح أنسجة الجلد ونمو العضلات.
غير إنها غنية بالكولاجين الضروري عشان: تجديد خلايا البشرة، وتأخير علامات الشيخوخة والحفاظ على صحة الشعر و الاظافر، ومنح الغضاريف المرونة اللي بتساعد المفاصل على الحركة ودة بيساعد على تخفيف الام المفاصل.
كمان هى مصدر مهم للڤيتامينات و المعادن اللى محتاجها الجسم زي الفسفور والسلينيوم اللى ليه دور مهم فى الحفاظ على الهرمونات المسؤولة عن الغدة الدرقية
يعني أرجل الدجاج بتحتوي على 18.5 ميكروجرام من السيلينيوم، و 158 ميللجرام من الفوسفور، يعني 34%، و 23% من الكمية الموصى بتناولها يوميًا!
ولسة معهد الأغذية مكمل في نصايحه وبيقول ان أفضل طريقة لتناول أرجل الدجاج إنها تتقدم مشوية مع شوية زعتر، وفلفل أسود المطحون قبل التقديم، وشوية من زيت الزيتون.
والنصيحة انتشرت على الفيس من هنا والناس استغربت وقالت يعني ملقتوش غير رجلين الفراخ عشان تكلمونا عن فوايدها، وناس تانية بتسأل طيب باقي الفراخ مين هياكلها؟
بس في الحقيقة بوست معهد التغذية اتكلم عن الاكلات المعروفه علي المستوي الشعبي ورخيصة بس في نفس الوقت مصدر مهم للبروتين زي أرجل الدجاج طبعا، وكمان الكوارع، وسلطة حمص بالطحينة، وأجنحة دجاج مقلية، وشوربه العدس.
ووعد المعهد انه يقدم سلسلة مقالات عن البدائل الإقتصادية للبروتين، بس حظه بقى انه بدأ برجول الفراخ فالناس ركزت معاه.
وخصوصا بقى ان قطاع الدواجن بقالوا فترة كبيرة بيعدي بأزمات ملهاش من اول اخر، مرة الاعلاف ناقصة من السوق ومش لاقيينها، ومرة الاعلاف موجودة بس السوق السودة رفع سعرها في السما، ومرة نشوف فيديوهات لمربين بينهوا حياة الكتاكيت ، والمستهلك واقف في النص مش عارف يدفع منين..
وبسبب النقص ده، سعر البيض زاد بشكل مبالغ فيه والكرتونة بقت ب95 جنيه، ونفس الكلام في أسعار الفراخ سواء البيضة أو البلدى.
انتوا بقي شايفين فكرة رجول الفراخ ازاي؟ طيب هي سعرها كام في منطقتكم؟
