أنت عيل مأجور وعايز تركب التريند.. أنت مزقوق علينا.. هذا كان رد المستشار مرتضى منصور على مشجع زملكاوى دخل معاه فى مشادة كلامية وقلبت بخناقة وسط الكاميرات والصحفيين.
طول عمرنا نسمع عن خناقة مرتضى منصور مع مسؤوليين ولاعيبة كرة وقضايا ومحاكم وبلاغات وليلة كبيرة ملهاش أخر، ومحدش قادر عليه بردوا ومحدش يقدر يقوله تلت التلاتة كام ..كله بيكون بالصوت والصورة!
إنما خناقة لمرتضى منصور مع واحد من مشجعى الزمالك؟ لا دى اللى جديدة وإزاى إستجرى يقوله كده ويتخانق معاه؟ مش هتصدق المشادة الكلامية بينهم وصلت لخناقة شوارع وتشابك بالأيدي والجماهير على السوشيال ميديا هايصين فى الهيصة.
مشجع الزمالك ده أدى لمرتضى منصور من المنقى خيار وجاله على الجرح، ماهى الحقيقة دايما مرة وبتوجع، وعلى عكس المتوقع إن الكل بيخاف منه ومحدش يقدر يدخل فى جدال معاه لا ده عمل عمايله.
ياترى إيه سبب الخناقة أصلا؟ وليه منصور قال لمشجع الزمالك إنت عيل مأجور ومزقوق علينا ؟ وإيه علاقته بالخطيب ؟
الخناقة اللي تمت بين مرتضي منصور ومشجع الزمالك بدأت بمناقشة عادية جدا، والمشجع بيقوله فين البطولات يا سيادة المستشار؟ احنا تعبنا.
منصور قاله ما احنا أخدنا الدوري.المشجع رد وقال ده السنة اللي فاتت، فين أفريقيا؟ مخدناش لقب أبطال أفريقيا من 20 سنة.
منصور مسكتش لا وقاله متنساش تحقيق الدوري والكأس في الموسم اللى فات.. في 2005 تم حل مجلسي وبردوا في 2020، ده اللى بيحصل معايا كل ما جلست على كرسي رئاسة الزمالك لمدة سنتين أو 3 سنوات “.
المشجع الزملكاوي جاب ورا شوية وقاله وقفنا ضد الكل وفى ضهر معاليك علشان خاطرك .. أنت بتقول إن البعض حصد ما زرعته، احنا النهاردة لا بنزرع ولا بنحصد.. جمهور الأهلي بيذلنا يا سيادة المستشار، فين الصفقات؟
الكلمة دي استفزت منصور جدا وقاله فين الصفقات؟أقولك فين ومتزعلش؟لو قولتلك هتزعل .. بطل جعجعة على الفاضي،
المشجع ساعتها استغرب وقاله حعجعة ايه إنت مش مدينى فرصة أتكلم..منصور جابه وسأله براحة كده أنت جاى هنا ليه؟ انت حضرت معانا الجلسة؟
.المشجع طبعا لانه محامي فطبيعي يكون موجود في المحكمة وقاله لا محضرتش بسبب شغلي ،أنا محامي على فكرة .
منصور قاله بلاش يبقى مش علشان النادى،شوفت بقي ! مسماعكش و يالا..انت عيل مأجور وعايز تركب التريند. إنت مزقوق علينا
المشجع استغرب تاني وقاله فين التريند ده ،أنا عمرى ما اكون تريند على حساب النادى .. أولع انا وأى حد المهم النادى
منصور استفز اكتر واضايق وقاله إنت جاى مخصوص هنا المحكمة علشان تستفزنى بقي .
ده الحوار اللى دار بين المشجع الزملكاوى وبين مرتضى منصور فى محيط مجلس الدولة، على هامش جلسة النظر في قضية أزمة قيد صفقات الزمالك،النهاردة.
بعد المشادة دى حاول بعض الللى كانوا حوالين منصور الاعتداء على مشجع الزمالك، لكن مرتضى منصور تدخل ودافع عنه وبعده عن الناس وعن الكاميرات علشان ينهى الموضوع بدون أى خساير .
وده الكلام اللى كل زملكاوى بيقوله ونفسه يقوله لمرتضى منصور شخصيا ،وهو عارف طبعا وهتكون دى الإجابة المتوقعة هى على كل زملكاوى يكون ضد النادى او ضد أى قرار رءيس النادى خده او هياخده .. منصور هيشوف أى زملكاوى مش مؤيد لقراراته إنه عيل مأجور وعايز يركب التريند.
منصور قال “الجماهير المحترمة هي اللي تقف مع فريقها في مكسب وخسارة ، في صفحتين معروفين أنهم بيقبضوا عشان يشوهوا صورة النادي طول الوقت ويهدوه.
كده نطرية المؤامرة بقيت جزء لا يتجزأ الفترة الأخيرة فى الزمالك،ودايما منصور شايف إنه محسود هو وناديه والعيون عليه والمؤامرات ضده مفيش أكتر منها … ياترى شكوكه صح؟
وبخصوص قضية قيد الزمالك اللى منصور كان رايح مجلس الدولة بسببها.. قررت محكمة القضاء الإداري بمجلس الدولة، برئاسة المستشار محمد الطاهر، إحالة الدعوي المقامة من مرتضى منصور رئيس نادي الزمالك، للمطالبة بإلزام اتحاد الكرة بقيد ثلاثة لاعبين ” ناصر منسي وأحمد بلحاج ومحمود شبانة” واللى تعاقد معاهم النادي خلال الفترة الللى فاتت لهيئة المفوضين وتحديد جلسة 5 مارس لإعادة المرافعة.
منصور كان قايل فى دعوته اللى قدمها :إنه بسبب موقف شخصي من اتحاد الكرة ضد الزمالك ورئيسه، أصدر رئيس الاتحاد قرارا إلى المدير التنفيذي للاتحاد، بإصدار عقوبة ضد نادي الزمالك وثلاثة من لاعبيه بإيقاف قيدهم رغم تسجيلهم على السيستم في الميعاد القانوني، دون أي مبرر قانوني أو لائحي، وبالمخالفة لقانون الفيفا.
وأكد إن عقوبة إيقاف القيد للاعبي نادي الزمالك أو النادي أو لغيره من الأندية لازم تصدر من الاتحاد الدولى لكن الاتحاد خالف قانون الفيفا وقانون الرياضة ،و رفض قيد الثلاثي “ناصر منسي، أحمد بلحاج، محمود شبانة” العائد من الإعارة.
منصور فى تصريحات صحفية قال: الأهلي نادٍ محترم، أتشرف بعضويته من سنة 1974 قبل الخطيب.. اختلافي مع الخطيب ميقللش من قيمة الأهلى، المشكلة بيني وبين الخطيب هتنتهى فى يوم من الأيام ،ولكن مينفعش توصل الأمور إلى احتقان بين الجماهير، دى هي النصيحة اللى بوجهها لأخويا محمود الخطيب.
