حالة من الجدل الكبير أثارها أحد الشيوخ الذي نشر بوست على السوشيال ميديا يقول: يا شباب اتجوزوا بسرعة لأن الرسوم على الجواز هتكون 30 ألف جنيه خلال الفترة الجاية”.
البوست الذي نشره المأذون الذي انتشر على السوشيال ميديا وجدنا ورائه مفاجآت كثيرة، أولها من هو المأذون ده وهل حقيقي هو مأذون أم لا؟ لماذ تحدث عن هذه الرسوم، وهل ستطبق هذه الرسوم بالفعل، كل هذا سنتعرف عليه من خلال التقرير التالي:
مفيش كلام على السوشيال ميديا خلال الساعات اللي فاتت إلا على الرسوم الجديدة اللي هتطبقها الحكومة على المتجوزين واللي هتخلي أي شاب جاي يتجوز لازم يدفع مبلغ رسوم لصندوق حماية الأسرة وكمان يعمل كشف طبي.. لكن اللي أثار الجدل أكتر خلال الفترة اللي فاتت هو بوست كان منزله مأذون شرعي قال فيه : اتجوزوا بسرعة يا شباب ونصح أي حد أنه يلحق يتجوز بسرعة قبل ما الجواز يغلى وأنه قال إن الفترة الجاية اليل هيتجوز لازم يدفع 30 ألف جنيه للحكومة والقرار ده هيطبق خلال الساعات اللي جاية عشان كده بينصح أي حد بيفكر يتجوز أنه يخلص نفسه بسرعة قبل ما يطبق القرار الجديد بسرعة.
البوست ده عمل حالة من الجدل الكبير على السوشيال ميديا والكل بيسأل معقول الحكومة بلغت كل مأذون أن هيكون الرسوم على العقد 30 ألف لصندوق حماية الأسرة.. ولأن الكلام كان طالع من مأذون شرعي فطبعا الناس صدقته وتداولت البوست بتاعه بصورة كبيرة وده اللي عمل حالة جدل وأصبح الكل بيسأل معقولة اللي هيتجوز يدفع 30 ألف جنيه مرة واحدة في الوقت اللي كل تكاليف الجواز أصبحت صعبة جدا ومكلفة.
حالة الجدل دي خلت الحكومة تتحرك بسرعة وبالفعل وزارة العدل قالت إن المأذونالشرعي اللي عامل الصحفة واسمه ياسر قرشي أصلا مش مأذون ..لكن بيشتغل مساعد لمأذون اسمه محمد محمد درويش مصطفى.. التحقيقات في الواقعة كشفت عن أن ياسر القرشي ده أصلا قارئ قرآن ومش معترف به كمأذون شرعي من الأساس في وزارة العدل، وبعد كده اشتغل مساعد للمأذون وعمل صفحة على فيسبوك وقناة على اليوتيوب.
التحقيقات كشفت عن مفاجآت عن أن ياسر القرشي عمل الصفحات دي عشان يكسب منها فلوس وحاول استغلال وظيفته في أنه يعمل حالة من الجدل ويستغل التريند الخاص برسوم الجواز وأنه معروف أنه مأذون بخلاف الحقيقة عشان يروج لنفسه وبالتالي يقدر بعد كده يحقق مشاهدات وأرباح.
وزارة العدل أحالت واقعة اتجوزوا بسرعة يا شباب إلى النيابة العامة، عشان تحقيق في المنشور على السوشيال ميديا خاص أنها عبارة عن شائعات مُغرضة الغرض منها تعرض المواطنين للنصب، وبالفعل بعد التحقيقات أمرت النيابة بالقبض عليه وبالفعل ألقت قوات الأمن القبض عليه وبيتم التحقيق معه في الوقت الحالي بتهمة انتحال صفة مأذون وإثارة الرأي العام بشائعات كبيرة.
طيب هل هو حقيقي هتكون رسوم الجواز بالشكل ده؟
مصادر في الحكومة كشفت عن أن الصندوق الجديد اللي معمول لحماية الأسرة الهدف منه حماية الأبناء لو حدث انفصال وأن الدولة هي اللي هتدعمه بفلوس كتير لكن الفكرة أنه هيكون في رسوم بسيطة جدا على كل واحد جاي يتجوز عشان يتم تسجيل بياناته في الصندوق وبالتالي لو حصل انفصال يكونوا الأبناء في حماية والدولة تقدر تصرف لهم مساعدة.
