كلام كثير ظهر على الساحة في الفترة الأخيرة بعد ارتفاع الدولار ووصوله ل30 جنيه تقريبا، وهذا غير أزمة الأسعار التي جعلت الناس تشكو فهل فعلا الحكومة ستتغير؟
خلال الساعات الأخيرة انتشرت تصريحات للإعلامي مصطفى بكري عضو مجلس النواب اتكلم فيها عن تغيير وزاري مرتقب والناس بتسأل مين ماشي ومين قاعد.
خصوصا يعني ان الإعلامي الشهير أكد إن في اجتماع للجنة العامة في مجلس النواب عشان يناقشوا أمور مهمة وده خلي الناس تشك اكتر.
بس في مصدر مطلع نفى اجراء مجلس النواب مشاورات بخصوص حركة المحافظين أو تغيير وزاري في المرحلة الحالية .
كمان قال إن التصريحات المنشورة لبعض أعضاء مجلس النواب عن رحيل الحكومة مش صحيحة والأمور الخاصة بإجراء أي تغيير وزاري أو تعديل في بعض المحافظات بتتم وفق آليات ومعايير محددة.
وحسب جدول أعمال البرلمان، المفروض الجلسة العامة تناقش تقرير اللجنة المشتركة من لجنة السياحة والطيران المدني، ومكتب لجنة الخطة والموازنة بشأن مشروع القانون المقدم من الحكومة والخاص بإنشاء الغرف السياحية وتنظيم اتحاد لها.
بس برضه ده يخلينا نسأل هو مصطفى بكري كان قال إيه بالظبط عشان يعمل البلبلة دي كلها في الشارع؟
الإعلامي قال إنه على المستوى الشخصي ميقدرش يجزم بحقيقة إجراء تغييرات في الحكومة من عدمه، بس من قراءته للواقع هو شايف أن القيادة السياسة بتدرس الموضوع ده كويس اوي والريس عارف ان الشعب عاوز تغيير الحكومة .
وخصوصا بقى ان الشارع المصري عنده حالة من الإحباط؛ اتجاه التعديلات الوزارية الأخيرة وتحديدا بعض الأسماء في وزارات بعينها.
وده كان أحد أسباب تأجيل حركة الإعلان عن المحافظين الجدد؛ عشان يختاروا شخصيات على قدر المسؤولية، ودلوقتي حركة المحافظين جاهزة.
طيب هل الأمر محسوم؟ مصطفى بكري قال إن الموضوع فيه وجهتين نظر، الأولى بتنادي بضرورة اجراء التغيير السريع النهاردة قبل بكره لاحتواء الشارع المصري.
وكمان فاضل سنة على الانتخابات الرئاسية الجديدة، وتغيير الحكومة هيكون زي نقطة ضوء وأمل للخروج من الأزمة الراهنة بمسار جديد وأشخاص تانية.
والظرف اللي احنا فيه محتاج شخصية اقتصادية تقدر تتعامل مع التطورات والتحديات الاقتصادية؛ وتبعت رسالة للناس جوة وبرة ان مصر داخلة على مرحلة جديدة عشان تكمل المشروع الوطني بآليات وأساليب مختلفة.
أما بقى وجهة النظر التانية فبتأكد صعوبة إيجاد رئيس حكومة جديد وفق المعايير المطلوبة وسط الظروف الحالية، بس مصطفى بكري عنده مفاجأة!
الإعلامي قال إن في أسماء مطروحة محدش يتوقعها وفي اسمين تحديدا حواليهم كل الكلام.الاتنين دول من كبار الاقتصاديين؛ واحد منهم كان وزير في فترة مبارك والتاني بعد 30 يونيو.. لكن لسة الأمر متحسمش لغاية دلوقتي.
انتوا بقي شايفين الحكومة مكملة ولا هنودعها قريب؟ وهل في اسم محدد شايفينه الأنسب للظرف الصعب اللي احنا فيه؟
