ناس كثيرة تنتظر تطبيق قانون تصالح البناء الجديد الذي أعلنت عنه الحكومة من فترة عن إجراء بعض التعديلات فيه حتى يتمكن الكل من تقنين أوضاعه.
بس انتشر بعض الكلام عن زيادة قيمة التصالح بعد ارتفاع الأسعار هل الكلام ده صح ولا غلط؟وقيمة التصالح كام؟ وباب التقديم هيتفتح أمتى؟ وإيه هي اشتراطات البنا الجديدة؟
الحكومة أعلنت من فترة عن حزمة تعديلات جديدة في قانون البناء وده عشان تسهل وتبسط الإجراءات على المواطنين اللي حلمهم يتصالحوا مع الحكومة ويعيشوا بشكل طبيعي.
لكن انتشرت خلال الفترة الأخيرة اشاعات بارتفاع تكلفة التصالح بسبب ارتفاع الأسعار ياترا إيه حقيقة الكلام ده؟
بحسب تصريحات أحمد السجيني رئيس لجنة الإدارة المحلية بمجلس النواب في برنامج صالة التحرير، إن مفيش تغيير في قيمة التصالح بمخالفات البنا بسبب ارتفاع الأسعار وغلاء المعيشة وكل اللي بيتقال مش حقيقي.
وقال كمان إن الهدف من تعديلات قانون التصالح هو توفير الرخص وده عشان ميقعش المواطن فريسة لجماعات المصالح
وإن تعديلات القانون الجديدة بتقدم تيسيرات كتير زي مشكلة الإحلال والتجديد وحل مشاكل طلبات المليون حالة اللي كانت هتترفض
ما هي حكاية المليون حالة؟
بحسب تصريحات سابقة للسجيني لموقع صدى البلد في شهر ديسمبر اللي فات إن في مليون و400 ألف طلب تصالح عبارة عن بناء على الأراضي الزراعية خارج الحيز، منهم 920 ألف طلب خارج نطاق التصالح أصلا ودول عبارة عن وحدات سكنية أسر عايشة فيها.
ولما أتسأل هل هيتم هدم الوحدات دي؟رد وقال إن بعد التعديلات الجديدة في القانون خلاص الأزمة هتتحل وده لأن تم التوصل لاتفاقيات إيجابية خلال مناقشة لجنة الإسكان
وعشان كده طلب من مجلس الوزراء إنه ينتهي من النظر في تعديلات القانون في أسرع وقت عشان ميتمش تأجيل تنفيذه السنة الجاية بسبب الإجراءات اللي بتاخد حوالي 3 شهور من الموافقة على التعديلات
وقال كمان إن لو الحكومة عايزة تقضي على مخالفات البناء لازم توفر الرخص بطرق كريمة عشان المواطن ميستسلهش البناء بشكل غير رسمي
لكن السؤال هنا رسوم مخالفات البنا كام؟ بحسب تصريحات مصدر مسئول في وزارة التنمية المحلية لموقع الشروق إن رغم تعويم الجنيه أكتر من مرة وخفض قيمته خلال الشهور الأخيرة إلا أن قيمة التصالح هتكون زي ماهي في القانون الجديد
وقال إن أسعار قيمة التصالح في القانون القديم كانت بـ 50 جنيه حد أدنى للمتر في القرى و 2500 للمتر كحد أقصى في المدن وإن الأسعار دي هيتم تطبيقها في القانون الجديد من غير أي تغيير
بس يا ترا إيه شروط قانون البنا الجديدة عشان تبعد عن المخالف؟بحسب المصدر قال ضمن إشتراطات البنا الجديدة إن الأرض اللي هيتم البنا عليها تكون داخل كوردن سكني بالإضافة أنها لازم تكون مقننة
طيب أمتى تقدم على التصالح ده ؟بحسب تصريحات نادر سعد المتحدث الرسمي لرئاسة مجلس الوزراء إن المجلس وافق على فتح تلقي طلبات تقنين واضعي اليد وكمان وافق على تعديلات القانون
وقال إن بمجرد ما مجلس الشعب يوافق عليه هيطبق والباب هيتفتح لتقنين الأوضاع لمدة 6 شهور وبكده هتقدر تتصالح برضو في مخالفات البنا لأن القانونين مرتبطين ببعض.
ودلوقتي قولنا إيه رأيك في قانون البنا الجديد؟
