لو كنت تبحث عن فرصة عمل وتعاني من مشكلة البطالة، فلا داعي للحزن أو القلق حيث أنه لن يكون فىه عاطل واحد في مصر.
وده بعد ما الرئيس السيسي أعلن أنه حاليا بيتم العمل على توفير مليون فرصة عمل في السنة الواحدة، أيوة زي ما سمعتوا بظبط مليون فرصة عمل للمصريين
طيب ياترى فرص العمل دي هتكون فين والتقديم عليها هيكون إزاي وإيه الشروط المطلوبة، خليك معانا في الفيديو ده واحنا نقولك كل التفاصيل:
الرئيس عبد الفتاح السيسي دايما بيحاول في كل فرصة إنه يطمن المصريين ويعرفهم الدولة راحه فين وإيه المشروعات اللي بتتعمل الفترة الجاية.
وفي كلامه اللي كان طالع من القلب في حفل إفطار الأسرة المصري في حي الأسمرات قال للمصريين لازم يكون عندنا ثقة كبيرة في نفسنا وفي انجازاتنا.
قال كمان إن الدولة المصرية شغالة على تحسين الخدمات والمرافق للمصريين بشكل كبير وإن ربنا أكيد بيساعد اللي بيساند الناس.
وتابع الرئيس السيسي كلامه وقال: “لازم تبقى إيدينا في إيد بعض علشان نتقدم.. ولازم نكون واثقين في نفسنا وفي كل اللي أنجزناه”.
قال كمان إن الدولة الفترة دي بتعمل على توفير مليون فرصة عمل في السنة الواحدة للمصريين وده من خلال المشروعات الجديدة واللي بتساعد في خلق فرص عمل للشباب.
طيب ازاي الكلام ده ممكن يحصل؟
هقولك ياسيدي اولا لازم تعرف إن معدل البطالة في مصر انخفض لـ 7.2 وده الرقم اللي أعلنه الجهاز المركزي للتعبئة والإحصاء عن الربع الثاني من العام المالي 2022/2023 والحكومة ف الوقت ده حققت انخفاض وده لأنه في نفس الربع في 2021 كان معدل البطالة 7.4%.
أما بقى سجل أعداد المتعطلين فسجلوا 2.185 مليون متعطل بنسبة 7,2% من إجمالي قوة العمل منهم (1.194 مليون ذكور، 991 ألف إناث) مـقـابـل 2,250 مليون متعطل في الربع الثالث من 2022 بانخفاض حوالي (65) ألف متعطل بنسـبة 2,9 ٪.
ده كمان قوة العمل في مصر زادت ودلوقتي وصلت لـ 30.344 مليون فرد مقابل 30,264 مليون فرد خلال الربع اللي فات بنسبة ارتفاع حوالي 0,3٪
ودلوقتي بقى عندنا 25,200 مليون فرد على قوة العمل من الذكور أما السيدات فوصلت نسبتهم لـ 5,144 مليون فرد.
واللي تقدر تفهمه ببساطة من الكلام ده هو إن الدولة ماشية بخطة استراتيجية عشان تقلل معدلات البطالة وتوفر فرص عمل للشباب.
وده اللي اكدته وزيرة التخطيط والتنمية الاقتصادية الدكتورة هالة السعيد وقالت إن مصر شغالة على برنامج إصلاح اقتصادي عشان تجذب الاستثمارات الأجنبية وتأمن استقرار السوق.
وعشان كده الاقتصاد المصري حقق نمو بـ 6.6% السنة اللي فاتت وعشان كده السعيد توقعت نمو بـ 5.5% في 2023.
لكن خلي بالك النمو الاقتصادي أه ضروري بس مش كفاية وده لأنك لازم تعرف النمو ده حصل في أنهي قطاعات وده أثر علينا إزاي وبالاخص نقيس التأثير ده على معدلات البطالة والتوظيف ولا لأ؟
ومش بس كده دي خطة السنة الجديدة 2022/2023 بتستهدف زيادة معدلات الاستثمار في مصر لـ 15.2%، واحتواء معدلات التضخم عشان يستقر عن 10% وكمان تراجع معدل البطالة عشان يستقر في حدود 7.3%، وطبعا أهم مؤشر بالنسبة للدولة هو تراجع معدلات الفقر وبتستهدف الحكومة إنها توصل لـ أقل من 25%
دلوقتي قولنا وبكل صراحة رأيك في اتجاه الدولة لتوفير مليون فرصة عمل سنويا وهل ده هيكون كافي للقضاء على البطالة؟
