من منا لا يحلم بأداء فريضة الحاج ، ولكن أصبح حلم صعب على الكثير بسبب ارتفاع سعر الحج خلال السنوات الماضية، ولكن من خلال هذا التقرير سنكشف مفاجأة عن فرصة للحج بالمجان فتابعونا:
وزارة التضامن فتحت باب التقديم للاسراف على حج الجمعيات الأهلية وحسب إجراءات السنة كل 45 حاج ليهم مشرف والاختيار منقسم كالاتي : 80٪ للمشرفين القدام و20% للمشرفين الجدد.
بس طبعا في مجموعة شروط لازم تتوفر فيك، وأولها السن ميزدش عن 50 سنة للمشرفين الجدد، و55 سنة للمشرفين الخبرة.
كمان لازم تكون عضو مجلس إدارة أو عضو عامل بواحدة من الجمعيات المقيدة في الدولة وفقا لأحكام القانون 149 لسنة 2019.
وخد بالك، لازم تكون عضو في الجمعية بقالك سنتين على الأقل، والفترة دي بتبدأ تتحسب في أول يناير 2023.
وطبعا لازم يكون عندك اللياقة الصحية والبدنية والثقافة الدينية الصحيحة اللازمة لأداء المهمة بكفاءة عالية.
َلو اتوفرت فيك كل الشروط دي وورقك اتقبل، فأنت هتدخل اختبارات تحريرية إلكترونية.
وشرط أساسي حصول المشرف على حد أدنى (35) درجة في الاختبار التحريري من أصل 60 درجة والنتيجة بتظهر ليك على شاشة الكمبيوتر بعد نهاية الاختبار فورا.
وبعدها هيتعملك مقابلة شخصية مع المؤسسة القومية لتيسير الحج.
وكل ده هيحصل بمنتهى الشفافية عشان الحكومة تضمن ان عملية الاختيار مكنش فيها أي فساد، خصوصا ان المشرف واخد من اهم أسباب نجاح رحلات الحج.
أما بقى لو عاوز تعرف طريقة التقديم، فأنت بتجيب للنموذج المخصص للإشراف على حج الجمعيات من موقع المؤسسة، وتملا البيانات المطلوبة وتعتمده من الجمعية اللي انت تابع ليها.
بعدها هتسلم الطلب يدوي للمديرية اللي انت تابع لها في معاد اخره 16 فبراير، فيما عدا أيام الأجازات الرسمية.
والورق المطلوب منك هو الشهادة الطبية اللي بتثبت اللياقة الصحية للمرشح ودي بتطلع من المستشفيات الحكومية والجامعية.
وكمان صورة المؤهل الدراسي وصحيفة الحالة الجنائية والمستند الدال على سابقة الحج أو الإشراف ، وبطاقة الرقم القومي.
ومعاهم محضر اجتماع مجلس الإدارة اللي تم ترشيحك فيه، 2 صورة شخصية – صورة لائحة النظام الأساسي للجمعية، وصورة وصل لسداد مبلغ قدره 300 جنيه يخصص للصرف على إجراءات تنظيم الاختبارات التحريرية والشفوية بحساب المؤسسة ببنك مصر.
وبيتم اختيار المشرفين الحاصلين على أعلى الدرجات وفقًا لنتيجة الاختبارات، مع مراعاة التوزيع الجغرافي للمشرفين داخل كل محافظة.
طيب لو حصل ومعدتش من الاختبارات إيه الوضع؟ لسة عندك فرصة تعمل تظلم ب1000 جنيه، ونتيجته بتطلع خلال اسبوع.
أما بقى لو عاوز تحج مع شركة سياحة، فالاسعار السنة دي هتزيد 20%، وتكلفة الحج هتبدأ من 120 ألف جنيه
فقولنا بقى هل ممكن تقدم طلب عشان تطلع الحج من خلال الإشراف في الجمعيات الاهلية. وهل تعرف حد طلع الحج بالطريقة دي؟
