هبة عبوك تتخلى عن أشرف حكيمي بعد اتهامه بالاعتداء على فتاة في منزله

الأيام بتجري بسرعة، علاقة حب بدأت، وتكللت بالزواج، وبعده الإنجاب، ثم أصبح الحديث على الانفصال، وليس هذا فقط، حيث تسريع الإجراءات، هذا ما حدث بين أشرف حكيمي نجم منتخب المغرب وباريس سان جيرمان الفرنسي، وزوجته هبة عبوك، الممثلة الإسبانية من أصول تونسية، والتي ظهرت معاه خلال مونديال قطر الأخير ولفتت الإنظار.. ما الحكاية؟

النجم الشهير أشرف حكيمي، واللي كان ضمن التشكيل المثالي الأخير لأفضل فريق في العالم حسب الفيفا، حياته بدأت تاخد منعطف تاني قاسي، في الوقت اللي مجاله الرياضي في أفضل مراحله، وبيعيش حالة توهج كبيرة.

النجم أشرف حكيمي قبل أيام من تواجده في حفل الفيفا، عشان يستلم الجايزة، ويظهر بين التشكيل اللي ضم نجوم العالم، كان بيواجه اتهام من فتاة فرنسية، بإنه اعتدى عليها، في بيته في بولوني.

البنت راحت مركز الشرطة، وحكت الواقعة اللي حصلت، واللي هي إنها اتعرفت على حكيمي من خلال موقع إنستجرام في 16 يناير اللي فات، وفضل بينهم الحوار مستمر، لحد ما زارته في بيته يوم 25 فبراير اللي فات، وهناك هو بدأ في الاعتداء عليها وهي وصفت ده، وقالت إنها كانت رافضة اللي حصل.

بالرغم من كدة، الأخبار بتقول إن البنت رفضت إن هي تقدم شكوى ضد حكيمي، ولكن مكتب المدعي العام قرر إن هو يتبنى القضية دي، ويفتح تحقيق فيها.

في أول تعليق ليه على الموضوع، نفى بشكل قاطع أشرف حكيمي الواقعة دي، وقال إن الكلام ده مش صحيح، وفي انتظار نتيجة التحقيقات، وكمان مراسل صحيفة ماركا الإسبانية، قال إن حكيمي في حفل توزيع جوائز الأفضل في العالم كان باين عليه الهدوء الشديد.

ولكن على الناحية التانية، ظهرت للنور مشكلة تانية بتطارد حكيمي، وهي علاقته بزوجته هبة عبوك، الممثلة الإسبانية من أصول تونسية.

هبة عبوك، أكبر من حكيمي بـ12 سنة، اتقابلوا في ألمانيا سنة 2018، وبعدها بسنتين اتجوزوا، وأنجب منها ولاده الاتنين أمين ونعيم.

العلاقة بينهم في البداية حسب ما وصفتها الصحف الأجنبية في بداياتها الرومانسية كانت كلها سفر عشان يقدروا يتقابلوا بسبب مشاغل الطرفين، ولكن بعد كدة هي انتقلت عشان تعيش معاه مكان ما بيكون.

هبة عبوك، كانت بتظهر في صور كتير ومناسبات مع زوجها أشرف حكيمي، وكانت بتلفت الانظار، بسبب لبسها الكاشف، واللي هو مختلف عن طبيعة أسرة حكيمي، واللي شفنا والدته في كاس العالم في قطر وهي ست عربية محجبة.

ولكن مؤخرا كشفت الصحف، إن هبة عبوك بدأ في تسريع إجراءات الطلاق من زوجها أشرف حكيمي، بعد الاتهام الأخير ليه من البنت بالاعتداء، خصوصا إن الانفصال بينهم حسب ما ورد، حصل من فترة، ولكن لما ظهرت قضية البنت دي، بدأت في تسريع إجراءات الطلاق.

المعلومات بتقول إن هبة عبوك، كانت هتبعد عن حكيمي بسبب اختلاف تفكيرهم نظرا لفارق السن، واللي بدأ يشكل حاجز ما بينهم، ودلوقتي واقعة الاعتداء خلت الأمور تتحرك بشكل أسرع.

وبالرغم من دعم هبة عبوك الكبير لأشرف حكيمي، وخصوصا في مونديال قطر لما شجعت المغرب على حساب إسبانيا، إلا أنها حاليا بتتخلى عنه في أزمته.